Manchester United na Arsenal zaragayitse, Ronaldo akora amateka- Ibyaranze impera z’icyumweru i Burayi

Yanditswe na Eric Tony Ukurikiyimfura
Kuya 22 Mata 2019 saa 11:26
Yasuwe :
0 0

Impera z’icyumweru twasoje, zaranzwe no kwegukana ibikombe bya shampiyona mu Butaliyani no mu Bufaransa. Manchester United na Arsenal zikomeje gupfusha ubusa amahirwe yo kwizera ‘Big Four’ mu gihe Cristiano Ronaldo yabaye umukinnyi wa mbere wegukanye shampiyona ya Seria A, La Liga na Premier League.

Manchester United yaranyagiwe, Arsenal yirangaraho

Ese Manchester United yaba yarihuse mu gufata icyemezo cyo kwemeza Ole Gunnar Solskjaer nk’umutoza mukuru? Iyi kipe ikomeje kugira ibihe bibi kuko kuri iki Cyumweru yanyagiwe na Everton ibitego 4-0 ikomeza gutera umugongo amahirwe yo kuza mu makipe ane ya mbere.

Manchester United kuri ubu iri ku mwanya wa gatandatu n’amanota 64. Nyuma y’uyu mukino, umutoza wayo Ole Gunnar Solskjaer yasabye imbabazi abafana, avuga ko buri kimwe cyose cyagenze nabi kuva umukino utangiye.
United imaze gutakaza imikino itandatu mu mikino umunani iheruka gukina mu marushanwa yose mu gihe ku wa Gatatu w’iki cyumweru izakira Manchester City.

Undi mukino w’umunsi wa 34 wa Premier League wabaye kuri iki Cyumweru, Arsenal na yo yananiwe gusiga amakipe bahanganiye kuza muri ane ya mbere, itsindirwa mu rugo na Crystal Palace ibitego 3-2.

Arsenal yagumye ku mwanya wa kane n’amanota 66, aho irushwa inota rimwe na Tottenham yatsinzwe na Manchester City igitego 1-0 ku wa Gatandatu.

Chelsea ishobora kurara ku mwanya wa gatatu n’amanota 69 mu gihe yabasha gutsinda Burnley mu mukino wayo wa 35 iza gukina kuri uyu wa Mbere guhera saa 21:00.

Liverpool yatsinze Cardiff City igitego 2-0, ikomeje kuyobora Premier League n’amanota 88 mu mikino 35 mu gihe Manchester City ifite amanota 86 ku mwanya wa kabiri mu mikino 34.

Paris Saint-Germain yegukanye shampiyona y’u Bufaransa bazirikana Cathédrale Notre-Dame de Paris

Nyuma yo gukina imikino itatu iheruka, ikananirwa kubonamo amanota yasabwaga ngo yegukane shampiyona, Paris Saint-Germain yaraye ibigezeho nyuma yo gutsinda AS Monaco ibitego 3-1 mu mukino w’umunsi wa 33 wa shampiyona.

Kylian Mbappé yatsinze ibi bitego byose bya Paris Saint-Germain yatwaye igikombe habura imikino itanu ngo shampiyona irangire.

Muri uyu mukino, abakinnyi ba PSG bari bambaye imyambaro ishushanyijeho Cathédrale Notre-Dame de Paris ndetse n’ahandikwa amazina yabo handitseho ‘Notre-Dame’. Iyi kiliziya iherutse gufatwa n’inkongi y’umuriro, aho kuri ubu hakusanywa inkunga yo kuyisana.

Kylian Mbappé yatsinze ibitego bitatu, Neymar agaruka mu kibuga PSG itwara shampiyona

Iki cyabaye igikombe cya gatandatu cya shampiyona PSG yegukanye mu myaka irindwi, aho ishobora no kwegukana igikombe cy’igihugu ku wa Gatandatu w’iki cyumweru ubwo izaba ihura na Stade Rennais.

Kylian Mbappé wifuzwa na Real Madrid, yemeje ko azaguma muri PSG mu gihe uyu mukino wagaragayemo Neymar wari umaze iminsi myinshi yaravunitse.

Juventus yegukanye igikombe, Cristiano Ronaldo yandika amateka

Ku wa Gatandatu, Juventus yegukanye shampiyona y’u Butaliyani, Seria A, ku nshuro ya munani yikurikiranya nyuma yo gutsinda Fiorentina ibitego 2-1.

Shampiyona y’u Butaliyani irabura imikino itanu ngo igere ku musozo.
Cristiano Ronaldo yakoze amateka yo kuba umukinnyi wa mbere utwaye Seria A, La Liga na Premier League. Abandi bakinnyi bakomeye bakinnye muri izi shampiyona zose ni Thierry Henry, Laurent Blanc na Zlatan Ibrahimović ariko ntibyabakundiye kuzitwaramo ibikombe bya shampiyona uko ari eshatu.

Juventus yegukanye shampiyona ya munani, Ronaldo akora amateka yo kuba umukinnyi wa mbere utwaye Serie A, La Liga na Premier League

Bayern Munich na Borussia Dortmund zikomeje urugamba rugana ku gikombe

Muri shampiyona y’u Budage, Bayern Munich yatsinze Werder Bremen igitego 1-0 ku wa Gatandatu ikomeza kuyobora shampiyona n’amanota 70. Bukeye bwabo, Borussia Dortmund na yo yatsinze Freiburg ibitego 4-0, igira amanota 69 mu gihe habura imikino ine ngo iyi shampiyona irangire.

La Liga: Amakipe akomeye yose yitwaye neza

Barcelone ikomeje gusatira igikombe cya shampiyona ya Espagne nyuma yo gutsinda Real Sociedad ibitego 2-1 ku wa Gatandatu, aho kuri ubu ifite amanota 77 mu mikino 33 imaze gukinwa.

Atlético Madrid yabashije gukura amanota atatu ku kibuga cya Eibar itsinze igitego 1-0 ifite amanota 68 mu gihe Real Madrid yagize amanota 64 nyuma yo gutsinda Atletic Bilbao ibitego 3-0 bya Karim Benzema mu mukino wabaye kuri iki Cyumweru.

Crystal Palace yaraye itsindiye Arsenal iwayo
Liverpool ikomeje gushaka igikombe cya Premier League iheruka mu 1990
Manchester United yandagajwe na Everton inyagiwe ibitego 4-0
Ole Gunnar Solskjaer asaba imbabazi abafana bari bahereje ikipe ku kibuga cya Everton

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza