Korea ya Ruguru n’iy’Epfo zahuriye mu mukino udasanzwe wo gushaka itike y’igikombe cy’Isi

Yanditswe na IGIHE
Kuya 15 Ukwakira 2019 saa 10:14
Yasuwe :
0 0

Ku nshuro ya mbere nyuma y’imyaka isaga 30, Korea ya Ruguru yakiriye ku kibuga cyayo Korea y’Epfo, mu mukino wo gushaka itike y’igikombe cy’Isi wabereye mu murwa mukuru Pyongyang.

Ni umukino wabaye kuri uyu wa Kabiri kuri stade yitiriwe Kim Il-sung, urangira amakipe yombi anganyije 0-0. Ni wo wa mbere w’irushanwa uhurije impande zombi muri Korea ya Ruguru, nyuma y’umukino wa gicuti wabaye mu 1990.

Baherukaga guhura mu 2017 mu Buyapani, icyo gihe Korea y’Epfo yatsinze 1-0, mu mikino y’igikombe cya Aziya. Naho mu gushaka itike y’Igikombe cy’Isi mu 2010, Korea ya Ruguru yahisemo kwakirira Korea y’Epfo mu mujyi wa Shanghai, yanga ko ibendera rya Korea y’Epfo rizamurwa n’indirimbo yayo ikaririmbwa ku butaka bw’amajyaruguru.

Uyu mukino ubaye mu gihe ibihugu byombi bikomeje gushakisha uko byazahura umubano wabyo, nyuma y’imyaka myinshi birebana ay’ingwe.

Ni umukino wabahiriye kuko warangiye nta kipe yitwayeho indi umwikomo, kuko zagabanye amanota atatu. Ni mu gihe ariko Korea y’Epfo ubu iri ku mwanya wa 37 ku rutonde rwa FIFA, Korea ya Ruguru ikaba ku wa 113. Korea y’Epfo inakinamo Son Heung-min umenyerewe muri Tottenham Hotspurs yo mu Bwongereza

Uyu mukino wabaye mu mutekano udasanzwe, kuko mu byamenyekanyeari uko nta mufana waturutse muri Korea y’Epfo wemerewe kuwureba, nta hantu watambutse ku buryo abantu bari hanze ya stade bari kubasha kuwureba, nta n’itangazmaakuru mpuzamahanga ryari ryemewe kuri uyu mukino.

Ishyirahamwe ry’umupira w’amaguru muri Korea y’Epfo naryo ngo ryahawe imyanya y’abantu babiri gusa, bari bemerewe gushyira kuri twitter uko umukino urimo kugenda.
Daily Mail yavuze ko abayobozi ba Korea ya Ruguru bemereye ab’iy’epfo kubaha amashusho yose y’umukino n’amafoto, kugira ngo baze kubyerekana iwabo.

Ibi bihugu biheruka kugaragaza ko siporo ishobora kuba imwe mu nzira zishobora kuba ikiraro hagati yabyo.

Biteganyijwe ko umukino wo kwishyura uzabera i Seoul ku wa 4 Kamena umwaka utaha. Ni umukino wo gushaka itike y’igikombe cy’Isi kizabera muri Qatar mu 2022, aho Korea zombi ziri mu itsinda H hamwe na Liban, Turkmenistan na Sri Lanka.

Abafana bo muri Korea ya Ruguru nibo bonyine barebye uyu mukino
Abarebye uyu mukino bahamije ko wari unogeye ijisho
Wari umukino urimo ishyaka ryinshi
Umukino warangiye amakipe yombi anganyije 0-0

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza