00:00:00 IGIHE NETWORK KN KINYARWANDA EN ENGLISH FR FRANCAIS

Kiyovu Sports yatahanye akangononwa mu mukino yanganyijemo na Gasogi United (Amafoto)

Yanditswe na Byiringiro Osée Elvis
Kuya 20 Mutarama 2023 saa 10:33
Yasuwe :

Kiyovu Sports yanganyije na Gasogi United 0-0 mu mukino w’Umunsi wa 16 wa Shampiyona, wabaye kuri uyu wa Gatanu, tariki 20 Mutarama 2023, kuri Stade ya Bugesera.

Mbere y’umukino hari havuzwe amagambo menshi ku mpande zombi, ahanini bitewe no guhangana kugaragara hagati y’aya makipe. Uyu mukino wabaye Gasogi united imaze gutsinda Kiyovu imikino itanu, Kiyovu yaratsinze umwe.

Uyu mukino watangiye utuje ariko Kiyovu Sports inyuzamo igasatira. Ku munota wa Gatandatu iyi kipe yahushije uburyo ku mupira Nshimiyimana Ismael Pitchou yatereye kure ujya hejuru y’izamu.

Gasogi United yahise izamuka yihuta Hakizimana Abdulkarim ahinduye umupira imbere y’izamu, Tuyisenge Hakim awushyira muri koruneri. Iminota yakurikiye yihariwe na Kiyovu Sports ari na ko yahushaga uburyo bwinshi.

Ku munota wa 24, Rutahizamu Maxwell Djoumekou yazamukanye umupira wenyine yinjira mu rubuga rw’amahina umunyezamu Nzeyurwanda Djihad asohoka neza umupira awukuramo.

Yakomeje gusatira coup franc yabonye, Bugingo Hakim ayiteye umupira uca hanze gato y’izamu. Blessing Godwin, mushya muri iyi kipe yakomeje kugerageza ariko biranga igitego kirabura.

Erissa Ssekisambu yahushije uburyo bwabazwe ku munota wa 34, ubwo Hakizimana Félicien yarahinduye umupira Niyitegeka Idrissa arawuhusha, usanga Ssekisambu ahagaze wenyine arebana n’umunyezamu Cuzuzo Aimé Gaël umupira awutera hanze.

Maxwell yongeye guhusha uburyo bukomeye, aho yazamukanye umupira wenyine ashatse kuroba umunyezamu Nzeyurwanda awukuraho ujya muri koruneri.

Igice cya mbere cyarangiye amakipe yombi anganya 0-0.

Kiyovu Sports yatangiranye imbaraga nyinshi igice cya kabiri, ku munota wa 49 Iradukunda Bertrand yacomekeye umupira Muhozi Fred ariko uyu awutera hejuru y’izamu.

Umukino wakomeje gukinirwa hagati mu kibuga ari na ko amakipe yombi yageragezaga uburyo imbere y’izamu ariko ntibugire icyo butanga.

Ku munota wa 67, Tuyisenge yahawe ikarita y’umuhondo kubera kubwira nabi umusifuzi Mukansanga Salima ubwo atemeranyaga na we ku ikosa yasifuye ko Maxwell yakiniye nabi Bigirimana. Aha yatanze ikosa kandi Tuyisenge yabonaga ko yagombaga kurireka bagakomeza contre-attaque.

Abafana ba Kiyovu Sports bahise batangira kuvugiriza induru umusifuzi Mukansanga bamuvugiriza induru baririmba bati ‘Warakecuye’.

Abatoza bombi bakomeje gusimbuza bareba ko hari impinduka zagaragara, ariko biranga umukino urangira akomeje kunganya 0-0.

Iri nota rimwe ryatumye Kiyovu Sports yicara ku mwanya wa mbere by’agatenganyo n’amanota 31, AS Kigali ifata uwa kabiri n’amanota 30, mu gihe Gasogi United iri ku mwanya wa gatatu n’amanota 29.

Mu mukino wabanjirije uyu saa 12:30, Police FC yatsinze Gorilla FC ibitego 3-2 birimo kimwe cya Hakizimana Muhadjiri, uheruka gusinyira iyi kipe avuye muri AlKholood FC yo mu Cyiciro cya Kabiri muri Arabie Saoudite.

  Imikino iteganyijwe mu mpera z’icyumweru

Ku wa Gatandatu tariki 21 Mutarama 2023

• AS Kigali vs Marines FC (Stade Bugesera, 15:00)

• Espoir FC vs Rwamagana City (Rusizi, 15:00)

Ku Cyumweru, tariki ya 22 Mutarama 2023

• Rutsiro FC vs Etincelles FC (Stade Umuganda, 15:00)

• Bugesera FC vs Sunrise FC (Stade Bugesera, 12:30)

• APR FC vs Mukura VS (Stade Bugesera, 15:30)

Ku wa Kabiri, tariki 24 Mutarama 2023

• Rayon Sports vs Musanze FC (Stade Muhanga, 15:00)

Abakinnyi 11 ba Kiyovu Sports babanje mu kibuga
Abakinnyi 11 babanje mu kibuga ku ruhande rwa Gasogi United
Umusifuzi Mpuzamahanga Mukansanga Salima ni we wayoboye umukino wa Gasogi United na Kiyovu Sports
Umunyezamu Nzeyurwanda Djihad yabanje gusenga
Umukino wari wabanjirijwe no guterana amagambo hagati y'abayobozi ba Kiyovu Sports n'aba Gasogi United warimo imbaraga nyinshi
Umunyezamu wa Gasogi United, Cuzuzo Aimé Gaël, yakuyemo imipira ikomeye
Rutahizamu Godwin Blessing yasatiraga yihuta ariko ntiyafashije Gasogi United kubona igitego
Niyitegeka Idrissa ahindura umupira
Niyitegeka Idrissa acenga Tuyisenge Hakim
Ni umukino wabereye i Nyamata kuri Stade ya Bugesera
Ndayishimiye Thierry yagerageje gutsinda ariko umupira ujya hejuru y'izamu
Abakinnyi ba Kiyovu Sports bakunze gukinira imbere y'izamu rya Gasogi United
Mbonyigabo Regis ni we wakinaga umwanya wa Serumogo Ally utagaragaye kuri uyu mukino kubera ibibazo afitanye n'ikipe
Iradukunda Bertrand agerageza gucika abakinnyi ba Gasogi United
Kiyovu Sports yihariye umukino igihe kinini
Bigirimana Abeddy [21] uri mu bagenderwaho muri Kiyovu Sports akina umupira n'umutwe
Abafana ba Gasogi United bazwi nk'Urubambyingwe
Abafana bake bo mu Karere ka Bugesera baje kwihera ijisho umukino wa Gasogi United na Kiyovu Sports

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .