Messi yahigitse Ronaldo ku rutonde rw’abakinnyi binjije akayabo kurusha abandi ku Isi

Yanditswe na Eric Tony Ukurikiyimfura
Kuya 13 Kanama 2020 saa 10:21
Yasuwe :
0 0

Rutahizamu wa FC Barcelone, Lionel Messi ni we mukinnyi ukize kurusha abandi ku Isi nyuma yo guhigika Cristiano Ronaldo ku rutonde ruheruka gushyirwa ahagaragara.

Ikinyamakuru France Football cyakoze urutonde rw’abakinnyi 10 binjije amafaranga menshi mu 2019, aho cyasanze abakinnyi ba mbere ku Isi mu mupira w’amaguru ari bo bakurikirana ku mwanya wa mbere n’uwa kabiri.

Messi ayoboye uru rutonde nyuma yo kwinjiza miliyoni 120£ mu mwaka ushize, arusha miliyoni 11£ Cristiano Ronaldo ukinira Juventus, we uri ku mwanya wa kabiri.

Aba bakinnyi bombi nibo babashije kwinjiza byibuza agera kuri miliyoni 100£ mu mwaka ushize, yabazwe hagendewe ku mishahara, uduhimbazamusyi, ibyo binjiza mu kwamamaza n’andi mafaranga babona ku ruhande.

Neymar ukinira Paris Saint-Germain ni we uri ku mwanya wa gatatu na miliyoni 87£, akurikiwe na Gareth Bale wa Real Madrid, winjije miliyoni 35.45£ nubwo atigeze abona umwanya uhagije wo gukina.

Bale arusha ibihumbi 200£ Antoine Griezmann uri ku mwanya wa gatanu, Eden Hazard akaba uwa gatandatu na miliyoni 32.06£ mu gihe Raheem Sterling wa Manchester City ari ku mwanya wa karindwi na miliyoni 30.96£ ndetse ni we wenyine wo muri Premier League wagaragaye ku rutonde rw’abakinnyi 10.

Icyatunguranye kuri uru rutonde ni uko Andres Iniesta wavuye muri FC Barcelone mu 2018, akerekeza muri Vissel Kobe yo mu Buyapani, ari ku mwanya wa munani, aho yinjije miliyoni 31.14£ mu 2019.

Nubwo France Football itatanze Ballon d’Or yashoboraga kwegukanwa na Robert Lewandowski uyu mwaka, iki kinyamakuru cyashyize uyu mukinnyi wa Bayern Munich ku rutonde nk’uwa cyenda winjije miliyoni 26.56£.

Kylian Mbappé yasanze Neymar bakinana muri PSG kuri uru rutonde, aho yinjije miliyoni 24.73£ akaba ari na we uri ku mwanya wa 10.

Lionel Messi ayoboye urutonde rw'abakinnyi binjije menshi kurusha abandi ku Isi mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .