00:00:00 IGIHE NETWORK KN KINYARWANDA EN ENGLISH FR FRANCAIS

Kera kabaye FERWAFA yakabije inzozi zo kugira hoteli yayo (Amafoto)

Yanditswe na Eric Tony Ukurikiyimfura
Kuya 6 Mutarama 2023 saa 06:25
Yasuwe :

Nyuma y’imyaka irindwi yubakwa, hoteli y’Ishyirahamwe Nyarwanda rya Ruhago, FERWAFA, igiye gutahwa ndetse izatangira ibikorwa byayo mbere y’uko Inama ya FIFA izabera i Kigali muri Werurwe 2023.

Iyi hoteli y’inyenyeri enye yazamuwe i Remera, byatangajwe ko izaba igizwe n’ibyumba bigera kuri 88. Yatangiye kubakwa muri Kanama 2015, aho yagombaga kurangira mu mpera za 2016. Yagombaga kuzura itwaye miliyoni 4$, ni ukuvuga akabakaba miliyari 4 Frw yari kuva ku baterankunga babiri b’ingenzi ari bo Ishyirahamwe rya Ruhago ku Isi, FIFA n’iryo muri Maroc.

Imirimo yo kuyubaka yasubukuwe nyuma y’imyaka ine ihagaze kubera ikibazo cy’amikoro, tariki ya 21 Kanama 2021, ndetse byari byitezwe ko bizagera muri Kamena 2022, igice cya mbere cy’ibyumba 40 cyaramaze kurangira.

Gusa, hategerejwe andi mezi atandatu kubera itinda rya bimwe mu bikoresho byifashishijwe na sosiyete y’Abashinwa yayubatse.

Kuri ubu, imirimo irasa n’igeze ku musozo kuko kubaka iyi hoteli bigeze ku cyiciro cyo gukora amasuku y’imbere mu byumba no gutunganya ubusitani bwo hanze.

Ku gice kimwe cy’imbere hari ahagitunganywa ‘garde-fous’ mu gihe ahagana inyuma hari gushyirwa amakaro yo mu mbuga nk’uko byakozwe imbere.

Umuvugizi wungirije wa FERWAFA, Jules Karangwa, yabwiye IGIHE ko byose bigomba kuba bayarangiye muri uku kwezi ndetse hoteli igashyikirizwa iri Shyirahamwe.

Yongeyeho ko "hagiye kwigwa uburyo izacungwamo ku buryo Inama ya FIFA izabera i Kigali ku wa 16 Werurwe, izasanga hoteli ikora neza".

Imiterere y’igice cya Hoteli ya FERWAFA kimaze kuzura

Sosiyete y’Abashinwa, China Civil Engineering Construction Company (CCECC Rwanda Ltd)] ni yo yubatse icyiciro cya mbere cy’iyi hoteli cyagombaga gutwara miliyoni 2,6$, kikaba gifite igice cyo hasi (Ground Floor) n’inzu enye hejuru yacyo (étage enye).

Igice cyo hasi kirimo urwakiriro, ibyumba bibiri binini by’inama, ibyumba bibiri biri ku rwego rwa VIP na ’restaurants’ ebyiri. Hari kandi n’aho gushyira ibinyabiziga (parking).

Ku bice byo hejuru, étage imwe (inzu yo hejuru) igizwe n’ibyumba 10. Ni ukuvuga ko iki gice cyuzuye kigizwe n’ibyumba 40.

Imirimo yasubukuwe muri Kanama 2021 nyuma y’uko FERWAFA yari yamaze kubona miliyoni 2,5$ yatanzwe n’Ishyirahamwe ry’Umupira w’Amaguru mu Bwami bwa Maroc (FRMF) ndetse n’andi ya FIFA.

Imirimo yo kubaka hoteli ya FERWAFA isa n'iyamaze kurangira
Icyiciro cya mbere cya Hoteli ya FERWAFA kigizwe n'ibyumba 40 kirarangira n'uku kwezi
Biteganyijwe ko Inama ya FIFA izabera i Kigali muri Werurwe, izasanga iyi hoteli ikora neza

Uburyo FERWAFA yagize igitekerezo cyo kubaka hoteli

Umushinga wo kubaka hoteli cyari igitekerezo cy’ingoma ya FERWAFA yari iyobowe na Nzamwita Vincent De Gaulle hagati ya 2014 na 2018, aho binyuze muri gahunda ya FIFA Forward, buri shyirahamwe ryatangaga umushinga Ishyirahamwe ry’Umupira w’Amaguru ku Isi ryariteramo inkunga.

FERWAFA yasabye gufashwa kubaka hoteli y’inyenyeri enye, yari kuba ifite ibyumba 88 ndetse ikaba yari yitezweho kuzungukira iri Shyirahamwe, bikanagabanyiriza Leta umutwaro wo kwishyura amafaranga menshi mu zindi hoteli zifashishwa n’amakipe y’Igihugu mu mwiherero.

Yari kuba kandi inzira yo kwinjiriza Ishyirahamwe ry’umupira w’amaguru amafaranga menshi, kuko yari gukoreshwa mu bucuruzi butandukanye.

Iyi hoteli byari biteganyjwe ko izuzura itwaye hafi miliyari 4 Frw, aho 65% byari kuba ari amafaranga yatanzwe na FIFA mu gihe andi mafaranga yagombaga kuva mu nguzanyo cyangwa inkunga FERWAFA yari guhabwa n’andi mabanki y’imbere mu gihugu.

Muri Nyakanga 2017, nyuma y’inama idasanzwe ya CAF yabereye i Rabat muri Maroc, Umuyobozi w’Ishyirahamwe ry’Umupira w’Amaguru mu Bwami bwa Maroc (FRMF), Fouzi Lekjaa, yasinyanye amasezerano na Nzamwita De Gaulle wayoboraga FERWAFA, yo gufasha mu kubaka iyi hoteli.

Maroc yari yemereye u Rwanda ko ruzahabwa miliyoni 2.25$ yagenerwaga na FIFA muri gahunda ya FIFA Forward, agahita ajya mu bikorwa byo kubaka hoteli ya FERWAFA.

Kugeza icyo gihe, kubaka hoteli byasaga n’ibishoboka cyane kuko FIFA yagombaga gutanga 65% naho Maroc igatanga 35%.

Igishushanyombonera cya Hoteli ya FERWAFA mbere y'uko itangira kubakwa mu 2015

Byagenze gute kugira ngo iyi hoteli imare imyaka irindwi itaruzura?

Binyuze muri gahunda ya FIFA Forward 1, Ishyirahamwe ry’Umupira w’Amaguru ku Isi ryari ryageneye FERWAFA miliyoni 2$ yo gushyigikira uyu mushinga wa hoteli.

Binyuze kandi mu bwumvikane n’umubano wari hagati ya FRMF ya Maroc na FERWAFA, bemeye ko amafaranga yabo yo muri FIFA, angana na miliyoni 2.25$, azahabwa FERWAFA ikayakoresha mu kuzuza umushinga wayo wo kubaka hoteli.

Gusa, ntibyagenze uko byari byateganyijwe, ahubwo nyuma yo gushyirwaho ibuye ry’ifatizo na Perezida w’Ishyirahamwe ry’Umupira w’Amaguru ku Isi, FIFA, Gianni Infantino, ku wa 25 Gashyantare 2017, imirimo yahagaze nyuma y’umwaka umwe kandi yari igeze kuri 53%.

Ibi byaturutse ku kuba Maroc itaratanze inkunga yayo yari yemeye ndetse na FIFA ikaba yari gutanga andi mafaranga ari uko imirimo yo kubaka iyi hoteli igeze kuri 75%.

Mu 2020, Sosiyete y’Abashinwa ya China Civil Engineering Construction Company (CCECC Rwanda Ltd) yishyuwe asaga miliyari 1 Frw ubwo imirimo yahagararaga kubera ibura ry'amafaranga FERWAFA yari yemerewe

Habuze iki ngo FIFA na Maroc bitangire amafaranga ku gihe?

Kutabonekera igihe kw’amafaranga bari bemerewe na FIFA na FRMF ya Maroc ni byo byatumye imirimo yo kubaka iyi hoteli ihagarara kuva mu ntangiriro za 2018.

Ubwo imirimo yo kubaka iyi hoteli yari igeze muri 50%, FERWAFA yahaye FIFA inyemezabwishyu kugira ngo iyihe amafaranga yayemereye, na yo iyisaba kugaragaza aho izakura amafaranga ayifasha kugeza imrimo muri 70% kugira ngo itange ayo yemeye.

Byabaye ihurizo kuri FERWAFA yari imaze iminsi isa n’iyahebye amafaranga y’Abanya-Maroc. Kutabonekera igihe kw’amafaranga y’aba Barabu byatewe n’uko byahuriranye no kuba iki gihugu cyariyamamarizaga kuzakira Igikombe cy’Isi cya 2026, mu gihe amatora yari ateganyijwe mu mpeshyi ya 2018 ubwo habaga Igikombe cy’Isi mu Burusiya, bityo bikaba byari gufatwa nko gutanga ruswa ku bindi bihugu bizatora.

Amatora yabaye ku wa 13 Kamena 2018, yarangiye Maroc igize amajwi 65, itsindwa na Leta Zunze Ubumwe za Amerika, Canada na Mexique byari byishyize hamwe, byo byagize amajwi 134.

Guhagarara kw’iyi mirimo byatumye FERWAFA yishyura agera kuri miliyari 1.15 Frw ku bari bashinzwe kubaka iyi hoteli (China Civil Engineering Construction Company (CCECC Rwanda Ltd) n’abashinzwe igenzura.

Nyuma yaho, FERWAFA yongeye gusaba Ishyirahamwe ry’Umupira w’Amaguru mu Bwami bwa Maroc ko ryabaha inkunga ryemeye kugira ngo umushinga ugezwe ku rwego FIFA yifuzaga ikabona kurekura amafaranga yayo. Byasaga n’aho Maroc ibigendamo gake kugeza ubwo impande zombi zahujwe n’abo mu Ishyirahamwe ry’Umupira w’Amaguru ku Isi (FIFA).

FIFA yahuje impande zose kugeza byumvikanyweho ko Maroc itanga amafaranga ndetse n’uru rwego rushinzwe umupira w’amaguru ku Isi, rwemera gushyigikira iyubakwa ry’iyi hoteli.

Perezida wa FIFA, Gianni Infantino, ashyira ibuye ry'ifatizo ahubatswe hoteli ya FERWAFA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .