Kwizera Pierrot yatsinzwe igeragezwa muri Asante Kotoko yo muri Ghana

Yanditswe na IGIHE
Kuya 16 Mutarama 2020 saa 07:20
Yasuwe :
0 0

Umukinnyi wo hagati wa As Kigali, Kwizera Pierre wamamaye nka ‘Pierrot’ ari mu nzira agaruka mu Rwanda nyuma yo gutsindwa igeragezwa yakoreraga mu Ikipe ya Asante Kotoko Sporting Club yo muri Ghana.

Kwizera Pierrot yari amaze icyumweru mu igeragezwa mu Mujyi wa Kumasi ariko ntiyahiriwe kuko atashoboye kwemeza umutoza w’Ikipe ya Asante Kotoko wamwifuzaga.

Uyu murundi w’imyaka 28 mu myitozo yari yagiye yitwara neza cyane binyuze mu gutera imipira y’imiterekano.

Kwizera yagiye muri Ghana bivugwa ko yaturutse muri Rayon Sports, yerekeje muri iyi kipe ikinira kuri Baba Yara Stadium mu gace ka Ashanti nyuma yo kubengukwa n’umutoza wayo Maxwell Konadu, wari wavuze ko agomba kubanza gukora igeragezwa akabona gusinya amasezerano y’igihe kirekire.

Asante Kotoko yafashe icyemezo cyo kubanza gutanga igerageza ku bakinnyi bashya nyuma yo gusesa amasezerano yari ifitanye na George Abege na Alexis Didi Arnaud batishimiwe umusaruro.

Kwizera Pierrot wigeze gukinira Rayon Sports ndetse akanayibera kapiteni yasinyiye AS Kigali ku wa 23 Nzeri 2019. Ni umwe mu bakinnyi As Kigali yari yateganyije gukoresha mu mwaka wa shampiyona gusa nta mukino numwe arayikinira kubera imvune.

Funclub.rw yanditse ko AS Kigali yari yatangaje ko yahaye Pierrot uruhushya kuko iyo aza kugurwa yari buboneho 50% by’amafaranga yari gutangwaho.

Kwizera Pierrot yagiriye imvune mu Ikipe y’Igihugu y’u Burundi hakinwa imikino y’ijonjora ry’ibanze ryo gushaka itike y’Igikombe cy’Isi cya 2022.

Uyu Murundi yakiniye Rayon Sports imyaka itatu n’igice; yageze muri Gikundiro muri Mutarama 2015 ku masezerano y’umwaka umwe n’igice mu gihe mu mpeshyi ya 2016 yasinye indi myaka ibiri. Yabaye umukinnyi w’Umwaka mu Rwanda mu myaka ibiri ya nyuma akinira Rayon Sports.

Muri Kanama 2018 ni bwo uyu mukinnyi yerekeje muri Al Oruba Sports Club yo muri Oman muri Aziya nyuma y’uko amasezerano ye yari arangiye muri Rayon Sports.

Kwizera Pierrot yasinyiye AS Kigali ariko ntarayikinira kuva Shampiyona y'u Rwanda yatangira
Kwizera Pierrot (iburyo) ni umwe mu bakinnyi bari bitezwe muri iyi Shampiyona nyuma yo kuyivamo ari ku rwego rwo hejuru. Yatangiye imyitozo mu Ukwakira 2019 nyuma y'igihe afite imvune
Kwizera Pierrot yatsinzwe igeragezwa muri Asante Kotoko yo muri Ghana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza