KCCA yageze i Kigali ifite abakinnyi 14 batarimo abanyezamu bakuru

Yanditswe na Eric Tony Ukurikiyimfura
Kuya 21 Ukuboza 2020 saa 09:46
Yasuwe :
0 0

KCCA FC izahura na AS Kigali mu ijonjora rya kabiri rya CAF Confederation Cup, yageze i Kigali ku Cyumweru, gukina umukino ubanza uzaba ku wa Gatatu saa Cyenda.

Iyi kipe ihagariye Uganda mu marushanwa Nyafurika, yageranye mu Rwanda abakinnyi 14 nyuma y’uko benshi barwaye COVID-19. Yageze i Kigali saa Tatu n’iminota 45 z’ijoro, icumbikirwa muri Dove Hotel mu gihe iri mu kato k’amasaha 24.

Nubwo KCCA yagerageje kugira amakuru yayo ibanga, bimwe mu binyamakuru byo muri Uganda byatangaje ko yahagurukanye abakinnyi 14 batarimo abanyezamu Charles Lukwago, Hassan Matovu na Ali Mwirusi, aho izitabaza umunyezamu w’ikipe yayo y’abato.

Bivugwa ko hari abandi bakinnyi babiri cyangwa batatu bashobora gusanga bagenzi babo i Kigali kuri uyu wa Mbere.

Ikinyamakuru Bigwhale Sports cyatangaje ko Umutoza Mukuru, Mike Mutebi, na we atazanye n’iyi kipe kubera COVID-19 kimwe n’abandi bakinnyi barimo Denis Iguma, Brian Aheebwa, Hassan Musana na Loro Mazengo.

Morley Byekwaso ni we ushobora gutoza iyi kipe ku wa Gatatu mu mukino uzabera kuri Stade ya Kigali i Nyamirambo, afatanya na Kaddu Badru, Kabuye na Richard Malinga.

KCCA iri mu makipe atarakinnye ijonjora rya mbere rya CAF Confederation Cup 2020/21 mu gihe AS Kigali yasezereye Orapa United yo muri Botswana mu ijonjora rya mbere.

KCCA FC yageze i Kigali ku Cyumweru idafite bamwe mu bakinnyi kubera COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .