Kiyovu Sports yabujije APR FC gufata umwanya wa mbere (Amafoto)

Yanditswe na Eric Tony Ukurikiyimfura
Kuya 8 Ugushyingo 2019 saa 09:20
Yasuwe :
0 0

APR FC yananiwe gusubira ku mwanya wa mbere muri Shamppiyona nyuma yo kunganya na Kiyovu Sports ubusa ku busa mu mukino w’Umunsi wa munani wabereye ku matara ya Stade ya Kigali i Nyamirambo kuri uyu wa Gatanu.

Kiyovu Sports yari yakiriye uyu mukino, yatangiye iri hejuru ariko na APR FC itangiye kuyisatira guhera ku munota wa gatandatu.

Ikipe y’Ingabo yashoboraga gufungura amazamu ku mupira wazamukanywe na Omborenga Fitina, awuhinduye mu izamu ntiwagerwaho na Mugunga Yves wari usigaranye n’umunyezamu Nzeyurwanda Djihad.

APR FC yabuze igitego kandi ku mupira watewe na Omborenga ugeze kuri Byiringiro Lague, na we atera ishoti rikomeye ryaciye ku ruhande rw’izamu.

Robert Saba wasimbuye Ndayisaba Hamidou igice cya kabiri kigitangira, yagize uruhare mu busatirizi bwa Kiyovu Sports, aho we na Armel Ghislain bashoboraga gutsindira Urucaca ku munota wa 76, Rwabugiri Umar na Manzi Thierry batabara izamu.

APR FC yinjijemo Nshuti Innocent na Ishimwe Kevin mu minota ya nyuma, yasatiriye Kiyovu Sports ishaka igitego, ariko iminota irangira nta kipe irebye mu izamu ry’indi.

Kunganya uyu mukino byatumye APR FC igira amanota 18, iyanganya na Police FC ndetse zombi zinganya ibitego umunani zizigamye. Police FC imaze kwinjiza ibitego 14 mu gihe APR FC yinjije 11.

Kiyovu Sports yagize amanota 15 ku mwanya wa gatanu, iyanganya na Rayon Sports ya kane, ariko iyi Kipe yambara Icyatsi n’Umweru izigamye ibitego bitatu mu gihe Rayon Sports izigamye umunani.

Shampiyona y’icyiciro cya mbere mu Rwanda izakomeza tariki ya 21 Ugushyingo 2019 nyuma y’imikino ibiri Amavubi azahuramo na Mozambique (i Maputo tariki ya 14) na Cameroun (i Kigali tariki ya 17) mu itsinda F ryo gushaka itike ya CAN 2021.

Abakinnyi bitabajwe ku mpande zombi:

Kiyovu Sports: Nzeyurwanda Jimmy Djihad, Serumogo Ally Omar (c), Nahimana Isiaq, Tubane James, Munezero Fiston, Onyancha Emmanuel, Ishimwe Saleh, Ndayisaba Hamidou, Gyslain Armel,Tuyishime Benjamin, Nizeyimana Claude.

APR FC: Rwabugiri Umar, Ombolenga Fitina, Imanishimwe Emmanue, Manzi Thierry (c), Mutsinzi Ange, Niyonzima Olivier Sefu, Bukuru Christophe, Manishimwe Djabel, Byiringiro Lague, Mugunga Yves na Usengimana Danny.

Abakinnyi ba Kiyovu Sports babanje mu kibuga
Abakinnyi 11 ba APR FC babanje mu kibuga
Ba kapiteni bombi: Serumogo na Manzi Thierry bifotozanya n'abasifuzi bayobowe na Twagirumukiza Abdul Karim
Tubane James ashaka uko yambura umupira Byiringiro Lague
Manishimwe Djabel akinirwa nabi na Onyacha Emmanuel wa Kiyovu
Imanishimwe Emmanuel azamukana umupira ku ruhande rw'ibumoso
Usengimana Danny utahiriwe muri uyu mukino ashaka uko afunga umupira
Tubane James akiza izamu ubwo yari yugarijwe na Usengimana Danny
Omborenga Fitina mu kirere ubwo yafungaga umupira
Umutoza wa APR FC, Adil Mohammed Erradi yitegereza uko umukino uri kugenda
Mugunga Yves yinjirana ubwugarizi bwa Kiyovu Sports
Manishimwe Djabel yavuye mu kibuga yavunitse

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza