Liverpool iheruka kwegukana igikombe cya Premier League yandagajwe na Manchester City

Yanditswe na Eric Tony Ukurikiyimfura
Kuya 3 Nyakanga 2020 saa 07:40
Yasuwe :
0 0

Liverpool yatwaye Shampiyona y’Icyiciro cya Mbere mu Bwongereza ‘ Premier League’, yanyagiwe na Manchester City ibitego 4-0 mu mukino w’umunsi wa 32 wabereye kuri Etihad Stadium ku wa Kane.

Liverpool yakinnye uyu mukino nyuma y’icyumweru kimwe itwaye igikombe cya 19 cya shampiyona y’u Bwongereza yaherukaga mu myaka 30 ishize, yabanje gukomerwa amashyi na Manchester City yatwaye ibikombe bibiri biheruka.

Iminota 20 ya mbere yari itandukanye n’indi 80 ku ruhande rw’ikipe y’umutoza Jürgen Klopp, yabanje kwihagararaho, ikabona uburyo butandukanye burimo ubwa Firmino, Sadio Mané na Mohamed Salah, gusa imipira bateye ifatwa n’umunyezamu Ederson Moraes.

Manchester City yafunguye amazamu ku munota wa 24 kuri penaliti yinjijwe na Kevin De Bryune nyuma y’ikosa Joe Gomez yakoreye kuri Raheem Sterling mu rubuga rw’amahina mbere y’uko amakipe yombi afata akaruhuko ko kunywa amazi.

Guhera ubwo abakinnyi ba Liverpool bibuze mu mukino, basatirwa bikomeye na Manchester City yabonye igitego cya kabiri ku munota wa 34 gitsinzwe na Raheem Sterling ubwo ba myugariro ba Liverpool bananirwaga kumukuraho umupira.

Habura iminota mike ngo igice cya mbere kirangire, Kevin De Bryune yacomekeye umupira Phil Foden, asiga abakinnyi ba Liverpool, atsinda igitego cya gatatu.

Manchester City yatangiye igice cya kabiri n’ubundi iri hejuru, ihusha uburyo bw’umupira watewe na Sterling ujya hanze mu gihe na Jordan Henderson yarokoye ikipe ye ku mupira yakuye ku murongo w’izamu, wari utewe na Phil Foden.

Trent-Alexander Arnold na Mohamed Salah babonye amahirwe yo gutsindira Liverpool ku mipira y’imiterekano, bagorwa n’umunyezamu Ederson Moroes.

Manchester City yatsinze igitego cya kane ku munota wa 64, ku mupira wahinduwe na Raheem Sterling, unyuze ku munyezamu Alisson Becker uhura na Alex Oxlade-Chamberlain ujya mu izamu.

Wabaye umukino wa kabiri wa Shampiyona Liverpool yatsinzwe muri uyu mwaka w’imikino nyuma y’uwa Watford mu mpera za Gashyantare.

Iyi kipe yegukanye igikombe ifite amanota 86, iracyafite amahirwe yo kugeza ku manota 101 mu gihe yatsinda imikino itanu muri itandatu isigaye, igakuraho agahigo k’amanota 100 yagejejwe na Manchester City mu mwaka w’imikino wa 2017/18.

Undi mukino wabaye ku wa Kane, warangiye Sheffield United itsinze Tottenham ibitego 3-1.

Manchester City yabanje gukomera amashyi Liverpool yatwaye Premier League muri uyu mwaka w'imikino
Joe Gomez akorera ikosa kuri Raheem Sterling mu rubuga rw'amahina
Kevin De Bryune yafunguye amazamu kuri penaliti
Raheem Sterling wigaragaje muri uyu mukino, atsinda igitego cya kabiri cya Manchester City
Phil Foden yatsinze igitego cya gatatu cya Manchester City nyuma yo gusiga ba myugariro ba Liverpool
Trent-Alexander Arnold atera umupira w'umuterekano wabonetse ku ruhande rwa Liverpool
Manchester City yihanije Liverpool mu mukino wahuje amakipe yombi ku wa Kane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .