00:00:00 IGIHE NETWORK KN KINYARWANDA EN ENGLISH FR FRANCAIS

Mbere ya Pelé, Ruhago yari siporo isanzwe: Ibyamamare byashenguwe n’urupfu rw’uyu munyabigwi

Yanditswe na Eric Tony Ukurikiyimfura
Kuya 30 Ukuboza 2022 saa 07:37
Yasuwe :

Ibyamamare bitandukanye birimo abakinnyi n’abatoza bakomeye mu mupira nk’abakanyujijeho n’abagikina ubu, abanyapolitiki n’abandi, bose bashenguwe n’urupfu rw’Umunya-Brésil Pelé witabye Imana ku wa Kane.

Edson Arantes do Nascimento ‘Pelé’ ufatwa nk’umukinnyi wa mbere ukomeye wabayeho mu mateka ya Ruhago ku Isi, yitabye Imana aguye mu bitaro aho yari amaze iminsi arwaye kanseri. Yari afite imyaka 82.

Neymar, Kylian Mbappé, Cristiano Ronaldo, Lionel Messi n’abandi batandukanye bagaragaje akababaro batewe n’itabaruka ry’uyu mugabo ufatwa nk’umwami w’umupira w’amaguru.

Nyuma y’itangazwa ry’urupfu rwa Pelé, Neymar yashyize ubutumwa kuri Instagram avuga ko uyu mugabo yagize umupira w’amaguru icyo uri cyo uyu munsi.

Ati "Mbere ya Pelé, 10 wari umubare. Iyi nteruro nasiyomye ahantu, rimwe mu buzima bwanjye. Ariko iyi nteruro nziza, ntiyuzuye. Navuga ko mbere ya Pelé, umupira w’amaguru wa siporo isanzwe. Pelé yarawuhinduye wose. Yahinduye umupira w’amaguru umwuga, awuhinduramo imyidagaduro."

Yakomeje agira ati "Yahaye ijwi abakene, abirabura ndetse cyane agaragaza Brésil. Umupira w’amaguru na Brésil byazamuye urwego kubera Umwami! Yagiye ariko ibitangaza bye biracyahari. Pelé azahoraho."

Umunyabigwi w’Umunya-Brésil, Ronaldo, na we yashyize ubutumwa ku mbuga nkoranyambaga aho yagize ati "Umwe rukumbi. Utuje. Wuje ubuhanga. Uhanga udushya. Ntamakemwa. Umwe wihariye. Aho Pelé yageze, yarahagumye. Nubwo atigeze ava ku rwego rwo hejuru yagezeho, yadusize uyu munsi. Umwami w’umupira w’amaguru, umwe rukumbi, umunyabigwi w’ibihe byose."

Umwongereza Geoff Hurst wakinnye mu bihe bya Pelé, yagize ati "Mfite ibihe byinshi nagiranye na Pelé, ntashidikanya ko ari we mukinnyi mwiza nakinnye mpanganye na we (Babby Moore akaba umwiza nakinanye na we). Kuri njye, Pelé ahora ari we mukinnyi w’ibihe byose kandi natewe ishema no guhurira mu kibuga na we. Ruhukira mu mahoro Pelé kandi urakoze."

Abakinnyi bakiri bato barimo Kylian Mbappé, Marcus Rashford na Erling Haaland na bo bari mu bagaragaje akababaro batewe n’urupfu rwe.

Kylian Mbappé yagize ati "Umwami w’umupira w’amaguru yatuvuyemo ariko ibigwi bye ntibizibagirana. Ruhukira mu mahoro Mwami."

Cristiano Ronaldo yanditse ati "Nifatanyije na Brésil yose, by’umwihariko umuryango wa Edson Arantes do Nascimento. Gusezera ku mwami Pelé uzahoraho ntibihagije ku buryo wagaragaza akababaro isi yose ya ruhago irimo. Intangarugero kuri miliyoni nyinshi, ejo hashize, uyu munsi ndetse n’iteka ryose."

Lionel Messi yashyize hanze ifoto ari kumwe na Pelé, ayikurikiza amagambo agira ati "Ruhukira mu mahoro Umwami Pelé."

Ku rundi ruhande, amakipe yakinnye ku wa Kane ku bibuga bitandukanye, yafashe umunota umwe wo kuzirikana Pelé mbere yuko imikino yayo itangira.

Perezida wa FIFA, Gianni Infantino yagize ati "Ubuzima bwe burenze umupira w’amaguru. Yahinduye byinshi kuri Brésil, muri Amerika y’Epfo ndetse no hirya no hino ku Isi.”

Yakomeje agira ati "Uyu munsi, turunamye kubera kubura Pelé twakundaga, ariko hashize igihe yarageze ku bitatuma apfa ngo yibagirane. Ku bw’ibyo, azahorana natwe ubuziraherezo."

Umunya-Jamaica, Usain Bolt wasiganwaga ku maguru ku ntera nto, na we yashenguwe n’urupfu rwa Pelé. Yagize ati "Umunyabigwi wa siporo. Ruhukira mu mahoro Umwami Pelé."

Mu gihe mu Bwongereza, amarembo ya Stade Wembley yashyizwe mu mabara ya Brésil, i Rio de Janeiro ho, ikibumbano cya Yezu, Christ the Redeemer, cyashyizwe mu mabara y’icyatsi hazirikanwa uyu munyabigwi witabye Imana afite imyaka 82.

Hagaragazwa ko Pelé yashyizeho agahigo ko gutsinda ibitego 1281 mu mikino 1363 yakinnye mu gihe cy’imyaka 21, birimo ibitego 77 yatsindiye igihugu cye mu mikino 92 yagikiniye.

Ni we mukinnyi rukumbi wegukanye Igikombe cy’Isi inshuro eshatu, aho yagitwaye mu 1958, 1962 no mu 1970.

Mu 2000, FIFA yamugize umukinnyi w’ikinyejana.

Perezida wa Leta Zunze Ubumwe za Amerika, Joe Biden, yagize ati "Ku mukino uhuza isi kurusha undi wose, izamuka rya Pelé kuva mu ntangiriro kugeza ku kuba umunyabigwi wa ruhago ni inkuru y’ikintu gishoboka."

Barack Obama, na we wigeze kuyobora Leta Zunze Ubumwe za Amerika, yagize ati “Pelé ni umwe mu beza bigeza bakina umukino mwiza. Twifatanyije n’umuryango we ndetse n’uwo ari we wese wamukunze.”

Guverinoma ya Brésil n’amakipe ya Santos na New York Cosmos aho Pelé yakinnye, na ari mu yagaragaje ko yashenguwe n’urupfu rwe.

Umukobwa we, Kely Nascimento, yasangije abamukurikira ifoto igaragaza ko ibiganza by’abagize umuryango biri ku mubiri wa Pelé mu bitaro, ayikurikiza amagambo agira ati “Buri kimwe turi cyo ni ukubera wowe. Tugukunda bitagira iherezo. Ruhukira mu mahoro.

Umuhungu wa Pelé, Edson Nascimento “Edinho” wamukurikije agakina umupira w’amaguru, yasangije abamukurikira ifoto iri ho se ashoreye umupira, ayandikaho ati "Genda n’Imana, papa"

Pelé yajyanywe mu bitaro ku wa 29 Ugushyingo nyuma yo kugira ikibazo mu buhumekero no kugira ngo akurikinwe ku burwayi bwa kanseri yasanzwemo muri Nzeri 2021.

Amakuru yavuye mu bitaro mu ntangiriro z’icyumweru gishize yavugaga ko ubuzima bwa Pelé bwarushije kuba bubi ndetse bisaba ubuvuzi burenzeho kubera ko kanseri ye yageze ku rundi rwego.

Umuryango we wasabwe kumuhora hafi ndetse Noheli yawo uyizihiriza mu bitaro bya Albert Einstein i São Paulo.

Kuva icyo gihe, nta yandi makuru yongeye gutangwa n’ibitaro ku buryo ubuzima bwa Pelé bwari buhagaze kugeza ubwo hatangazwaga ko yitabye Imana ku mugoroba wo ku wa 29 Ukuboza 2022.

Muri Brésil hashyizweho iminsi itatu yo kumwunamira, ni mu gihe azashyingurwa ku wa Kabiri.

Pelé yitabye Imana ku wa Kane, afite imyaka 82
Ikibumbaro cya ‘Christ the Redeemer’ cyashyizwe mu mabara y'icyatsi n'umuhondo
Ifoto yashyizwe hanze n'umukobwa wa Pele, Kely Nascimento, nyuma y'urupfu rw'uyu munyabigwi
Amarembo ya Stade Wembley mu Bwongereza, yashyizwe mu mabara y'ibendera rya Brésil
Amakipe yakinnye ku wa Kane yafashe umunota wo kwibuka Pelé

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .