Meddie Kagere wifuzwaga n’amakipe akomeye yongereye amasezerano muri Simba SC

Yanditswe na Eric Tony Ukurikiyimfura
Kuya 17 Kamena 2019 saa 02:06
Yasuwe :
0 0

Ubuyobozi bw’Ikipe ya Simba SC yo muri Tanzania bwatangaje ko rutahizamu w’Umunyarwanda, Meddie Kagere, yongereye amasezerano y’imyaka ibiri, azageza mu mpeshyi ya 2021 ari umukinnyi wayo.

Kagere Meddie yifuzwaga n’amakipe arimo Zamalek SC yo mu Misiri na Zesco United yo muri Zambia zifuzaga kumutangaho asaga ibihumbi $450.

Ibinyujije ku rukuta rwayo rwa Twitter kuri uyu wa Mbere, Simba SC yatangaje ko yongereye uyu mukinnyi amasezerano, iti ”Umukinnyi w’umwaka akaba na rutahizamu w’umwaka azagumana natwe mu myaka ibiri iri imbere. Uyu ni intwaro izaguma mu ikipe itwara ibikombe.”

Kagere Meddie yageze muri Simba SC mu mpeshyi y’umwaka ushize aguzwe muri Gor Mahia yo muri Kenya ku masezerano y’umwaka umwe.

Muri uyu mwaka yakiniyemo na Simba SC, yayitsindiye ibitego 34 birimo 23 bya shampiyona mu mikino 52 yakinnye mu mwaka w’imikino 2018/19, aho yanatowe nk’umukinnyi w’umwaka muri Simba SC nyuma yo kuyitsindira ibitego byinshi.

Kagere Meddie ni umugabo w’imyaka 33 yashakanye n’Umunyarwandakazi. Uyu rutahizamu yavukiye muri Uganda ku wa 10 Ukwakira 1986.

Yakiniye Ikipe ya Mbale Heroes FC hagati ya 2004-2006. Yahavuye ahita aza mu Rwanda mu Ikipe ya Atraco FC mu 2006. Nyuma y’umwaka umwe yagiye muri Kiyovu Sports yavuyemo yerekeza muri Mukura Victory Sports mu mwaka w’imikino 2008-2009 kugeza mu 2010 ubwo yajyaga muri Police FC, aho yakinnye imikino 40 agatsinda ibitego 38.

Mu 2012 yerekeje muri ES Zaris yo muri Tunisia atamazemo igihe, ahita agaruka muri Police FC.

Nyuma yaho yakinnye muri Rayon Sports, aho mu mikino 12 ya shampiyona yo kwishyura, yatsindiye iyi kipe yambara ubururu n’umweru ibitego umunani.

Mu 2014 yerekeje muri Albania mu ikipe ya KF Tirana, batandukanye tariki ya 1 Mutarama 2015, basheshe amasezerano.

Mu mwaka wa 2015, nibwo Kagere Meddie yatangiye gukinira Gor Mahia afite amasezerano y’umwaka umwe, aho yayitsindiye ibitego 31 mu mikino yose yakinnye, ariko bananirwa kumvikana ku masezerano mashya, batandukana muri Mutarama.

Gor Mahia yamugaruye nyuma y’amezi atandatu, aho yayivuyemo mu mwaka ushize ajya muri Simba SC.

Kagere ni umukinnyi w’Ikipe y’Igihugu Amavubi kuva mu 2011, ubwo u Rwanda rwatsindaga Bénin igitego 1-0 akaba ari we ugitsinda.

Mu 2015 na we yahagaritswe mu nkubiri y’abanyamahanga mu Amavubi, yongera guhamagarwamo mu mwaka ushize ubwo u Rwanda rwatsindwaga na Côte d’Ivoire ibitego 2-1, akaba ari na we utsinda iki gitego.

Kagere Meddie yongereye amasezerano y'imyaka ibiri muri Simba SC
Meddie Kagere yabaye umukinnyi w'umwaka muri Simba SC yagezemo mu mpeshyi y'umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza