Masudi Djuma yemejwe nk’umutoza mukuru wa Bugesera FC

Yanditswe na Eric Tony Ukurikiyimfura
Kuya 12 Ugushyingo 2019 saa 08:56
Yasuwe :
0 0

Umurundi Masudi Djuma ni we wagizwe Umutoza Mukuru wa Bugesera FC, aho yahawe izi nshingano kugira ngo asimbure Bisengimana Justin uheruka gutandukana n’iyi kipe yo mu Ntara y’Iburasirazuba kubera umusaruro muke.

Masudi wari umutoza wa Bukavu Dawa muri Repubulika Iharanira Demokarasi ya Congo, yashyize umukono ku masezerano kuri uyu wa Mbere nimugoroba.

Uyu mutoza yemejwe nyuma y’amasaha make Bugesera FC yari yamaze kumvikana na Karekezi Olivier, ibwiwe ko idashobora kumusinyira.

Masudi Djuma yavuye mu Rwanda muri Mata uyu mwaka, nyuma yo kwirukanwa na AS Kigali yamushinje umusaruro muke muri Shampiyona y’umwaka ushize w’imikino.

Umukino wa mbere azatozamo Bugesera FC iri ku mwanya wa 10 n’amanota umunani, ni uwo izakiramo Mukura Victory Sports ku munsi wa cyenda wa Shampiyona tariki ya 24 Ugushyingo.

Uyu mugabo w’imyaka 42 yageze mu Rwanda bwa mbere mu 1998, akinira APR FC imyaka ibiri mbere yo kwerekeza muri Kiyovu Sports.

Mu 2003 nibwo yerekeje muri Rayon Sports maze mu 2004 ayifasha gutwara shampiyona ubwo yatozwaga na Kayiranga Baptiste, nyuma ava muri iyi kipe yerekeza mu gihugu cya Seychelles mbere yo kugaruka mu bururu n’umweru mu 2006, agakina umwaka umwe.

Masudi yaretse gukina ruhago mu 2010 mu ikipe ya Inter Stars, agana mu butoza aho kugeza ubu afite Licence B ya CAF yabonye mu 2013.

Rayon Sports ni yo kipe yabereye umutoza mukuru guhera muri Gashyantare 2016, ayihesha igikombe cya Shampiyona ya 2016/17 n’igikombe cy’Amahoro cya 2016.

Nyuma yo gutandukana na Rayon Sports mu 2017, yabaye umutoza wungirije muri Simba SC mu mwaka w’imikino wa 2017/18, ahava agaruka mu Rwanda mu mpeshyi, aho yagizwe umutoza wa AS Kigali.

Ahandi yatoje ni muri Inter FC na Inter Star z’i Burundi, aho yari umutoza wungirije ndetse no mu ikipe y’igihugu y’u Burundi y’abato yatoje mu 2015.

Masudi Djuma watoje Rayon Sports na AS Kigali, ni we wagizwe umutoza wa Bugesera FC
Masudi yaraye asinyiye gutoza Bugesera FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza