Manchester City FC yahagaritswe imyaka ibiri muri UEFA Champions League

Yanditswe na Eric Tony Ukurikiyimfura
Kuya 15 Gashyantare 2020 saa 10:53
Yasuwe :
0 0

Impuzamashyirahamwe y’Umupira w’Amaguru i Burayi, UEFA, yafatiye Manchester City FC yo mu Bwongereza ibihano byo kutitabira irushanwa rya Champions League mu myaka ibiri iri imbere, kubera ko yarenze ku mategeko agenga amakipe i Burayi mu bijyanye n’umutungo (Financial Fair Play Rules).

Manchester City ifite Igikombe cya Shampiyona y’u Bwongereza giheruka, yaciwe kandi amande ya miliyoni 25 y’ama-pound.

Ubuyobozi bw’iyi kipe bwatangaje ko bwatunguwe n’iki cyemezo cya UEFA ndetse bwiteguye kujurira mu Rukiko Nkemurampaka rwa Siporo (CAS).

Mu Ukuboza 2018 nibwo UEFA yatangije iperereza kuri Manchester City ishinjwa kwica nkana amategeko y’umutungo mu bikorwa by’amakipe azwi nka Financial Fair Play.

Akanama kigenga gashinjwe gukurikirana ibijyanye n’umutungo w’amakipe (CFCB), katangaje ko Manchester City “yabeshye amafaranga yinjije muri raporo yahaye UEFA hagati ya 2012 na 2016” ndetse ntiyorohereze aka kanama mu iperereza.

UEFA yatangije iperereza kuri Manchester City nyuma y’impapuro zagaragajwe n’ikinyamakuru Der Spiegel cyo mu Budage mu Ugushyingo 2018, zigaragaza ko Manchester City yabeshye amafaranga yabonye binyuze mu baterankunga yungutse.

Mu 2014, Manchester City yari yaciwe miliyoni £50 bitewe no kwica aya mabwiriza.

Financial Fair Play (FFP), ni amategeko yashyizweho na UEFA mu 2009 mu rwego kurinda amakipe ari mu marushanwa yayo gutakaza amafaranga arenze ubushobozi bwayo, harebwe ku yinjizwa.

Muri aya mategeko, amafaranga yose ikipe yinjije n’ayo yatanze mu bikorwa bitandukanye aba agomba kumenyekanishwa ndetse amakipe agakora ku buryo ajya kungana.

Bivugwa ko kandi Manchester City ishobora guhanishwa gukurwaho amanota muri Premier League kuko amategeko ya Financial Fair Play muri Shampiyona ari amwe nubwo adahura neza n’aya UEFA.

Ibi bihano birareba gusa ikipe y’abagabo ya Manchester City.

Iyi kipe iheruka gutombora Real Madrid muri 1/8 cya UEFA Champions League y’uyu mwaka, aho umukino ubanza uzabera muri Espagne tariki ya 26 Gashyantare 2020.

Mu gihe ibihano bya Manchester City byakwemezwa nyuma y’ubujurire, muri UEFA Champions League itaha, ishobora gusimbuzwa ikipe yaza ku mwanya wa hafi muri Shampiyona y’u Bwongereza nk’uko amategeko ya UEFA abiteganya.

Manchester City ifite igikombe cya Premier League yahagaritswe imyaka ibiri muri UEFA Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .