Manchester United vs Arsenal: Amakuru avugwa mu makipe yombi mbere y’umukino

Yanditswe na Eric Tony Ukurikiyimfura
Kuya 1 Ugushyingo 2020 saa 09:02
Yasuwe :
0 0

Ku mugoroba wo kuri iki Cyumweru hateganyijwe umukino w’umunsi wa karindwi wa Shampiyona y’Icyiciro cya Mbere mu Bwongereza, Manchester United yakiramo Arsenal kuri Old Trafford, saa Kumi n’Ebyiri n’iminota 30.

Amakipe yombi agiye guhura nyuma yo kwitwara neza hagati muri iki cyumweru, aho Manchester United yanyagiye RB Leipzig ibitego 5-0 muri UEFA Champions League mu gihe Arsenal yo yatsinze Dundalk ibitego 3-0 muri Europa League.

Manchester United iri bwakire uyu mukino imaze igihe ititwara neza mu rugo mu mikino ya Shampiyona ndetse iri ku mwanya wa 15 n’amanota arindwi mu mikino itanu imaze gukina, aho yanganyije na Chelsea ubusa ku busa mu mukino uheruka.

Arsenal na yo yagaragaje kudahozaho muri Shampiyona y’uyu mwaka, aho yatsinzwe imikino itatu, itsinda indi itatu muri itandatu imaze gukina kugeza ubu. Imikino ibiri iheruka, yayitakaje imbere ya Leicester City na Manchester City.

Manchester United irakina idafite myugariro wayo mushya ukina ibumoso, Alex Telles, ukiri mu kato nyuma yo kwandura COVID-19, bivuze ko Luke Shaw aza gutangira kuri uyu mwanya, iruhande rwa Harry Maguire, Victor Lindelof na Aaron Wan-Bissaka.

Eric Bailly aracyari hanze kubera imvune kimwe na Jesse Lingard, nubwo uyu yasubukuye imyitozo. Anthony Martial arasoza ibihano by’imikino itatu kuri iki Cyumweru, nyuma yo guhabwa ikarita itukura ubwo Manchester United yanyagirwaga na Tottenham ibitego 6-1.

Byitezwe ko Bruno Fernandes agaruka mu babanzamo nyuma yo kuruhutswa hagati mu cyumweru, hagakina Donny van de Beek.

Arsenal iraba idafite myugariro wo hagati, David Luiz wagize ikibazo cy’imitsi, mu gihe Rob Holding, Calum Chambers, Gabriel Martinelli na Pablo Marí bakiri hanze kubera imvune.

Umutoza Mikel Arteta aragarura abakinnyi bakomeye barimo Bernd Leno, Gabriel, Héctor Bellerín, Kieran Tierney, Thomas Partey, Pierre-Emerick Aubameyang na Alexandre Lacazette, bose bari baruhukijwe ku mukino wa Europa League wabaye ku wa Kane.

Arsenal yizeye kongera kwitwara neza imbere ya Manchester United nyuma yo gutsinda imikino itatu muri ine iheruka guhuza amakipe yombi, akanganya umwe.

Ubwo Arsenal yaherukaga kumara igihe kirekire idatsindwa na Manchester United ni hagati ya 1989 na 1992 ubwo yamaraga imikino itanu.

Natsinda umukino wo kuri iki Cyumweru, Mikel Arteta araba umutoza wa kabiri wa Arsenal utsinze imikino ibiri ibanza ahuyemo na Manchester United, nyuma ya Herbert Chapman wabikoze mu mwaka w’imikino wa 1925/1926.

Mu mikino 232 imaze guhuza amakipe yombi muri Premier League, Manchester United yatsinzemo 97, Arsenal itsinda 83, zinganya inshuro 52.

Umukino wo kuri iki Cyumweru urayoborwa n’umusifuzi Mike Dean.

Mu mikino yabaye ku wa Gatandatu muri Premier League, Liverpool yafashe umwanya wa mbere n’amanota 16 nyuma yo gutsinda West Ham United ibitego 2-1.

Manchester City yatsinze Sheffield United igitego 1-0, igira amanota 11 n’umukino w’ikirarane mu gihe Chelsea yagize amanota 12 nyuma yo gutsinda Burnely ibitego 3-0.

Manchester United na Arsenal zongeye guhurira kuri Old Trafford, nyuma yo kuhanganyiriza igitego 1-1 mu mwaka ushize w'imikino
Manchester United ntiratsindira mu rugo muri Shampiyona y'uyu mwaka
Arsenal iraba yagaruye abakinnyi bayo bakomeye barimo Lacazette na Aubameyang, baruhukijwe ku wa Kane
Umusifuzi Mike Dean ni we uyobora umukino wo kuri iki Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .