Kigali ku isonga ry’imijyi itanu ihataniye kwakira umukino wa nyuma wa CAF Champions League

Yanditswe na Eric Tony Ukurikiyimfura
Kuya 19 Gashyantare 2020 saa 10:54
Yasuwe :
0 0

Umujyi wa Kigali ni wo uhabwa amahirwe menshi yo kwakira umukino wa nyuma w’irushanwa rihuza amakipe yabaye aya mbere iwayo ku mugabane wa Afurika “CAF Champions League” uzakinwa tariki ya 28 Gicurasi 2020.

Bwa mbere mu mateka y’amarushanwa abiri akomeye ahuza amakipe yo ku mugabane wa Afurika (CAF Champions League na CAF Champions League), hazakinwa umukino wa nyuma umwe, aho kuba ibiri (ubanza n’uwo kwishyura) nk’uko byari bimaze kumenyerwa.

Tariki ya 11 z’uku kwezi nibwo Impuzamashyirahamwe y’Umupira w’Amaguru muri Afurika, CAF, yashyize hanze itangazo risaba Imijyi yifuza kwakira iyi mikino ya nyuma kwandika isaba.

Ikinyamakuru cyo muri Maroc gisohoka buri munsi, Asabbah, kuri uyu wa Gatatu cyanditse ko Umujyi wa Kigali n’u wa Casablanca muri Maroc, ubarizwamo Stade Mohamed V, ari yo iri ku isonga mu zihabwa amahirwe yo kwakira umukino wa nyuma uzaba tariki ya 28 Gicurasi.

Assabah ikomeza ivuga ko CAF kuri ubu ifite ibibuga bitanu bizavamo kimwe cyakira uyu mukino. Uretse Stade Amahoro na Mohamed V, hari kandi Stade Perle Bleue y’I Khartoum muri Sudani, Stade ya Cairo mu Misiri n’iya Rades muri Tunisia.

Iki kinyamakuru gikomeza kivuga ko ibiganirobyabaye hagati ya Perezida wa CAF, Ahmad Ahmad na Perezida w’u Rwanda Paul Kagame mu cyumweru gishize, byasize Impuzamashyirahamwe y’Umupira w’Amaguru muri Afurika, yemeye ko Umujyi wa Kigali ufite ubushobozi bwo kwakira uyu mukino.

Kivuga ko kandi, CAF yaba yaramenyesheje Ishyirahamwe ry’Umupira w’Amaguru mu Bwami bwa Maroc (FRMF) impinduka ishobora kuzakora mu guhitamo Stade izakira umukino wa nyuma.

Icyemezo kizafatwa nyuma y’itora rizaba mbere y’uko haba imikino ibiri ya ½ aho kuba icyemezo cya Komite Nyobozi ya CAF nk’uko byari byatangajwe mbere.

Hazashyirwaho komisiyo igamije gusura ibibuga byose byavuzwe, ikore raporo izashingirwaho n’abazahitamo ikibuga. Ibi ni nako bizakorwa mu guhitamo Stade izakira umukino wa nyuma wa CAF Confederation Cup uzaba tariki ya 24 Gicurasi.

Stade Amahoro yakira abafana benshi [25 000] yari yarakuwe mu bibuga byemewe na CAF. Guverinoma yatangaje ko hari gahunda yo kuvugurura iki kibuga gifite ubwatsi bwiza, muri uyu mwaka.

Kugeza ubu iri rushanwa rya CAF Champions League rigeze muri ¼, risigayemo amakipe ya Al Ahly (Misiri), Zamalek SC (Misiri), TP Mazembe (RDC), ES Tunis (Tunisie), Raja Casablanca (Maroc), Wyadad Casablanca (Maroc), Étoile du Sahel (Tunisie) na Mamelodi Sundwons (Afurika y’Epfo).

Ku wa 28 Gashyantare 2020 nibwo hazakinwa imikino ibanza muri ¼ mu gihe umukino wa nyuma uteganyijwe ku wa 28 Gicurasi 2020.

Itangazamakuru ryo muri Maroc rivuga ko Stade Amahoro ifite amahirwe menshi yo kwakira umukino wa nyuma wa CAF Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .