Mbwana Samatta yabaye Umunya-Tanzania wa mbere ugiye gukina muri Premier League

Yanditswe na Eric Tony Ukurikiyimfura
Kuya 21 Mutarama 2020 saa 09:31
Yasuwe :
0 0

Ku myaka 27, rutahizamu w’Umunya-Tanzania, Mbwana Ally Samatta, yaguzwe n’ikipe ya Aston Villa yo mu Cyiciro cya Mbere mu Bwongereza (Premier League) kuri miliyoni 10 £ mu gihe cy’imyaka ine n’igice.

Mbwana Samatta yakiniraga ikipe ya Genk yo mu Cyiciro cya Mbere mu Bubiligi, yerekejemo mu 2016 avuye muri Tout Puissant Mazembe yo muri Repubulika Iharanura Demokarasi ya Congo.

Uyu mukinnyi yatsinze ibitego 10 muri iyi kipe yo mu Bubiligi mu marushanwa yose yayikiniye muri uyu mwaka w’imikino wa 2019/20, birimo igitego yatsinze Liverpool muri Champions League.

Samatta abaye umukinnyi wa mbere ukomoka muri Tanzania, ukinnye muri Premier League, ariko ntabwo akina umukino uhuza Aston Villa na Watford kuri uyu wa Kabiri.

Nyuma yo gushyira umukono ku masezerano, Samatta yavuze ko yishimiye gutera intambwe ikomeye mu mupira we ndetse no kuba umukinnyi wa mbere ukomoka muri Tanzania ugiye gukina muri Premier League.

Ati ‘’Biranshimishije cyane. Ni intambwe ikomeye mu rugendo rwanjye rw’umupira w’amaguru kandi no ku gihugu cyanjye. Buri wese yari ategereje kumenya igihe Umunya-Tanzania azakinira muri Premier League.’’

‘’Nzi byinshi kuri Aston Villa. Najyaga nkunda kureba Gabby Agbonlahor [wari rutahizamu wa Aston Villa] ubwo yari hano.’’

Aston Villa yakinnye imikino itatu iheruka nta rutahizamu uzwi ifite, ni nyuma y’uko Umunya-Brésil, Wesley, avunitse ku mukino wa Burnley wabaye tariki ya 31 Ukuboza 2019 ndetse akazamara uyu mwaka wose w’imikino ataragaruka mu kibuga.

Iyi kipe, yaherukaga kugurisha kandi Umunya-Côte d’Ivoire Jonathan Kodjia muri Al-Gharafa yo muri Qatar ku mafaranga ataratangajwe.

Kodjia w’imyaka 30, wari kuzasoza amasezerano ye ku mpera z’uyu mwaka w’imikino, yakinnye imikino icyenda gusa muri uyu mwaka, atsinda ibitego bibiri bahura na Liverpool muri ¼ cya Carabao Cup.

Samatta yabaye umukinnyi wa gatatu Aston Villa yaguze muri uku kwezi, ni nyuma yo gutira Danny Drinkwater muri Chelsea ndetse n’umunyezamu Pepe Reina muri AC Milan mu gihe yarekuye umunyezamu Lovre Kalinić wagiye muri Toulouse yo mu Bufaransa nk’intizanyo mu gihe cy’amezi atandatu.

Mbwana Ally Samatta yaguzwe na Aston Villa mu gihe cy'imyaka ine n'igice
Samatta wakiniye Simba SC na TP Mazembe ni we munya-Tanzania wa mbere ugiye gukina muri Premier League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza