Kimenyi Yves yaririmbwe n’Aba-Rayon, bamuha akayabo k’amafaranga nyuma yo gusezerera Police FC

Yanditswe na Eric Tony Ukurikiyimfura
Kuya 13 Nzeri 2019 saa 10:19
Yasuwe :
0 0

Umunyezamu wa Rayon Sports, Kimenyi Yves yashimiwe cyane n’abafana b’iyi kipe nyuma yo kuyifasha kugera ku mukino wa nyuma w’Irushanwa ry’Agaciro 2019 ubwo yakuragamo penaliti ebyiri za Police FC maze ikipe ye igatsinda 4-3 mu mukino wabereye kuri Stade Amahoro kuri uyu wa Gatandatu.

Amakipe yombi yari yanganyije ubusa ku busa mu minota 90 isanzwe y’umukino.

Kimenyi Yves wafashije Rayon Sports no mu buryo butandukanye Police FC yabonye hagati mu mukino, yakuyemo penaliti yatewe na Mpozembizi Mohamed n’indi yatewe na Iyabivuze Osée.

Ubwo abakinnyi ba Rayon Sports bari bamaze gushimira abafana ko bababaye inyuma muri uyu mukino, abari mu gice cya 11 muri stade batangiye kuririmba ngo “Kimenyi Yves, Kimenyi Yves” maze na we aje kubashimira byihariye batangira guterera amafaranga hasi.

Kimenyi wanatowe nk’umukinnyi w’umukino, yavuye muri 11 (umuryango wa Stade Amahoro) kugeza muri 17 atoragura amafaranga yahabwaga n’abafana ba Rayon Sports, igikapu yayashyiragamo kiruzura.

Uyu munyezamu wagaragazaga akanyamuneza ku maso, yamaze kuyakusanya arabashimira akomeza agana mu rwambariro, asanga bagenzi be.

Uyu munyezamu usanzwe unafatira Ikipe y’Igihugu ‘Amavubi’ ari mu bakunzwe muri Rayon Sports nyuma yo kuyigeramo muri Nyakanga 2019, avuye muri mukeba APR FC.

Igikorwa yakorewe n’abafana ba Rayon Sports cyaherukaga mu mwaka ushize w’imikino, ubwo bashimiraga Ulimwengu Jules nk’uko bajyaga babikorera Bokota Labama Bovick.

Undi mukino wabaye kuri uyu wa Gatandatu, wahuje APR FC na Mukura Victory Sports, warangiye Ikipe y’i Huye igeze ku mukino wa nyuma itsinze penaliti 4-2, nyuma y’uko yari yanganyije ibitego 2-2 mu minota isanzwe.

Rayon Sports izahura na Mukura Victory Sports ku mukino wa nyuma uzaba ku Cyumweru saa 15:30 mu gihe Police FC izahura na APR FC bahataniye umwanya wa gatatu, guhera saa 13:00.

Rayon Sports yegukanye iri rushanwa ry’Agaciro Tournament mu nshuro ebyiri riheruka kuba mu 2017 na 2018.

Police FC yaritwaye mu 2015 ubwo yatsindaga Sunrise FC igitego 1-0 ku mukino wa nyuma.

Kimenyi yagendaga atora amafaranga yahabwaga
Kimenyi Yves atora amafaranga yajugunyiwe n'abafana ba Rayon Sports
Uyu munyezamu yari afite akanyamuneza
Yatoye amafaranga ayashyira mu gikapu kiruzura
Kimenyi Yves wavuye muri APR FC yagendaga ashimira abafana ba Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza