Iperereza ryakozwe na komisiyo yigenga mu gihe cy’imyaka ine, ni ryo ryagaragaje amakosa yakozwe na Manchester City yarenze ku mategeko hagati 2009 na 2018.

Iyi komisiyo yashinje kandi Manchester City ko itigeze iyorohereza mu mikoranire kuva iperereza ritangiye mu Ukuboza 2018.

Mu mwaka ushize w’imikino, iyi kipe yatwaye igikombe cya gatandatu cya Premier League kuva mu 2008 ubwo yagurwaga na Sosiyete ya Abu Dhabi United Group.

Iyi komisiyo ishobora gushyiraho ibihano birimo gucibwa amande, gukurwaho amanota no kwirukana ikipe muri Premier League.

Itangazo ryashyizwe hanze na Premier League rivuga Manchester City ko yarenze ku mategeko ayisaba kugaragaza “amakuru nyayo y’umutungo yerekana neza uko ubukungu bwayo buhagaze”.

Ayo makuru yari akenewe ni ayerekeye uburyo iyi kipe yinjiza, amafaranga ikura mu baterankunga n’ayo ikoresha mu bikorwa byayo.

Ibindi ishinjwa yarenzeho ni amategeko asaba ikipe kugaragaza uburyo yahembye abatoza bayo kuva mu mwaka w’imikino wa 2009/10 kugeza mu wa 2012/13 ubwo yatozwaga na Roberto Mancini. Hari kandi n’uburyo yishyuye abakinnyi hagati ya 2010/11 na 2015/16.

Premier League yashimangiye kandi ko City yarenze ku mategeko afitanye isano n’aya UEFA arimo agena ikoreshwa ry’umutungo rinoze mu makipe (FFP) hagati y’umwaka w’imikino 2013/14 na 2017/18 ndetse n’aya Premier league agaragaza uburyo ikipe yunguka ikanashora hagati ya 2015/16 na 2017/18.

Kuri ubu, iyi kipe iri ku mwanya wa kabiri muri Premier League n’amanota 45, irushwa atanu na Arsenal ya mbere.

Mu 2020, Impuzamashyirahamwe y’Umupira w’Amaguru i Burayi (UEFA) yavuze ko City yarenze ku mategeko agena ikoreshwa ry’umutungo mu makipe hagati ya 2012 na 2016.

Gusa, ibihano yari yashyiriweho byo guhagarikwa imyaka ibiri mu marushanwa ya UEFA byakuweho n’Urukiko rwa Siporo ku Isi (CAS) mu mpera z’umwaka ushize.

Financial Fair Play (FFP), ni amategeko yashyizweho na UEFA mu 2009 mu rwego kurinda amakipe ari mu marushanwa yayo gutakaza amafaranga arenze ubushobozi bwayo, harebwe ku yinjizwa.

Muri aya mategeko, amafaranga yose ikipe yinjije n’ayo yatanze mu bikorwa bitandukanye aba agomba kumenyekanishwa ndetse amakipe agakora ku buryo ajya kungana.

Manchester City ishobora gukurwaho amanota cyangwa igakurwa muri Premier League kubera kudatanga amakuru ku ikoreshwa ry'umutungo wayo

Manchester City yegukanye ibikombe bitatu bya Premier League ubwo hakorwaga iperereza