00:00:00 IGIHE NETWORK KN KINYARWANDA EN ENGLISH FR FRANCAIS

Mbappé na Rüdiger i Madrid, Suárez na Dybala barajya he?...Isoko ry’i Burayi ryashyushye

Yanditswe na Mihigo Saddam
Kuya 16 May 2022 saa 11:03
Yasuwe :

Mu bihugu bitandukanye ku Mugabane w’u Burayi hari gusozwa umwaka w’imikino 2021-2022 ari nabyo biri gutuma amakipe ahugiye ku isoko ashaka abatoza n’abakinnyi azifashisha mu bihe biri imbere.

Amazina ayobowe n’abarimo; Kylian Mbappé ukinira Paris Saint Germain (PSG), Paulo Dybala (Juventus), Paul Pogba (Manchester United), Luis Suárez (Atlético Madrid), Robert Lewandowski (Bayern Munich), Antonio Rüdiger (Chelsea), Divock Origi (Liverpool), Franck Kessie (Inter Milan) niyo ari kuvugwa cyane ku isoko ry’igura n’igurisha ry’abakinnyi i Burayi.

Umufaransa ukina ashaka ibitego muri PSG, Kylian Mbappé, amezi abaye menshi ashakwa n’ikipe ya Real Madrid yo muri Espagne.

Uyu musore w’imyaka 23 y’amavuko umaze imyaka itanu i Paris ntabwo ahazaza he haramenyekana neza ariko Real Madrid irahabwa amahirwe menshi yo kumwegukana.

Kylian Mbappé mu nzira ziva i Paris:

Kylian Mbappé ukinira PSG kuva mu mwaka w’imikino 2017-2018 kuri ubu aravugwa buri munota ku rwego rw’Isi kubera amakuru amwerekeza muri Real Madrid.

Ikipe ya Real Madrid isanzwe idaterwa ubwoba no kugura ibihangange mu mupira w’amaguru, amezi abaye menshi bivugwa ko iri mu biganiro na Kylian.

Ibitangazamakuru bitandukanye bivuga ko uyu mukinnyi yumvikanye na Real Madrid ku buryo mu cyumweru gitaha ashobora gutangazwa nk’umukinnyi wayo mushya.

Kylian Mbappé ugenderwaho mu Ikipe y’Igihugu y’u Bufaransa, kuri iki Cyumweru yahembwe nk’umukinnyi mwiza muri Shampiyona y’Abafaransa ku nshuro ya gatatu yikurikiranya.

Kylian Mbappé ari mu bakinnyi bafashije u Bufaransa gutwara igikombe cy'Isi cya 2018

Antonio Rüdiger arashaka kujya kubaka ubwami i Madrid

Myugariro wa Chelsea FC, Antonio Rüdiger, nyuma y’imyaka itanu ari i Stamford Bridge, kuri ubu ibiganiro bimuganisha muri Real Madrid bigeze kure.

Rüdiger ukinira Ikipe y’Igihugu y’u Budage, Real Madrid irifuza ko yajya akinana na David Alaba nk’abakinnyi bafite ubunararibonye.

Ubufatanye bwa David Alaba na Antonio Rüdiger buzaba busimbura ubwa Sergio Ramos na Raphael Varane bose basohotse muri iyi kipe.

Antonio Rüdiger arashaka kujya kubaka ubwami i Madrid arashaka kuzakina igikombe cy'Isi avuye muri Espagne

Paulo Dybala ari mu minsi ya nyuma muri Juventus:

Umunya-Argentine ukina ashaka ibitego muri Juventus, Paulo Dybala yamaze gusezera ku bakinnyi n’abakunzi b’iyi kipe avuga ko batazakomezanya.

Paulo Dybala w’imyaka 28 biravugwa ko azasohoka muri Juventus agana muri Arsenal yo mu Bwongereza, uretse ko amakipe amwifuza ari menshi.

Paulo Dybala ushakwa na Arsenal yigeze kuvugwa muri Manchester United

Luis Suárez ashobora gusubira mu Bwongereza:

Nyuma y’imyaka ibiri ari muri Atlético Madrid, Luis Suárez yasezeye ku muryango mugari w’iyi kipe ubwo yari imaze kunganya na FC Sevilla igitego 1-1.

Amakuru amukura muri Atlético Madrid yabanje kumuganisha muri Shampiyona ya Leta Zunze Ubumwe za Amerika ariko biravugwa ko atabishaka cyane.

Suárez wabaye muri Shampiyona y’Abongereza akinira Liverpool, biravugwa ko ari kuganira n’ikipe ya Aston Villa.

Abasesengura neza ruhago y’Abongereza bavuga ko Luis Suárez byoroshye ko yajya muri Aston Villa kuko inatozwa na Steven Gerrard bakinanye muri Liverpool.

Luis Suárez ashobora gusubira mu Bwongereza gutozwa n'uwo bakinanye

Robert Lewandowski arashaka kwereka ko n’i Barcelona yabikora:

Rutahizamu w’Umunya-Pologne ukinira Bayern Munich, Robert Lewandowski biravugwa ko akazi yakoraga muri iyi kipe ashaka kugakomereza muri FC Barcelona.

Lewandowski w’imyaka 33 yageze muri Bayern mu 2014 avuye muri Borussia Dortmund yakiniye imyaka ine (2010-2014). Ikipe ya FC Barcelona kandi yasoje gahunda yo kugura Andreas Christensen wa Chelsea.

Robert Lewandowski uri mu minsi ya nyuma muri Bayern Munich arashaka kujya guhahira muri Espagne

Paul Pogba arava mu rugo ajya munsi y’urugo:

Paul Pogba ukina hagati mu kibuga muri Manchester United n’Ikipe y’Igihugu y’u Bufaransa, kuri ubu ari mu biruhuko nyuma yo kugira imvune.

Pogba w’imyaka 29 y’amavuko aravugwa mu bashakwa na Manchester City, umuturanyi w’umucyeba.

Amakuru yari agezweho mu minsi ishize avuga ko ushinzwe gushaka isoko rya Pogba adashaka kugira icyo avuga mbere y’iki Cyumweru.

Pogba yageze muri muri Manchester United ku nshuro ya kabiri avuye muri Juventus yo mu Butaliyani.

Paul Pogba ashobora kudahindura umujyi

Divock Origi mu minsi ya nyuma i Anfield:

Divock Okoth Origi umaze igihe arwana no kubona umwanya uhagije wo gukina muri Liverpool, amakuru amuvugwaho amujyana muri AC Milan yo mu Butaliyani. Origi w’imyaka 27, yamaze kubwira ubuyobozi bwa Liverpool yo yifuza gusohoka muri iyi kipe yatwaranye nayo ibikombe byose yakiniye mu gihe cye. Bivugwa ko uyu musore arajwe ishinga no gushaka umwanya uhagije wo gukina kugira ngo azitabire Igikombe cy’Isi kizabera muri Qatar ahagaze neza.

Divock Origi mu minsi ya nyuma i Anfield aho bamwihanganiye bihagije

Franck Kessie asigaje amasaha make mu bitabo bya AC Milan:

Franck Yannick Kessie ukinira AC Milan kuva mu 2017, kuri ubu nyuma y’imyaka itanu arashaka kujya guhahira muri FC Barcelona.

Iyi kipe y’i Catalugna iranifuza Raphinha wa Leeds United yo mu Bwongereza.

Franck Kessie asigaje amasaha macye mu bitabo bya AC Milan

Erling Braut Haaland yasezwe i Signal Iduna Park:

Mu cyumweru gishize ni bwo ubuyobozi bwa Manchester City bwahamije ko bwamaze kwemeranya na Borussia Dortmund ku igurwa rya Erling Haaland.

Mu mpera z’icyumweru kandi ni bwo Borussia Dortmund yakoze umuhango wo kumusezera no kumwifuriza kuzahirwa mu Bwongereza.

Mu Bwongereza kandi amakipe arimo Arsenal FC na yo yatangiye gutanga ibimenyetso byo kwiyubaka. Iyi kipe yo mu Majyaruguru ya London irifuza abakinnyi barimo Gabriel Jesus na Raheem Sterling ba Manchester City. Iranashaka Marquinhos ukina ashaka ibitego muri Sao Paulo muri Brésil.

Erling Braut Haaland yavuye muri Borussia Dortmund ajya muri Manchester City umubyeyi we yakinnyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .