Messi yatsinze igitego cya 700 mu mukino FC Barcelone yatakajemo amanota

Yanditswe na Eric Tony Ukurikiyimfura
Kuya 1 Nyakanga 2020 saa 07:57
Yasuwe :
0 0

Rutahizamu w’Umunya-Argentine, Lionel Messi, yatsinze igitego cye cya 700 kuva atangiye gukina umupira w’amaguru ubwo yatsindiraga FC Barcelone kuri penaliti mu mukino wa Shampiyona yanganyijemo na Atlético Madrid ibitego 2-2 ku wa Kabiri.

Lionel Messi wari umaze imikino ibiri nta gitego atsinda, yatsinze penaliti yabonetse ku munota wa 50 nyuma yo kuyitera mu buryo bwa Panenka, umunyezamu Jan Oblak ajya mu rundi ruhande.

Iki gitego cyahesheje FC Barcelone kuyobora umukino, ariko nyuma Atlético Madrid yongera kwishyura, urangira ari ibitego 2-2.

Cyabaye igitego cya 630 Lionel Messi atsindiye FC Barcelone mu mikino 724 mu gihe mu Ikipe y’Igihugu ya Argentine amaze gutsinda ibitego 70.

Uyu Munya-Argentine yagize kandi uruhare mu gitego cya mbere cya FC Barcelone, aho umupira wa koruneri yateye, wakozweho na Diego Costa ugahindura icyerekerezo, ukerekeza mu izamu rye ku munota wa 11.

Diego Costa yabonye amahirwe yo kwishyurira ikipe ye kuri penaliti yakorewe kuri Yannick Carrasco ku munota wa 19, ariko ikurwamo n’umunyezamu Marc-André ter Stegen.

Kuba uyu munyezamu wa FC Barcelone yakuyemo umupira yabanje kujya imbere gato akava mu murongo, byatumye penaliti isubirwamo, itsindwa na Saul Niguez n’ubundi wongeye kwishyurira Atlético Madrid ku yindi penaliti yabonetse ku munota wa 62.

Kunganya uyu mukino byatumye FC Barcelone inanirwa gufata umwanya wa mbere nyuma y’umukino wa 33 wa shampiyona, ikomeza kurushwa inota rimwe na Real Madrid ya mbere n’amanota 71, yo izakina na Getafe ku wa Kane.

Igitego cya 700 Lionel Messi yatsinze cyaje nyuma y’amezi 14 atsinze icya 600.

Lionel Messi amaze gutsinda ibitego 700 mu mupira w'amaguru
Lionel Messi atsinda penaliti yateye mu buryo bwa Panenka mu mukino waraye uhuje FC Barcelone na Atlético Madrid

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .