Lionel Messi yakuyeho agahigo ka Pelé

Yanditswe na Eric Tony Ukurikiyimfura
Kuya 23 Ukuboza 2020 saa 09:38
Yasuwe :
0 0

Lionel Messi yaraye atsinze igitego cya 644 akinira FC Barcelone mu mukino wa Shampiyona yatsinzemo Real Vallodolid ibitego 3-0, akuraho agahigo ka Pelé ko gutsinda ibitego byinshi mu ikipe imwe.

Messi w’imyaka 33, yatsinze igitego cya gatatu cya FC Barcelone muri uyu mukino ku mupira wari uhinduwe na Pedri, aroba umunyezamu Jordi Masip.

Uyu Munya-Argentine yagize kandi uruhare mu gitego cya mbere ubwo umupira yahinduye washyirwagaho umutwe na Clément Lenglet mu gihe yatangije uburyo bw’igitego cya kabiri byarangiye gitsinzwe na Martin Braithwaite.

Umunya-Brésil, Edson Arantes do Nascimento [Pelé], ni we wari umukinnyi watsindiye ikipe imwe ibitego byinshi kugeza mu cyumweru gishize, aho yatsinze ibitego 643 mu myaka 18 yakiniyemo Santos y’iwabo hagati ya 1956 na 1974.

Messi watsinze igitego cye cya mbere muri FC Barcelone mu 2005 ndetse akaba amaze gutwarana na yo ibikombe10 bya Shampiyona ya La Liga na bine bya Champions League, azasoza amasezerano ye mu mpeshyi, aho muri Mutarama ashobora gutangira kuvugana n’andi makipe.

Muri Kanama, yavuze ko ashaka kuva muri iyi kipe kubera ko mu masezerano ye harimo ingingo ibimwemerera, ariko ubuyobozi bwa FC Barcelone burabyanga, buvuga ko ikipe imushaka izishyura miliyoni 700€ yo kugura igihe gisigaye nk’uko biri mu byo impande zumvikanyeho mu 2017 ubwo yongeraga amasezerano.

Messi aherutse gutangaza ko kuba ibyo yifuje bitarakunze, byamugizeho ingaruka akagira intangiriro mbi z’umwaka w’imikino, ariko kuri ubu ameze neza.

Gutsinda uyu mukino byafashije FC Barcelone kujya ku mwanya wa gatanu, irushwa amanota umunani na Atlético Madrid ya mbere.

FC Barcelone yakabaye yatsinze ibitego byinshi muri uyu mukino ariko umunyezamu Masip wa Valladolid yakuyemo imipira myinshi ikomeye mu gihe Philippe Coutinho wasimbuye, yateye umupira wasubijwe inyuma n’igiti cy’izamu nk’uko byagenze no kuri Messi.

Lionel Messi yakuyeho agahigo ka Pelé ko gutsinda ibitego byinshi mu ikipe imwe
Messi yatsinze, anatanga umupira wavuyemo igitego cyatsinzwe na Clement Lenglet
Lionel Messi yishimira igitego cya 644 yatsinze muri FC Barcelone
Umunya-Brésil, Pelé, yatsinze ibitego 643 akinira Santos

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .