00:00:00 IGIHE NETWORK KN KINYARWANDA EN ENGLISH FR FRANCAIS

Kiyovu Sports yahuje na Rayon Sports ku gahimbazamusyi yategeye abakinnyi

Yanditswe na Ntare Julius
Kuya 11 Ugushyingo 2022 saa 11:16
Yasuwe :

Amakipe ya Kiyovu Sports na Rayon Sports agiye guhura mu mukino w’ishiraniro w’Umunsi wa cyenda wa Shampiyona, yisanze yanganyije agahimbazamusyi yashyiriyeho abakinnyi bayo mu gihe bakwegukana intsinzi.

Umukino uhuza Kiyovu Sports na Rayon Sports urabera kuri Stade ya Kigali i Nyamirambo ku mugoroba wo kuri uyu wa Gatanu, tariki ya 12 Ugushyingo 2022, saa Kumi n’Ebyiri.

Ni umukino wavugishije benshi cyane ko amakipe yombi asanzwe afitanye ubukeba bwo mu kibuga no hanze yacyo ndetse byabaye akarusho ko muri uyu mwaka, yose ahagaze neza kuko Rayon Sports iyoboye shampiyona, Kiyovu Sports ikayigwa mu ntege.

Mu nama yabaye ku mugoroba ubanziriza umunsi w’umukino, Perezida wa Kiyovu Sports, Mvukiyehe Juvénal, yemereye abasore be ko nibaramuka batsinze umukeba Rayon Sports buri umwe azamuha ibihumbi 200 Frw avuye ku bihumbi 30 Frw basanzwe bahabwa ku mukino batsinze amakipe mato mu mikino ibanza ya shampiyona.

Gusa aka gahimbazamusyo gakubwa kabiri mu mikino yo kwishyura ya shampiyona kakagera ku bihumbi 60 Frw ku makipe mato kakiyongera bitewe n’urwego umukino uriho.

Ubuyobozi bwa Kiyovu Sports bugenda buzamuraho ibihumbi 10 Frw ku gahimbazamusyi gatangwa kuri buri mukino batsinze iyo bubona ko bishoboka kwegukana igikombe cya shampiyona.

Aka gahimbazamusyi ni ko kanini Kiyovu Sports itanze kuko ubusanzwe gutsinda amakipe makuru abakinnyi basanzwe bagenerwa ibihumbi 150 Frw. Ayo ni Rayon Sports na APR FC mu gihe AS Kigali, Police FC na Mukura Victory Sports buri mukinnyi yahabwaga ibihumbi 100 Frw.

Ku ruhande rwa Gikundiro, na yo yaraye ikoreye inama mu Bugesera aho ikipe icumbitse mu gutegura umukino ihanze amaso mu gukomeza urugendo rwayo rwo gusarura amanota yose muri shampiyona [imikino itandatu yakinnye yose yarayitsinze].

Perezida wa Rayon Sports, Uwayezu Jean Fidèle, mu butumwa yahaye abakinnyi b’ikipe ayoboye yabemereye ibihumbi 200 Frw kuri buri umwe nibaramuka bamutsindiye umukeba.

Aka gahimbazamusyi ni ko Rayon Sports isanzwe itanga ku bakinnyi bayo iyo batsinze APR FC.

Kuva mu myaka nk’itatu ishize, Rayon Sports yabaye insina ngufi imbere ya Kiyovu Sports kuko mu mikino ine iheruka, Ikipe y’i Nyamirambo yose yarayitsinze Murera idakoramo ariko uyu munsi yahize kwihimura.

Ku wa Gatatu, Munyakazi Sadate wahoze ayobora Rayon Sports yabwiye IGIHE ko Kiyovu Sports niramuka imutsinze azava mu mupira w’amaguru burundu, na we yemera Murera ko nimutsindira Kiyovu Sports azaha abakinnyi agahimbazamusyi k’ibihumbi 50 Frw buri umwe.

Amakuru ari gukwirakwizwa mu bakunzi ba ruhago ni uko Rayon Sports yashoye miliyoni 8 Frw mu gutegura umukino wayo na Kiyovu Sports nubwo uko yakoreshejwe bidatangazwa.

Rayon Sports izigamye imikino ibiri y’ibirarane ni yo iyoboye urutonde rwa Shampiyona n’amanota 18, imikino itandatu yarayitsinze yose mu gihe ikurikiwe na Kiyovu Sports n’amanota 16 mu mikino umunani imaze gukina.

Abakinnyi ba Kiyovu Sports n'aba Rayon Sports bategewe ibihumbi 200 Frw kuri buri wese mu gihe baza kwitwara neza ku mukino w'ishiraniro uri buhuze amakipe yombi
Perezida wa Kiyovu Sports, Mvukiyehe Juvénal, yemereye abakinnyi be ko nibatsinda Rayon Sports buri umwe azamuha agahimbazamusyi k'ibihumbi 200 Frw
Perezida wa Rayon Sports, Uwayezu Jean Fidèle, yasabye abakinnyi b'ikipe ye kwitwara neza bagahesha ishema abayikunda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .