00:00:00 IGIHE NETWORK KN KINYARWANDA EN ENGLISH FR FRANCAIS

Luvumbu ntazifashishwa ku mukino wa Rayon Sports na Musanze FC

Yanditswe na Ntare Julius
Kuya 23 Mutarama 2023 saa 10:04
Yasuwe :

Umunye-Congo Luvumbu Nzinga Héritier ntazifashishwa mu mukino w’Umunsi wa 16 wa Shampiyona Rayon Sports izakiramo Musanze FC kuri Stade ya Muhanga tariki 24 Mutarama 2023, kubera ikibazo cy’ideni ry’umutoza batandukanye.

Luvumbu ni umwe mu bakinnyi bahanzwe amaso nk’abazafasha Rayon Sports mu rugendo rwo kwegukana igikombe. Yasinyiye iyi kipe tariki 31 Ukuboza 2022.

Nubwo amaze ibyumweru bisaga bitatu ayigezemo, Luvumbu ntarandikishwa nk’umukinnyi wa Rayon Sports kugira ngo yifashishwe mu mikino ya Shampiyona.

Ideni ry’Umutoza Ferreira Faria Paulo Daniel wari wungirije Umunya-Portugal Silva Paixão Santos utarishyurwa ni we ugiye gutuma uyu mukinnyi atagaragara muri uyu mukino.

Rayon Sports ifitiye umutoza Faria ideni rya miliyoni 3.5 Frw. Uyu mutoza yayireze mu Ishyirahamwe ry’Umupira w’Amaguru ku Isi, FIFA, na yo itegeka Murera kwishyura ariko igihe yishyurwaga amafaranga yoherejwe kuri konti ye ya banki yo muri Portugal atagikoresha.

Ubwo Ubuyobozi bwa Rayon Sports bwamumenyeshaga ko yamwishyuye kuri konti yo muri Portugal, uyu mutoza yababwiye ko atakiyikoresha. Byabaye ngombwa ko bohereza andi miliyoni 3.5 Frw kuri konti ye yo muri Koweït, gusa kugeza na n’ubu umutoza ntaramenyesha iyi kipe ko yayabonye.

Kugira ngo Rayon Sports yemererwe kwandikisha abakinnyi ni uko Umutoza Ferreira Faria Paulo Daniel yandikira FIFA ayimenyesha ko yishyuwe hanyuma na yo igakomorera iyi kipe kukwandikisha abakinnyi.

Rayon Sports kandi iracyari mu rubanza n’uwahoze ari umutoza wayo Jorge Manuel da Silva Paixão Santos.

Uyu mutoza wari watsinze iyi kipe ntiyanyuzwe n’imyanzuro y’urubanza, byabaye ngombwa ko ijurira yohereza ubwiregure bwayo ikaba itegereje ko FIFA yayisubiza imyanzuro ntakuka y’urubanza.

Usibye Luvumbu udafite ibyangombwa bimwemerera gukina, Rayon Sports izakira Musanze idafite abakinnyi bayo igenderaho barimo ba myugariro Rwatubyaye Abdoul na Ndizeye Samuel; Olise Osalue Raphael na Mbirizi Eric bakina mu kibuga hagati na Rutahizamu ukomoka muri Cameroun, Onana Willy Essomba Leandre.

Héritier Luvumbu yasinye amezi atandatu nyuma yo gusubira muri Rayon Sports ku nshuro ya kabiri. Uyu Munye-Congo ntarabona uburenganzira bumwemerera gukinira iyi Kipe yaboneye izuba i Nyanza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .