00:00:00 IGIHE NETWORK KN KINYARWANDA EN ENGLISH FR FRANCAIS

Kiyovu SC ishobora kunguka arenga miliyoni 100 Frw mu bakinnyi babiri

Yanditswe na Mihigo Saddam
Kuya 15 April 2022 saa 05:05
Yasuwe :

Kiyovu Sport Club ishobora kunguka amafaranga y’u Rwanda arenga miliyoni 100 biciye mu kugurisha abakinnyi bayo babiri bashakwa na Yanga SC yo muri Tanzania.

Yanga SC ni imwe mu makipe azwi mu Karere ka Afurika y’Iburasirazuba no ku rwego rwa Afurika, bigendanye no kuba ikina amarushanwa ahuza amakipe yabaye aya mbere iwayo kandi ikitwara neza.

Kuri ubu irashaka Bigirimana Abedi na Nshimirimana Ismaël bakunze kwita Pitchou bose bakinira Kiyovu SC. Bivugwa ko bazatangwaho miliyoni 180 Frw.

Umutoza wungirije wa Yanga SC, Kaze Cédric na Eng. Hersi Saidi uba mu buyobozi bukuru bwa GSM na Yanga SC, ni intumwa z’iyi kipe ziri mu Rwanda mu ruzinduko rwo kwiga kuri aba bakinnyi.

Amakuru IGIHE yamenye ni uko Bigirimana Abedi aramutse aguzwe, we ku giti cye azahabwa miliyoni 40 Frw mu gihe Nshimirimana Ismaël we yahabwa miliyoni 30 Frw.

Kiyovu SC bivugwa ko izafata asigaye muri miliyoni 180 Frw nk’ikiguzi cy’amasezerano aba bakinnyi basigaje muri iyi kipe.

Bigirimana asigaje amasezerano y’umwaka umwe muri Kiyovu SC kuko yayigezemo mu 2020 asinya amasezerano y’imyaka itatu mu gihe mugenzi we Nshimirimana banakinana mu Ikipe y’Igihugu y’u Burundi yayigezemo mu 2021 asinya amasezerano y’imyaka ibiri.

Yanga SC irashaka aba bakinnyi, aho guhera muri Kamena 2022, bazaba abasimbura b’Umunya-Uganda, Khalid Aucho, ukina hagati mu kibuga ushakwa na Pyramids yo mu Misiri na Yannick Bangala uzajya ku mugabane wa Aziya.

Abedi Bigirimana wifuzwa na Yanga SC
Kiyovu SC ishobora kunguka ayarenga miliyoni 100Frw mu bakinnyi babiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .