00:00:00 IGIHE NETWORK KN KINYARWANDA EN ENGLISH FR FRANCAIS

Kiyovu Sports yanzuye kugarura Mvukiyehe Juvénal, yizeza gushyira iherezo ku mwuka mubi uyivugwamo

Yanditswe na Iradukunda Olivier
Kuya 28 Ukuboza 2022 saa 05:49
Yasuwe :

Komite Nyobozi ya Kiyovu Sports FC yakoraniye mu nama igamije gucoca ibibazo by’umwuka mubi uvugwa muri iyi kipe no kuyiha icyerekezo gikwiye mu gihe kizaza.

Iyi nama yabereye ku Cyicaro cya Kiyovu Sports giherereye Kicukiro, tariki ya 27 Ukuboza 2022.

Ingingo nkuru y’ibyigiwemo ni iyegura rya Perezida wayo Mvukiyehe Juvénal uheruka gusezera bagenzi be, avuga ko atazakomeza kuyobora iyo kipe kuko ‘yatengushywe n’Abayovu’.

Iyi nama yayobowe na Visi Perezida wa Mbere wa Kiyovu Sports, Ndolimana Jean François Régis n’abanyamuryango batandukanye b’iyi Kipe yo ku Mumena.

Inama yemeje ko nta bwegure bwa burundu bwa Perezida Mvukiyehe buhari, ahubwo ko ariwe ukiyoboye Kiyovu kugeza ubu.

Itangazo ryashyizwe hanze rivuga ko abagize Komite Nyobozi ya Kiyovu Sports basanze nta kibazo gikomeye cyatuma abanyamuryango bacika intege, kuko akabazo kabayeho ari ak’imyumvire itandukanye ku byerekeye ihuriro rya Kiyovu Sports Association na Kiyovu Sports Company.

Ubuyobozi bukimara kumva kimwe ibyifuzo n’umurongo wo gutwaramo ibikorwa byabo, bemeje ko hagomba kubahirizwa no gushyira mu bikorwa umwanzuro w’Inteko Rusange yo ku wa 26 Nzeri 2021, wagennye ko ibikorwa byose by’ikipe bigomba kwitabwaho no gucungwa n’Ikigo cy’Ubucuruzi cya Kiyovu Sports Company.

Ikomeza iti “Kiyovu Sports Company igomba gukora mu bwisanzure, ariko igomba guha raporo Komite ya Kiyovu Sports Association.’’

Komite ya Kiyovu Sports yananzuye ko inyandiko zinoza imikorere n’inzego za Kiyovu Sports Company zamaze gutegurwa kandi zizajya zizaganirwaho kugira ngo zishyirweho umukono n’abo bireba bose.

Abanyamuryango ba Kiyovu Sports Association n’abakunzi b’Urucaca basabwe kugira umutuzo no guhatanira igikombe cya shampiyona n’ibindi bizahatanirwa mu mwaka w’imikino wa 2022/2023.

Komite Nyobozi yiteguye kongera abakinnyi bashya mu ikipe ndetse mu gice cya kabiri cya shampiyona ivuga ko izaba ifite ikipe ikomeye cyane kurusha ihari kugeza ubu.

Kiyovu Sports FC yasoje igice cya mbere cya Shampiyona y’u Rwanda iri ku mwanya wa kabiri n’amanota 30, inganya na AS Kigali iri ku mwanya wa mbere.

Perezida wa Kiyovu Sports, Mvukiyehe Juvénal, uheruka kwegura ku buyobozi bw'ikipe, agiye kugarurwa mu nshingano
Kiyovu Sports FC yasoje igice cya mbere cya Shampiyona y'u Rwanda iri ku mwanya wa kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .