00:00:00 IGIHE NETWORK KN KINYARWANDA EN ENGLISH FR FRANCAIS

Kuva kuri Gatete kugera kuri Bokota, hatahiwe Luvumbu: Rayon Sports ntihirwa n’abayigarutsemo

Yanditswe na Eric Tony Ukurikiyimfura
Kuya 23 Mutarama 2023 saa 11:36
Yasuwe :

Amaso y’abakunzi ba Rayon Sports uyu munsi ahanzwe Umunye-Congo, Nzinga Héritier Luvumbu, uherutse gusinya amasezerano y’amezi atandatu muri iyi kipe yagarutsemo ku nshuro ya kabiri.

Luvumbu w’imyaka 30 ku byangombwa akiniraho, yagarutse muri Murera yigeze gukinira amezi abiri; muri Gicurasi na Kamena 2021 mbere y’uko yerekeza muri Angola.

Rayon Sports ni ikipe kuri ubu abakunzi bayo bamwe basa n’abamaze gutera icyizere ku bijyanye no guhatanira ibikombe, ariko na none icyo cyizere ntikibure kubera izina ryayo rikomeye nubwo mu myaka itatu ishize byarangiraga amaso aheze mu kirere.

Iyi kipe yambara ubururu n’umweru yatangiye uyu mwaka w’imikino intego ari igikombe nk’uko mu mwaka ushize Perezida wayo, Uwayezu Jean Fidèle yari yijeje Aba-Rayons gutwara bibiri birimo icya Shampiyona n’icy’Amahiro.

Nyuma y’imikino itandatu ibanza, Murera yari ihagaze bwumva, ari yo kipe rukumbi yari itaratakaza inota muri Shampiyona kuko yari iyoboye urutonde rw’agateganyo n’amanota 18 kuri 18.

Kwiyongera kw’imvune muri iyi kipe, gutenguhwa n’abaguzwe baravunitse abandi batari ku rwego bifuzwagaho, byatumye umusaruro utangira kugabanuka nka ya nkoni y’umwana ishira dondidondi, imikino icyenda yakurikiyeho irangira habonetsemo amanota 10 gusa.

Ikipe yari iya mbere yisanze ku mwanya wa gatanu n’amanota 28 nubwo ikinyuranyo hagati yayo n’iya mbere cyari amanota abiri, ariko uzi uko umupira w’amaguru ukinwa, yahitaga yumva ko “uwahabwaga Igikombe cya Shampiyona, atangiye kuberereka” cyangwa ashobora kutoroherwa muri uyu mwaka w’imikino.

Nyuma yo gutsindwa imikino itatu yikurikiranya yahuyemo n’amakipe ya Etincelles FC, APR FC na Gasogi United, ubuyobozi n’abatoza ba Rayon Sports basanze nta handi bakwiye gushakira igisubizo uretse kongera imbaraga mu busatirizi, bakongeramo abakinnyi bashobora kuyifasha kubona ibitego.

Abanyarwanda bakunze kugira bati “Aho yanyuze ntihaca urwango”, bashaka gusobanura ko aho iminsi y’urukundo yanyuze hatabura uko iyo minsi myiza umuntu aba yaranyuzemo yagaruka mu buryo bumwe cyangwa ubundi; ibi ni byo byabaye no muri Murera.

N’Aba-Rayons ubanza iyi mvugo bayumva neza kuko ibisubizo bya mbere byabaye ku gutekereza ku bigeze kunyura muri iyi kipe barimo Umunye-Congo, Nzinga Héritier Luvumbu, n’Umunya-Maroc Youssef Rharb.

Luvumbu wari udafite ikipe nyuma yo gutandukana na Clube Desportivo Primeiro de Agosto, ibye byarihuse kuko hifuzwaga umukinnyi ushobora gukinisha abandi basanzwe basatira muri iyi kipe. Ku wa 31 Ukuboza, yasinye amasezerano y’amezi atandatu muri Rayon Sports.

Ibijyanye na Youssef byakomeje kuvugwa ariko Rayon Sports ibura ayo icira n’ayo imira nyuma yo gusaba FERWAFA kongera umubare w’abakinnyi ikipe yemerewe kwandikisha mu mwaka w’imikino bakava kuri 30 bakaba 33, ariko ubu busabe bukarenzwa ingohe.

Kuri ubu, iyi kipe iracyakeneye undi rutahizamu wunganira abahari nyuma y’uko isezereye Umunye-Congo Fukiani Mindeke Jean-Pierre wari mu igeragezwa.

Héritier Luvumbu yasinye amezi atandatu nyuma yo gusubira muri Rayon Sports ku nshuro ya kabiri
Héritier Luvumbu yasinye amezi atandatu nyuma yo gusubira muri Rayon Sports ku nshuro ya kabiri. Uyu Munye-Congo ntarabona uburenganzira bumwemerera gukinira iyi Kipe yaboneye izuba i Nyanza

Luvumbu yitezweho kuba umucunguzi wa Rayon Sports

Ku bafana bamwe ba Rayon Sports, kumva ko ikipe yabo yagaruye uyu mukinnyi w’Umunye-Congo, nta gushidikanya ko batangiye guhumurirwa n’igikombe nubwo gishobora kuba giteretse inyuma y’igikuta bigoye kurira.

Gusa si abo gusa kuko na Perezida w’iyi kipe, Uwayezu Jean Fidèle, yavuze ko impamvu bazanye uyu mukinnyi ari ukugira ngo abafashe kwegukana Igikombe cya Shampiyona n’icy’Amahoro.

Nyuma yo kumusinyisha amezi atandatu ku wa 31 Ukuboza, Uwayezu yagize ati “Twazanye Luvumbu ngo afatanye na bagenzi be dutware Igikombe cya Shampiyona n’icy’Amahoro.”

Ubwo Luvumbu yasinyaga amasezerano y’igihe gito ku nshuro ya mbere muri Rayon Sports muri Shampiyona ya 2021 yabaye mu matsinda, ni umwe mu bakinnyi iyi kipe yagenderagaho nubwo yasoreje ku mwanya wa karindwi.

Kuri ubu, uyu mukinnyi amaze kugaragara mu mikino ibiri ya gicuti Rayon Sports yahuyemo n’amakipe ya Heroes FC ndetse na Police FC hitegurwa imikino yo kwishyura ya Shampiyona.

Nyuma yo gutsindwa na Police FC, Haringingo Francis yabajijwe niba Luvumbu ari ku rwego rwo gukinira Rayon Sports hagendewe ku buryo ari kwitwara. Mu gusubiza, uyu mutoza yavuze ko ari umukinnyi ufite inararibonye kandi uzabafasha cyane hagati mu kibuga.

Ati “Navuga ko ari umukinnyi ufite inararibonye uzatuzanira ikintu kinini cyane mu ikipe cyane hagati mu kibuga kuko ni ahantu tubuze abakinnyi cyane. Uretse Master [Mugisha] na Roger [Kanamugire], ubu abo dufite bari gukina ni Blaise na Mbirizi, ukareba na Mbirizi yavuyemo [yaravunitse]. Nibaza ko Héritier ari umukinnyi uzadufasha hagati mu kibuga no kugabanya igitutu kugira ngo abandi bashobore gukina.”

Mu gihe Rayon Sports yabaye ibashije kumwandikisha akabona ibyangombwa bimwemerera gukina, Luvumbu yagaragara mu kibuga ubwo Murera izaba yakiriye Musanze FC ku wa Kabiri, tariki ya 24 Mutarama 2023, mu mukino w’Umunsi wa 16 wa Shampiyona.

Abafana ba Rayon Sports bitezeho Luvumbu kuba umucunguzi akabafasha kongera gutwara ibikombe badaheruka
Luvumbu ahanganiye umupira n'abakinnyi ba Police FC mu mukino wa gicuti Rayon Sports iheruka gukinira i Muhanga

Luvumbu yaba agiye kuba itandukaniro ku bandi basubiye muri Rayon Sports bakagorwa no kuyisangamo?

Uwavuga ko Luvumbu ahanzwe amaso nk’umucunguzi cyangwa moteri yatuma Rayon Sports yongera kubona intsinzi umunsi ku wundi, ntiyaba abeshye.

Gusa, ibyo ni ibyifuzo bya bamwe dore ko ikibuga kigira ibyacyo ndetse n’ibihe bigahinduka. Uyu mukinnyi si we wa mbere wagiriye ibihe byiza muri Rayon Sports uyigarutsemo.

Hari benshi bamubanjirije bayinyuzemo basasirwa ibitenge ariko nyuma yo kuyisubiramo bakagorwa no kongera kwibona mu mwambaro w’ubururu n’umweru.

Bamwe muri abo harimo Jimmy Gatete watwaranye na yo CECAFA yo mu 1998, ariko ubwo yayisubiragamo mu 2007 avuye gukina hanze, byaranze, birangira yerekeje muri Police FC.

Bokota Labama na we ni irindi zina ryari ‘ishanyarazi’ muri Rayon Sports ubwo yagurwaga mu 2008 ariko nyuma akaza kwerekeza muri APR FC. Ubwo yari asubiye muri Murera mu 2011, ntiyagize ibihe byiza nk’uko byagenze mbere ndetse birangira yerekeje muri Kiyovu Sports.

Uretse aba hari na Mwiseneza Djamal wafatwaga nk’umwana wa Rayon Sports. Uyu yayivuyemo mu 2014 ajya muri APR FC atahiriwemo. Ubwo yari agarutse ahitwa mu rugo mu 2018, Mwiseneza yakoze igeragezwa anahabwa amasezerano ariko nyuma y’igihe gito ahabwa inshingano zo kuba umutoza wungirije waje no guhinduka uwongerera ingufu abakinnyi.

Hari n’abandi benshi barimo Nizigiyimana Karim ‘Makenzi’ kuri ubu uri muri Gasogi United, nyakwigendera Ndikumana Hamad Katauti, Muhire Kevin, Kwizera Pierrot, Bukuru Christophe, Mugisha François ‘Master’ ukiri muri iyi kipe, Moussa Camara na Rwatubyaye Abdul baherutse kuyigarukamo ariko bakaba bataremeza aba-Rayons.

Si abakinnyi gusa kuko n’abatoza banyuze muri Rayon Sports bakayigiriramo ibihe byiza, na bo bitabaguye neza ubwo babaga bagarutse ndetse abenshi muri bo bayisohokagamo nabi birukanywe.

Abo barimo Kayiranga Baptiste wayijemo inshuro enye ariko ubwa mbere akaba yarayihesheje Igikombe cy’Amahoro mu 2005. Yayigarutsemo mu 2015 ariko atandukana na yo nyuma yo kubura Igikombe cy’Amahoro cy’uwo mwaka atsinzwe na Police FC ku mukino wa nyuma.

Hari kandi Ivan Minnaert wayigarutsemo mu 2018 akayifasha kugera mu matsinda ya CAF Confederation Cup ariko akaza kwirukanwa nyuma ashinjwa ubugambanyi kugeza ubwo ayijyanye mu manza.

Umunya-Brésil Robertinho na we yakomereje aho Minnaert yari agejeje, afasha Rayon Sports kugera muri ¼ cya CAF Confederation Cup no gutwara Shampiyona ya 2018/19, ariko ubwo yari agarutse muri iyi kipe ku buyobozi bwa Munyakazi Sadate, yasubiyeyo nabi kuko atahawe amasezerano mashya.

Raoul Jean-Pierre Shungu ufatwa nk’umwe mu batoza b’ibihe byose muri Rayon Sports, yagiye ayigarukamo kenshi gusa ku nshuro ya nyuma, mu 2009 yagiye nabi ndetse mu 2015, iyi kipe yahanishijwe gukurwaho amanota atatu kubera umwenda yari imubereyemo.

Jimmy Gatere ari mu bakinnyi batahiriwe no gusubira muri Rayon Sports
Ubwo Robertinho yavaga mu Rwanda mu 2019 nyuma yo kudahabwa amasezerano mashya kubera kutishimirwa muri Rayon Sports yari amaze iminsi asubukuyemo akazi
Kayiranga Baptiste yasubiye muri Rayon Sports inshuro zitandukanye, ariko ntiyigeze yongera kugira ibihe nk'ibya 2005

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .