Manchester City yakuriweho ibihano byo kudakina UEFA Champions League

Yanditswe na Eric Tony Ukurikiyimfura
Kuya 13 Nyakanga 2020 saa 11:38
Yasuwe :
0 0

Manchester City yatsinze ubujurire yakoze ku bihano yari yahawe byo kumara imyaka ibiri y’imikino idakina amarushanwa y’i Burayi, arimo UEFA Champions League.

Mu gitondo cyo kuri uyu wa Mbere, Urukiko rwa Siporo ku Isi (CAS/TAS) rwatangaje ko iyi kipe yahanaguweho "guhisha amafaranga yinjije mu bafatanyabikorwa."

Muri Gashyantare nibwo akanama kigenga gashinjwe gukurikirana ibijyanye n’umutungo w’amakipe muri UEFA (CFCB) kari kafatiye ibihano Manchester kubera kurenga ku mabwiriza ya Financial Fair Play (FFP) hagati ya 2012 na 2016.

CAS yemeje ko iyi kipe yari yaciwe miliyoni 30€, izishyura miliyoni 10€ mu gihe kitarenze iminsi 30 uhereye uyu munsi hatangajwe imyanzuro.

Manchester City yaciwe aya mafaranga kubera ko "yananiwe gukorana n’ubuyobozi bwa UEFA" kugira ngo ikibazo gikemuke.

Iyi kipe yatangaje ko yishimiye umwanzuro wa CAS ndetse yashimiye abari bagize akanama kasuzumye ubujurire bwayo.

Byari byagenze gute kugira ngo Manchester City ifatirwe ibihano?

Mu Ukuboza 2018 nibwo UEFA yatangije iperereza kuri Manchester City ishinjwa kwica nkana amategeko y’umutungo mu bikorwa by’amakipe azwi nka Financial Fair Play.

Akanama kigenga gashinjwe gukurikirana ibijyanye n’umutungo w’amakipe (CFCB), katangaje ko Manchester City “yabeshye amafaranga yinjije muri raporo yahaye UEFA hagati ya 2012 na 2016” ndetse ntiyorohereze aka kanama mu iperereza.

UEFA yatangije iperereza kuri Manchester City nyuma y’impapuro zagaragajwe n’ikinyamakuru Der Spiegel cyo mu Budage mu Ugushyingo 2018, zigaragaza ko Manchester City yabeshye amafaranga yabonye binyuze mu baterankunga yungutse.

Mu 2014, Manchester City yari yaciwe miliyoni £50 bitewe no kwica aya mabwiriza.

Financial Fair Play (FFP), ni amategeko yashyizweho na UEFA mu 2009 mu rwego kurinda amakipe ari mu marushanwa yayo gutakaza amafaranga arenze ubushobozi bwayo, harebwe ku yinjizwa.

Muri aya mategeko, amafaranga yose ikipe yinjije n’ayo yatanze mu bikorwa bitandukanye aba agomba kumenyekanishwa ndetse amakipe agakora ku buryo ajya kungana.

Hagiye gukurikiraho iki ku ruhande rwa Manchester City?

Manchester City iracyari muri UEFA Champions League y’uyu mwaka w’imikino wa 2019/20, aho izakina na Real Madrid mu mukino wo kwishyura wa 1/8 uzaba mu ntangiriro za Kamena. Umukino ubanza wabereye muri Espagne muri mpera za Gashyantare, warangiye Manchester City itsinze ibitego 2-1.

Iyi kipe kuri ubu iri ku mwanya wa kabiri muri Premier League, bivuze ko izakina UEFA Champions League y’umwaka utaha w’imikino wa 2020/21.

Manchester City yakuriweho ibihano byo kudakina UEFA Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .