Kirasa yasobanuye impamvu Sugira akinishwa mu gice cya kabiri gusa

Yanditswe na Eric Tony Ukurikiyimfura
Kuya 12 Mutarama 2020 saa 10:43
Yasuwe :
0 0

Umutoza w’agateganyo wa Rayon Sports, Kirasa Alain, yavuze ko impamvu rutahizamu mushya w’iyi kipe, Sugira Ernest akinishwa igice cya kabiri gusa ari uko ataramera neza ndetse baba bashaka ko ajya mu kibuga abakinnyi b’ikipe bahanganye bamaze kunanirwa.

Ibi Kirasa yabitangaje nyuma y’umukino w’umunsi wa 17 wa Shampiyona Rayon Sports yaraye inganyijemo na AS Kigali ubusa ku busa kuri Stade ya Kigali i Nyamirambo.

Sugira watijwe Rayon Sports mu cyumweru gishize avuye muri APR FC, yinjiye mu kibuga mbere y’uko igice cya kabiri gitangira nk’uko byagenze ku mukino we wa mbere, aho yanatsinze igitego Gasogi United, agahesha Rayon Sports intsinzi ya mbere mu mwaka mushya wa 2020.

Umutoza we, Kirasa Alain, yavuze ko impamvu ahitamo kumukinisha iminota 45 ya nyuma mu mukino ari uko ataramera neza dore ko yavuye muri APR FC amaze amezi abiri ahagaritswe mu ikipe ya mbere, akorera imyitozo mu ikipe y’abato.

Ati ‘’Mu bijyanye n’imbaraga ntabwo aramera neza ku buryo twamutangiza kandi bose baba bameze neza cyane. Mu gice cya kabiri ikipe duhanganye cyangwa natwe, tuba twagabanyije imbaraga kuko tuba twakoze, ni yo mpamvu mushyiramo mu gice cya kabiri.’’

Muri iyi minota 45, Sugira Ernest yabonye uburyo bumwe bukomeye, atera ishoti ryakuwemo n’umunyezamu Ndayishimiye Eric ‘Bakame’, atanga umupira kuri Bizimana Yannick na wo wakuwemo na Bakame mu gihe kandi hari n’umupira w’umuterekano yateye, ugaca hejuru y’izamu.

Kirasa yongeye kwibutsa abakunzi b’iyi kipe ko bakwiye guha umwanya uhagije uyu mukinnyi akabanza kwibona mu kibuga yambaye umwambaro wa Rayon Sports.

Ati ‘’Ni byo nari nasabye na mbere, mwabonye ko ataramera neza 100%, biramusaba igihe kandi ndabizi ko mu minsi iri imbere azabikora.’’

Uyu mutoza kandi yavuze ko myugariro Rugwiro Hervé utaratangira gukina kuva arekuwe n’urukiko mu cyumweru gishize azatangira imyitozo kuri uyu wa Mbere kimwe na Mugisha Gilbert umaze iminsi afite imvune.

Rayon Sports iri ku mwanya wa kabiri n’amanota 35, irushwa amanota atatu na APR FC ya mbere, yo yakira Bugesera FC kuri iki Cyumweru.

Sugira Ernest atanga umupira kuri Bizimana Yannick mu mukino waraye uhuje AS Kigali na Rayon Sports
Sugira mu kirere ashaka uko atanga umupira abakinnyi ba AS Kigali
Sugira Ernest na Bishira Latif batanguranwa umupira wari mu kirere
Kirasa Alain asanga Sugira Ernest azitwara neza namara kumera neza 100%

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .