Kimenyi Yves yasabwe kwigomwa ibyo agombwa na Rayon Sports akaba umukinnyi wa Kiyovu Sports

Yanditswe na Eric Tony Ukurikiyimfura
Kuya 26 Kanama 2020 saa 10:28
Yasuwe :
0 0

Umunyezamu Kimenyi Yves uheruka gusinyira Kiyovu Sports, yasabwe na Rayon Sports yakiniraga kwigomwa ibyo imugomba kugira ngo ahabwe urupapuro rumwemerera kuyivamo.

Kimenyi wageze muri Rayon Sports muri Nyakanga 2019 avuye muri APR FC, yahawe miliyoni 2 Frw muri miliyoni 8 Frw yaguzwe. Imwe mu ngingo y’amasezerano ye, yavugaga ko nibigera tariki ya 1 Nzeri atarabona ibyo agombwa n’ikipe, amasezerano ashobora guseswa.

Ku wa 26 Gicurasi 2020 nibwo Kimenyi Yves yasinyiye Kiyovu Sports ku masezerano y’imyaka ibiri, nk’umukinnyi wigurishije bitewe n’uko Rayon Sports itubahirije ibyo bumvikanye.

Kiyovu Sports yavuze ko itari kugura Kimenyi Yves muri Rayon Sports kuko ikurikije amasezerano yari afite, yari umukinnyi wigenga.

Kimenyi yasabye Rayon Sports kumuha urupapuro rumurekura agatandukana na yo, ariko iyi kipe yabaye iya kabiri muri Shampiyona ya 2019/20, imubwira ko akiri umukinnyi wayo kuko atigeze asaba gusesa amasezerano nk’uko hari ingingo yabimwemereraga, we agahitamo kwigurisha.

Umuvugizi wa Rayon Sports, Nkurunziza Jean Paul, yabwiye IGIHE ko Kimenyi akiri umukinnyi wabo ndetse basabye Kiyovu Sports kumugura niba imukeneye.

Ati “Kimenyi ni umukinnyi wacu, Kiyovu Sports niramuka imushaka izatwegera kuko nta mukinnyi tujya tubuza kujya aho ashaka."

Amakuru IGIHE yamenye ni uko ubwo Kimenyi Yves yahuraga n’Umuyobozi wa Rayon Sports, mu byo yasabwe harimo kwigomwa ibyo iyi kipe imugomba birimo miliyoni 6 Frw yari yasigaye ubwo yayerekezagamo, n’umushahara w’amezi abiri, akabona guhabwa urupapuro rumurekura.

Kugira ngo Rutanga yemererwe kuba umukinnyi wa Police FC, yigomwe agera kuri miliyoni 9 Frw yari aberewemo na Rayon Sports ndetse hanishyurwa andi miliyoni 2 Frw yo kumugura nubwo ubuyobozi bw’iyi kipe bwabwiye IGIHE ko ntacyo bwabivugaho.

Kimenyi Yves yasabwe kwigomwa ibyo agombwa na Rayon Sports akaba umukinnyi wa Kiyovu Sports
Kimenyi Yves yasinyiye Kiyovu Sports nk'umukinnyi wigenga mu gihe yari agifite amasezerano muri Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .