Mashami yatangaje abakinnyi 11 yifashisha ku mukino wa Mozambique

Yanditswe na IGIHE
Kuya 14 Ugushyingo 2019 saa 03:57
Yasuwe :
0 0

Umutoza w’Amavubi, Mashami Vincent, yatangaje abakinnyi 11 babanza mu kibuga ku mukino wa mbere uhuza Ikipe y’Igihugu n’iya Mozambique mu gushaka itike y’Igikombe cya Afurika kizabera muri Cameroun mu 2021.

Amavubi arakina na Mozambique ku mugoroba wo kuri uyu wa Kane, tariki ya 14 Ugushyingo 2019, saa kumi n’ebyiri kuri Estádio do Zimpeto.

Iyi stade yafunguwe ku wa 23 Mata 2011, yakiriye imikino ya All-Africa Games muri uwo mwaka, ifite ubushobozi bwo kwakira abafana 42,000.

Mu bakinnyi 11, Amavubi yifashisha barimo barindwi bakina hanze y’u Rwanda mu gihe ab’imbere mu gihugu bayobowe na Kapiteni, Haruna Niyonzima, umunyezamu Kimenyi Yves, ba myugariro Omborenga Fitina na Imanishimwe Emmanuel.

Mu bakina hanze, mu batari kuri uru rutonde harimo myugariro wo hagati, Bayisenge Emery, wagiriye ikibazo mu myitozo ya mbere y’Amavubi muri Mozambique yabaye ku mugoroba wo ku wa Mbere, bituma adakomeza gukorana n’abandi.

Ni ku nshuro ya gatatu u Rwanda na Mozambique bigiye guhura hashakwa itike y’Igikombe cya Afurika.

Mu mukino ubanza wabaye muri Kamena 2015 hashakwa itike ya CAN 2017, u Rwanda rwatsindiye Mozambique iwayo igitego 1-0 cya Sugira Ernest. Mu wo kwishyura wabaye muri Kamena 2016, Mozambique yatsindiye u Rwanda i Kigali ibitego 3-2.

Nyuma y’uyu mukino, ku wa Gatanu, Amavubi azagaruka i Kigali yitegura uw’umunsi wa kabiri azakiramo Cameroun ku Cyumweru, kuri Stade ya Kigali saa 18:00.

Mu itsinda F, u Rwanda ruri kumwe na Mozambique, Cameroun na Cap-Vert.

Cameroun yanganyije na Cap-Vert ubusa ku busa mu mukino wo muri iri tsinda wabaye ku wa 13 Ugushyingo 2019.

Ikipe imwe yo muri iri tsinda ni yo izazamuka na Cameroun izakira iri rushanwa mu 2021.

Abakinnyi 11 babanza mu kibuga ku ruhande rw’Amavubi: Kimenyi Yves (Rayon Sports), Fitina Omborenga (APR FC), Imanishimwe Emmanuel (APR FC), Rwatubyaye Abdul (Colorado Rapids, USA), Nirisarike Salomon (Pyunik FC, Armenie), Niyonzima Haruna (AS Kigali), Muhire Kevin (Misr El Makkasa, Misiri), Bizimana Djihad (Waasland Beveren, u Bubligi), Kagere Meddie (Simba SC, Tanzania), Tuyisenge Jacques (Pétro Atletico, Angola) na Hakizimana Muhadjiri (Emirates Club, EAU).

Ikipe y'Igihugu Amavubi yakoreye imyitozo ya nyuma kuri Estádio do Zimpeto ku mugoroba wo ku wa Gatatu. Mu bayitabiriye harimo na Ambasaderi w'u Rwanda muri Mozambique, Nikobisanzwe Claude (uri hagati wambaye umupira ujya gusa n'umweru)
Abakinnyi barindwi bakina hanze y'u Rwanda na bane b'imbere mu gihugu ni bo bitabajwe mu Mavubi agiye gukina na Mozambique

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza