KCCA yasabye APR FC kwishyura miliyoni 100 Frw kuri Kato Nemeyimana

Yanditswe na Eric Tony Ukurikiyimfura
Kuya 31 Kanama 2020 saa 08:25
Yasuwe :
0 0

Ikipe ya KCCA yo muri Uganda yanze kugurisha myugariro wayo wo hagati, Kato Samuel Nemeyimana, wifuzwa na APR FC kuri bihumbi 50$ (agera kuri miliyoni 50 Frw), iyisaba kuyakuba inshuro ebyiri.

APR FC ikomeje gushaka abakinnyi bakomeye bazayifasha kugera mu matsinda ya CAF Champions League mu mwaka utaha w’imikino.

Nubwo iyi kipe y’ingabo ntacyo itangaza ku bivugwa ko ikiri ku isoko, itangazamakuru ryo muri Uganda ryanditse ko yatanze ibihumbi 50$ kuri Samuel Kato Nemeyimana, ikipe ye ya KCCA akinira ikayanga.

Ikinyamakuru Football256 cyatangaje ko APR FC yasabwe kwishyura miliyoni 360 z’amashilingi ya Uganda (agera kuri miliyoni 100 Frw) kugira ngo ibone uyu mukinnyi wo hagati mu bwugarizi.

Samuel Kato Nemeyimana ufite inkomoko mu Rwanda, avuga ko yifuza gukinira u Rwanda ndetse na APR FC ku buryo adateganya kongera amasezerano muri KCCA y’i Lugogo.

Kato ni umwe mu bakinnyi batandatu bakiri bato bazamuwe mu ikipe nkuru ya KCCA bavuye muri ‘Junior’ muri Nyakanga 2019.

Ari kumwe na Sadat Anaku na Musa Ramathan, uko ari batatu batoranyijwe mu ikipe yakinnye CECAFA Kagame Cup 2019 i Kigali ndetse igikombe gitaha muri Uganda.

Uretse uyu mukinnyi, andi mazina avugwa muri APR FC ni Kagere Meddie ukinira Simba SC, Tuyisenge Jacques udafite ikipe na Muhire Kevin uri gukina muri El Geish mu Misiri.

KCCA yasabye APR FC kwishyura miliyoni 100 Frw kuri Kato Nemeyimana
Itangazamakuru ryo muri Uganda rivuga ko APR FC yari yatanze miliyoni 50 Frw, ariko KCCA ikayitera utwatsi
Samuel Kato Nemeyimana (uri inyuma) ni umwe mu bafashije KCCA gutsinda Rayon Sports muri 1/4 cya CECAFA Kagame Cup 2019 i Kigali
Samuel Kato Nemeyimana w'imyaka 21, arifuza gukinira u Rwanda nyuma y'uko akomeje kwigaragaza muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .