Kévin Monnet-Paquet witezwe mu Amavubi, yakinnye umukino wa mbere nyuma y’iminsi 560

Yanditswe na Eric Tony Ukurikiyimfura
Kuya 30 Kanama 2020 saa 08:58
Yasuwe :
0 0

Rutahizamu wa Saint-Etienne, Kévin Monnet-Paquet, yagarutse mu kibuga nyuma y’iminsi 560 ubwo ikipe ye yahuraga na Lorient mu mukino wayo wa mbere muri Shampiyona y’Icyiciro cya Mbere mu Bufaransa (Ligue 1) mu mwaka w’imikino wa 2020/21.

Kuva mu 2012, Kévin Monnet-Paquet yasabwe gukinira u Rwanda, ariko abyemera mu Ugushyingo 2018.

Uyu mukinnyi w’imyaka 32, ntiyigeze abona amahirwe yo kwambara umwenda w’Ikipe y’Igihugu mu myaka ibiri ishize kubera imvune yagiye ahura nazo.

Kévin Monnet-Paquet yavunitse muri Gashyantare 2019 ubwo Saint-Etienne yatsindwaga na PSG, mbere yo kongera kugira indi mvune tariki ya 12 Ukwakira 2019 ubwo yari mu myitozo, aho yabazwe mu ivi ry’ibumoso.

Kuri iki Cyumweru nibwo yasubiye mu kibuga mu mukino Saint-Etienne akinira, yatsinzemo Lorient yazamutse mu Cyiciro cya Mbere uyu mwaka, ibitego 2-0.

Kévin Monnet-Paquet wari umaze iminsi 560 adakina, yinjiye mu kibuga ku munota wa 72, akina iminota 20 ya nyuma ubwo yari amaze gusimbura Romain Hamouma watsinze ibitego byombi byabonetse muri uyu mukino.

Monnet-Paquet aherutse gutangaza ko yiteguye gukinira u Rwanda kuko byahoze ari inzozi kuri we.

Ati “Ni inzozi zanjye gukinira ikipe y’Igihugu. Ntako byaba bisa kuri njye gukinira u Rwanda. Mpaheruka mu 1993, byanezeza kuhagaruka. Ikibazo nahise mvunika biransaba gusubira mu bihe byanjye byiza ariko simbona impamvu n’imwe yatuma bitazaba.”

Ikipe y’Igihugu ‘Amavubi’ ifite imikino ibiri mu Ugushyingo 2020, aho izakina na Cap-Vert mu mikino y’umunsi wa gatatu n’uwa kane yo mu itsinda F ryo gushaka itike y’Igikombe cya Afurika cya 2022 kizabera muri Cameroun.

Kévin Monnet-Paquet yaboneye izuba i Bourgoin-Jallieu hafi y’Umujyi wa Lyon, tariki 19 Kanama 1988. Se ni Umufaransa na ho nyina akomoka mu Rwanda.

Ubwo yari afite imyaka ine, Monnet-Paquet yaje mu Rwanda ahamara imyaka ibiri mbere yo kwerekeza muri Togo aho se yari amaze kubona akazi ari na ho yatangiriye amashuri abanza mbere yo gusubira mu Bufaransa.

Kévin Monnet-Paquet (wambaye icyatsi) yagarutse mu kibuga ubwo Saint-Etienne yatsindaga Lorient yabanje gukinira hagati ya 2011 na 2014

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .