00:00:00 IGIHE NETWORK KN KINYARWANDA EN ENGLISH FR FRANCAIS

Kenya: Abakinnyi n’abatoza 16 bahagaritswe bazira "kugura imikino"

Yanditswe na IGIHE
Kuya 15 Mutarama 2023 saa 12:21
Yasuwe :

Ishyirahamwe ry’Umupira w’Amaguru muri Kenya (KFF), ryahagaritse abakinnyi 14 n’abatoza babiri bakurikiranyweho ruswa no kugira uruhare mu kugena uko imikino irangira (match-fixing) muri shampiyona yaho.

Mu bahagaritswe ku wa Gatanu w’iki cyumweru harimo batandatu bari abakinnyi ba Zoo Kericho FC yahamwe no "kugura imikino" mu iperereza ryakozwe n’akanama ka FIFA mu 2021, byatumye ikurwa muri Shampiyona y’Icyiciro cya Mbere muri Kenya.

FKF yatangaje ko yahagaritse abashinjwa barimo umukinnyi umwe wo muri Tusker FC ifite igikombe cya Shampiyona ya Kenya, kugeza hamaze gukorwa iperereza.

Ibinyujije ku rubuga rwayo, FKF yagize iti "Ishyirahamwe rya Ruhago muri Kenya ryakiriye raporo zizewe zivuga ko hari abakinnyi batandukanye n’abatoza bagize uruhare mu kugura imikino".

Yakomeje igira iti "Mu rwego rwo kurinda ubusugire bwa shampiyona… Ishyirahamwe rihagaritse abantu babivugwamo mu gihe hakorwa iperereza ku bufatanye bw’akanama ka FIFA n’aka FKF."

Abahagaritswe basabwe kutagira aho bahurira n’ibikorwa by’umupira w’amaguru muri iki gihe bakiri mu bihano.

Muri Gashyantare 2020, FIFA yahagaritse abakinnyi bane b’Abanya-Kenya, umwe ahagarikwa burundu, kubera uburyo bakoranye n’abanyamahanga ngo bagene uko imikino ya shampiyona irangira.

Nyuma yaho, abasifuzi batanu bo muri Kenya bahagaritswe kubera icyaha nk’icyo.

Kenya yasubiye ku ruhando rwa ruhago mpuzamahanga mu Ugushyingo nyuma yo guhagarikwa na FIFA muri Gashyantare 2022, kubera ikoreshwa nabi ry’inkunga ihabwa no gushyiraho komite y’inzibacyuho bigizwemo uruhare na guverinoma.

Mu 2004, FIFA yahagaritse Kenya mu gihe cy’amezi atatu, na bwo kubera ko guverinoma yayo yivanze mu mikorere ya FKF, ariko icyemezo gikurwaho ubwo iki gihugu cyari cyemeye gushyiraho amategeko ngengamikorere mashya.

Ishyirahamwe rya Ruhago muri Kenya ryahagaritse abakinnyi n'abatoza 16 bakurikiranyweho gukora 'match-fixing'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .