Liverpool FC yegukanye iki gikombe ku mugoroba wo ku Cyumweru, tariki ya 27 Mata 2025, mu mukino w’Umunsi wa 34 wa English Premier League mu gihe hasigaye imikino ine ngo irangire.

Liverpool yabanjwe igitego cyatsinzwe na Dominic Solanke ku munota wa 12, nyuma y’iminota ine gusa Luis Díaz ahita acyishyura mbere y’uko Alexis Mac Allister na Cody Gakpo bashyiramo ibindi igice cya mbere kitararangira.

Mu cya kabiri Mohamed Salah yakomeje kongera umubare w’ibitego ashyiramo icya kane, kikaba icya 28 yari yinjije muri uyu mwaka w’imikino gituma akomeza kuyobora abafite byinshi. Ku munota wa 69 myugariro wa Tottenham Hotspur, Destiny Udogie, yitsinze igitego cya gatanu.

Umukino warangiye ari ibitego 5-1, ibyishimo bitaha mu bakunzi ba Liverpool yaherukaga kwegukana iki gikombe mu myaka itanu ishize ariko nticyishimire neza kuko hari mu bihe by’icyorezo cya Covid-19.

Iyi kipe kandi yacyegukanye nyuma yuko ku wa Gatanu, Arsenal iyikurikiye ku rutonde rwa shampiyona, inaniwe kwikura imbere ya Crystal Palace bikanganya ibitego 2-2.

Bisobanuye ko Liverpool FC ifite amanota 82, nubwo yatsindwa imikino yose isigaye, Arsenal ifite amanota 67 ntiyakuramo ikinyuranyo cy’amanota iyirusha agera kuri 15.

Liverpool itozwa na Arne Slot wayigezemo mu mwaka ushize wa 2024, yegukanye igikombe nyuma yo gutsinda imikino 25, ikanganya irindwi mu gihe yatsinzwe ibiri gusa muri 34 imaze gukina.

Biteganyijwe ko iki gikombe Liverpool yegukanye izagishyikirizwa tariki ya 25 Gicurasi, ubwo izaba yahuye na Crystal Palace, dore ko ari bwo izaba yakiriye umukino wa nyuma muri uyu mwaka.

Igikombe cya Shampiyona y’u Bwongereza yaherukaga kugitwara mu mwaka w’imikino wa 2019/20, aho yasoje ifite amanota 99 ikurikiwe na Manchester City ifite 81.

Hashije imyaka 10 Liverpool iri mu bihe byiza, kuko mu mwaka w’imikino wa 2015/16 ari bwo yasoreje ku mwanya wa munani, indi myaka yose isoreza mu myanya iri hejuru y’uwa gatanu.

Wari umunsi w'amateka kuri Liverpool n'abakunzi bayo batuye mu mujyi wa Liverpool

Abafana bari benshi mu mihanda ya Liverpool mbere y'uko umukino utangira

Buri wese yifuzaga kubona Liverpool itwara igikombe nyuma y'imyaka itanu

Wari umunsi w'amateka utegerejwe na benshi mu bafana ba Liverpool

Liverpool yegukaniye igikombe ku kibuga cyayo cya Anfield

Abakinnyi ba Liverpool basohotse mu rwambariro bashagawe n'abafana

Liverpool yegukanye Igikombe cya Shampiyona y'u Bwongereza ku nshuro ya 20

Cody Gakpo yishimira igitego

Luis Díaz ni umwe mu bakinnyi bafashije cyane Liverpool kwegukana igikombe

Ni umukino binjiyemo bafite icyizere

Abakinnyi ba Liverpool begukanye igikombe habura imikino ine

Alexis Mac Allister na Luis Diaz bishimira igitego cya gatatu

Abafana ba Liverpool bari benshi kuri Anfield

Mohamed Salah yakomeje kuyobora abafite ibitgo byinshi muri Premier League

Abafana bari bategereje ikipe ari benshi nyuma yo kwegukana igikombe

Alexis Mac Allister yishimira igitego cye

Cody Gakpo yatsinze igitego cya kabiri, Liverpool iyobora umukino

Luis Díaz yishimira igitego cya mbere cya Liverpool

Liverpool yanyagiye Tottenham kugira ngo yegukane Igikombe cya Premier League

Luis Díaz yatsinze igitego gifasha Liverpool kugaruka mu mukino

Tottenham yabanje igitego ariko ntiyahirwa mu mukino

Tottenham yananiwe guhagarika Liverpool mu nzira igana ku gikombe

Tottenham yananiwe guhagarika Liverpool mu nzira igana ku gikombe

Mohamed Salah yinjije igitego ahita ajya kwishimana n'abafana