Manchester United yanyagiye Chelsea, Arsenal yikura kwa Newcastle United

Yanditswe na Eric Tony Ukurikiyimfura
Kuya 12 Kanama 2019 saa 10:23
Yasuwe :
0 0

Manchester United yatangiye neza shampiyona ya 2019/20 mu Bwongereza, inyagira Chelsea ibitego 4-0 mu mukino w’umunsi wa mbere wabereye kuri Old Trafford kuri iki Cyumweru.

Ikipe yari mu rugo yakinishije ubusatirizi buyobowe na Marcus Rashford na Anthony Martial mu gihe Harry Maguire uherutse kugurwa muri Leicester City kuri miliyoni £80, yabanje mu mutima wa ba myugariro afatanya na Victor Lindelof.

Wari umukino wa mbere ku mutoza wa Chelsea, Frank Lampard witabaje ikipe itarimo N’Golo Kanté wabanje hanze kubera imvune y’ivi amaranye iminsi mu gihe Willian, Ruben Loftus-Cheek, Antonio Rüdiger na Callum Hudson-Odoi bavunitse, bose batari mu bakinnyi 18 b’umukino.

Chelsea ni yo yatangiye umukino iri hejuru, ibura amahirwe yo gufungura amazamu ku munota wa kane ubwo ishoti rikomeye ryatewe na Tammy Abraham ryafataga izamu, rikerekeza ku rundi ruhande.

Manchester United yafunguye amazamu ku munota wa 18 w’umukino ku gitego cyatsinzwe na Marcus Rashford kuri penaliti ubwo yari amaze kugushwa mu rubuga rw’amahina na Kurt Zouma ndetse icyemezo cyafashwe n’umusufuzi Anthony Taylor gishimangirwa n’Ikoranabuhanga ry’amashusho ryifashishwa mu misifurire (VAR) ryatangiye gukoreshwa muri Premier League uyu mwaka.

Chelsea yongeye gusatira Manchester United mu minota ya nyuma y’igice cya kabiri cy’umukino, ibona uburyo bubiri burimo umupira wakuwemo na kapiteni wa Manchester United, David De Gea mu gihe undi watewe na Emmerson wakubise umutambiko w’izamu ugasubira inyuma.

Christian Pulisic yinjiye mu kibuga ku ruhande rwa Chelsea ubwo yasimburaga Ross Barkley ku munota wa 58 mbere y’uko Manchester United itsinda igitego cya kabiri cyinjijwe na Anthony Martial ku munota wa 64 ubwo yakozaga ikirenge ku mupira wahinduwe na Andreas Perreira.

Nyuma y’iminota ibiri, Marcus Rashford yacomekewe umupira na Paul Pogba, asiga kapiteni wa Chelsea Cesar Azpilicueta, atsinda igitego cya gatatu.

Daniel James winjiye mu kibuga ku munota wa 73 asimbuye Perreira, ni we watsinze igitego cya kane habura iminota 10 ngo umukino irangire, kiba icya mbere atsindiye ikipe ye mu mukino we wa mbere nyuma yo kugurwa muri Swansea City mu mpeshyi.

Mu yindi mikino yabaye yabaye kuri iki Cyumweru, Arsenal yatsindiye Newcastle United iwayo igitego 1-0 cya Pierre-Emerick Aubameyang mu gice cya kabiri cy’umukino ku mupira yahawe na Ainsley Maitland-Niles.

Nicolas Pépé uherutse kuba umukinnyi uhenze mu mateka ya Arsenal, yinjiye mu kibuga ku munota wa 71, asimbura Reiss Nelson mu gihe Dani Ceballos we yari yinjiye ku wa 64 asimbuye Joe Willock.

Uko amakipe yatsindanye ku munsi wa Mbere muri Premier League:

Ku Cyumweru, tariki ya 11 Kanama 2019

  • Newcastle United 0-1 Arsenal
  • Leicester City 0-0 Wolves
  • Manchester United 4-0 Chelsea

Ku wa Gatandatu, tariki ya 10 Kanama 2019

  • West Ham 0-5 Manchester City
  • Bournemouth 1-1 Sheffield United
  • Burnley 3-0 Southampton
  • Crystal Palace 0-0 Everton
  • Watford 0-3 Brighton
  • Tottenham 3-1 Aston Villa

Ku wa Gatanu, tariki ya 9 Kanama 2019

  • Liverpool 4-1 Norwich City
Kurt Zouma yakiniye nabi Rashford mu rubuga rw'amahina, umusifuzi Anthony Taylor atanga penaliti
Rashford atsinda igitego cya mbere kuri penaliti

>

Anthony Martial atsinda igitego cya kabiri ku mupira wahinduwe na Perreira
Marcus Rashford yatsinze ibitego bibiri muri uyu mukino
Daniel James atsinda igitego cya kane ku mupira yahawe na Paul Pogba
Daniel James yishimira igitego cye cya mbere mu mukino wa mbere w'irushanwa
Ishoti rikomeye ryatewe na Emmerson Palmeiri ryagaruwe n'umutambiko w'izamu
Tammy Abraham yahushije uburyo bwiza mu minota ya mbere
Harry Maguire yakiniye Manchester United umukino wa mbere nyuma y'iminsi itandatu aguzwe
Frank Lampard yatangiye nabi muri Premier League
David De Gea wahawe igitambaro cya Manchester United mu gihe Young atakinnye, yagoye Chelsea muri uyu mukino
Christian Pulisic yinjiye mu kibuga mu gice cay kabiri ubwo yasimburaga Ross Barkley

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza