Mashami Vincent yagiranye ibiganiro na Perezida Kagame ku iterambere rya ruhago

Yanditswe na Eric Tony Ukurikiyimfura
Kuya 14 Gashyantare 2020 saa 09:52
Yasuwe :
0 0

Umutoza Mukuru w’Ikipe y’Igihugu ‘Amavubi’, Mashami Vincent, yemeje ko yahuye na Perezida Kagame bakagirana ibiganiro byari bigamije kumuha inama n’amasomo mu bijyanye n’imirimo barimo yo gutoza Ikipe y’Igihugu.

Mashami Vincent yerekanywe nk’umutoza w’Amavubi kuri uyu wa Gatanu, aho yahawe amasezerano y’umwaka umwe.

Mu ntangiriro z’uyu mwaka nibwo byavuzwe ko uyu mutoza yahuye na Perezida Kagame bakaganira ku bijyanye n’imyitwarire y’Ikipe y’Igihugu nubwo kugeza icyo gihe atari yakongerewe amasezerano yo gukomeza gutoza Amavubi.

Mu kiganiro yagiranye n’itangazamakuru uyu munsi, ku Cyicaro cya FERWAFA, Mashami yemeje ko yahuye na Perezida Kagame akamuha inama, ariko yirinda gutangaza byinshi baganiriye.

Ati “Nibyo koko nabonanye n’Umukuru w’Igihugu. Ni ishema, ni iby’agaciro kandi namushimira byimazeyo ko yaduhaye umwanya wo kubonana na we, ariko ibyo twavuganye si ngombwa ko nabivugira hano ubutumwa nyamukuru, twarabonanye.”

“ Twagize ibiganiro byiza kandi byubaka. Hari inama yaduhaye, hari amasomo yaduhaye, hari inyunganizi kandi umuntu yabimushimira cyane kuko Perezida wa Repubulika arakurikirana, ndakeka nta kintu na kimwe atazi. Ni cyo kintu umuntu yakwishimira.”

Ubwo yagiranaga ikiganiro na Televiziyo y’Igihugu mbere y’uko umwaka wa 2019 urangira, Perezida Kagame uheruka kwitabira imikino y’umupira w’amaguru yo mu Rwanda mu 2016, yemeje ko hari ikigiye gukorwa kugira ngo Umupira w’Amaguru usa n’uwasigaye inyuma mu Rwanda na wo ujye ku rwego rw’iyindi mikino.

Icyo gihe yagize ati “Kuri njye ni ibyishimo kuba twagira icyo dukora no gushyigikira abari muri iyo mikino. Ku buryo bw’umwihariko, umupira w’amaguru turaza kubikurikiranira hafi turebe ko na bo bashyiraho akabo bakaza gutera imbere.”

Mu kwezi gushize nibwo Minisiteri ya Siporo yemeje ko Mashami azakomeza gutoza Amavubi ndetse kuri ubu akaba yarongerewe abazajya bamufasha. Mu myanya mishya yongerewe mu Ikipe y’Igihugu harimo undi muganga, Umujyanama mu bya Tekiniki, Umutoza wongerera ingufu abakinnyi, Umu-Physio, Usesengura amashusho n’ushinzwe gufata amafoto n’amashusho by’Ikipe y’Igihugu.

Mu masezerano mashya Mashami Vincent yahawe, yasabwe kurenga amatsinda ya CHAN 2020 no kwitwara neza mu mikino yo gushaka itike y’Igikombe cy’Isi cya 2022 na CAN 2021.

Mashami Vincent yerekanwe nk'umutoza mukuru w'Amavubi kuri uyu wa Gatanu, ahabwa amasezerano y'umwaka umwe
Mashami yavuze ko yabonanye na Perezida Kagame akamuha inama n'amasomo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .