Lionel Messi yageze ku gahigo ka Pelé ko gutsinda ibitego byinshi mu ikipe imwe

Yanditswe na Eric Tony Ukurikiyimfura
Kuya 20 Ukuboza 2020 saa 08:23
Yasuwe :
0 0

Rutahizamu w’Umunya-Argentine ukinira FC Barcelone yo muri Espagne, Lionel Messi, yaraye ageze ku gahigo ka Pelé watsinze ibitego 643 mu ikipe imwe.

Messi yabigezeho ku wa Gatandatu ubwo yafashaga FC Barcelone kunganya na FC Valence ibitego 2-2 mu mukino w’umunsi wa 15 wa Shampiyona y’Icyiciro cya Mbere muri Espagne.

Uyu Munya-Argentine w’imyaka 33, yishyuriye FC Barcelone igitego cya mbere mu minota y’inyongera y’igice cya mbere ku mupira yatsindishije umutwe nyuma y’amasegonda make ahushije penaliti yakuwemo na Jaume Domenech.

Iki gitego cyafashije Messi kuzuza ibitego 643 akinira FC Barcelone mu mikino 747 mu gihe yatanze imipira 282 yavuyemo ibindi bitego kuri bagenzi be. Igitego cye cya mbere muri iyi kipe yagitsinze mu 2005 ku mukino wa Albacete.

Umunyabigwi ukomoka muri Brésil, Pelé, wakiniye Santos y’iwabo hagati ya 1956 na 1974, ni we wari umukinnyi rukumbi wanyeganyeje inshundura kenshi akinira ikipe imwe, aho yatsinze ibitego 643 mbere yo kwerekeza muri New York Cosmos.

Nyuma yo kuva muri Newell’s Old Boys akiri muto cyane, Messi amaze gutwarana na FC Barcelone ibikombe 24 birimo 10 bya Shampiyona ya La Liga na bine bya UEFA Champions League. Yatwaye kandi Ballon d’Or (atorwa nk’umukinnyi mwiza ku Isi) inshuro esheshatu.

Kunganya kwa FC Barcelone byatumye ijya ku mwanya wa gatanu n’amanota 21 mu mikino 13, irushwa umunani na Atlético Madrid ya mbere.

Mukeba wayo, Real Madrid, iri imbere ya Barcelone amanota atanu, irakina na Eibar kuri iki Cyumweru.

Lionel Messi yaraye ageze ku gahigo ka Pelé
Lionel Messi atsinda igitego n'umutwe ku wa Gatandatu
Umunya-Brésil, Pelé, yatsinze ibitego 643

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .