00:00:00 IGIHE NETWORK KN KINYARWANDA EN ENGLISH FR FRANCAIS

Manchester United yigaranzuye Manchester City (Amafoto)

Yanditswe na Iradukunda Olivier
Kuya 14 Mutarama 2023 saa 05:56
Yasuwe :

Manchester United yari imaze imikino itatu itsindwa na mukeba zisangiye umujyi, Manchester City, yayigaranzuye iyitsinda ibitego 2-1 muri Premier League.

Ni umukino wabaye ku gicamunsi cyo kuri uyu wa Gatandatu, tariki ya 14 Mutarama 2023. Wabereye ku kibuga cya Manchester United, Old Trafford.

Umukino watangiye amakipe yombi akina nta gihunga kuko wabonaga Manchester United ikina imipira yihuta igana imbere. Ariko nk’ibisanzwe, Manchester City na yo yafata umupira ikagerageza guhanahana yerekeza ku izamu ryari ririnzwe na David De Gea.

Nubwo kugera imbere y’izamu byari bigoye cyane ku mpande zombi kubera guhagarara neza kwa ba myugariro ba buri ruhande, Manchester United ni yo yaremye uburyo bwa mbere muri uyu mukino watangiye wihuta cyane.

Manchester United nubwo yabonaga imipira bigoranye, yafashwaga kugeza imipira imbere y’izamu inyuze mu mpande zakinagaho Bruno Fernandes na Marcus Rashford. Gusa ntabwo Anthony Martial yababaniye.

Ku munota wa 36, Manchester United yabonye uburyo ku mupira Rashford yahawe na Luke Shaw, ariruka asiga Rodrygo, ariko ateye umupira, umunyezamu Ederson Morães awukuramo.

Rashford yongeye kwiruka ku mupira, akuramo imvune yatumye benshi mu bakunzi ba Manchester United bibaza uko umukinnyi wabo uri mu bihe byiza, aramutse avuyemo uko byagenda.

Ntabwo yavuwe igihe kirekire ahubwo yahise agaruka mu kibuga ariko imbaraga yakoreshaga ziragabanuka. Ibi byabaye mu mpera z’igice cya mbere cyari cyongeweho umunota umwe, Manchester city yaremyemo ubundi buryo bw’igitego ariko ishoti rya Kyle Walker rijya hanze.

Iki gice kandi cyarangiye Manchester City iri hejuru mu kugumana umupira, ariko Manchester United ari yo ifite imipira myinshi yateye mu izamu kuko yateye ibiri, ngenzi yayo yateye umwe.

Igice cya kabiri cyatangiye Manchester United ikora impinduka ikuramo Anthony Martial watakazaga imipira myinshi, yinjiza Antony Santos. Yahise ajya gufatanya na Rashford, umutoza Erik Ten Hag atangira gukinisha abasatira babiri, Bruno Fernandes yigira inyuma ajya gufasha hagati mu kibuga.

N’ubundi byakomeje kugorana kuko Manchester City yarushije cyane Manchester United, itangira no kugeza uburyo mu rubuga rw’amahina nubwo igitego kitabonekaga.

Bakomeje kuguma imbere y’izamu cyane, ariko Jack Grealish wari umaze kwinjira mu kibuga asimbuye Phil Foden, aherezwa umupira na Kevin De Bruyne, ashyira ku mutwe atsinda igitego cya mbere ku munota wa 60.

Nubwo abasore ba Manchester City bari bamaze kujya imbere mu bitego, ntabwo biraye, ahubwo bakiniye mu kibuga cya Manchester United bashaka igitego cya kabiri.

Manchester United FC yahise ikora izindi mpinduka ikura mu kibuga Christian Eriksen, ishyiramo Alejandro Garnacho waje kongera imbaraga mu busatirizi.

Manchester United FC yishyuye igitego cyo kunganya ku munota wa 78, kitavuzweho rumwe na buri wese, nubwo umusifuzi Stuart Attwell yacyemeje.

Iki gitego cyagiyemo ku mupira waruvuye kuri Casemiro, Marcus Rashiford wari waraririye ntiyakora ku mupira, awurekera Bruno Fernandes wahise atera mu izamu adahagaritse.

Iki gitego cyongereye ingufu Manchester United ikoresha uburyo nk’ubwa mbere yongera gukura umupira inyuma, Alejandro Garnacho yirukankana umupira, acenga ba myugariro, awushyira mu rubuga rw’amahina, Rashford wari uhagaze neza ahita atsinda igitego cya kabiri.

Manchester City yashakishije uko yishyura iki gitego bikomeza kwanga, ari nako umutoza Erik Ten Hag yahise akora impinduka zihuse ashyiramo ba myugariro kugira ngo arinde izamu rye.

Havuyemo Rashford, Casemiro na Tyrell Malacia bafashije cyane ikipe ashyiramo Harry Maguire, Scott McTominay na Lisandro Martinez. Bakoze akazi bashyiriwemo basoza igice cya kabiri cyongeweho iminota itanu.

Rashford watsinze igitego cy’intsinzi, yahise aba umukinnyi wa kabiri utsinze igitego mu mikino irindwi yikurikiranya, byaherukaga gukorwa na Cristiano Ronaldo mu 2008. Pep Guardiola atsindwa umukino wa 500 yatozaga kuva yatangira gukora aka kazi.

Nyuma yo gutsinda umukino, Manchester United yahise irushwa inota rimwe na Manchester City zikurikiranye ku rutonde rwa Shampiyona y’u Bwongereza.

Urutonde rw’iyi Shampiyona ruyobowe na Arsenal ifite amanota 44 nubwo igifite umukino izahuramo na Tottenham ku Cyumweru, igakurikirwa na Manchester City ifite 39 ndetse na Manchester United ifite 38.

Tyrell Malacia yitwaye neza mu bwugarizi
Marcus Rashford na Bruno Fernandez bafatanyije kubona intsinzi ya Manchester United FC
Bruno Fernandes ni we watsinze igitego cya mbere
Abafana ba Manchester United bishimiye gutsinda mukeba
Erik Ten Hag yishimiye gutsinda Manchester City yari yamwandagaje mu mikino ibanza
Pep Guardiola yatsinzwe ari gutoza umukino we wa 500

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .