KCCA iravugwamo abakinnyi 12 banduye COVID-19 mbere yo guhura na AS Kigali

Yanditswe na Bukuru JC
Kuya 20 Ukuboza 2020 saa 02:39
Yasuwe :
0 0

KCCA yitegura guhura na AS Kigali mu ijonjora rya kabiri rya CAF Confederation Cup rizatangira mu cyumweru gitaha, iravugwamo abakinnyi 12 n’abandi batoza banduye COVID-19.

Ubu bwandu bwa COVID-19 bwatangajwe ku wa Gatanu nyuma y’umukino wa shampiyona, KCCA yatsinzwemo na Uganda Revenue Authority FC ibitego 2-1.

Umutoza wayo, Mike Mutebi, ni umwe mu banduye COVID-19 bo muri KCCA nk’uko byanditswe n’ikinyamakuru Football256.

Cyatangaje ko abakinnyi 12 basanganywe COVID-19 nyuma yo gukina na Uganda Revenue Authority ku wa Gatanu mu mukino wabereye kuri MTN Omondi Stadium.

Charles Lukwago, Denis Iguma, Kezironi Kizito, Brian Aheebwa, Stefano Mazengo, Samson Kigozi na Hassan Musana, bivugwa ko bose banduye COVID-19. Hassan Matovu wari umusimbura utarakoreshejwe kuri uwo mukino, na we ari ku rutonde rw’abanduye.

Umutoza wungirije, Badru Kabuye, uw’abanyezamu Moses Oloya ndetse na Jackson Magera bari mu bandi bo muri iyi kipe banduye COVID-19 nk’uko byatangajwe n’icyo kinyamakuru cyo muri Uganda.

Football256 yakomeje ivuga ko bamwe mu bakinnyi bari basanzwe ari bazima mbere yo gukina na URA FC, ariko ku wa Gatanu bikagaragazwa ko banduye.

Abakinnyi n’abatoza banduye, basabwe kwishyira mu kato bityo KCCA ikaba ishobora kugorwa no kwitegura umukino ubanza izakirwamo na AS Kigali ku wa Gatatu tariki ya 23 Ukuboza 2020.

Gusa, hari abibaza niba aya amakuru yaba ataratanzwe mu rwego rwo kujijisha AS Kigali bizahura mu mikino ibiri y’ijonjora rya kabiri.

KCCA isanzwe ifite abakinnyi bavunitse barimo Gift Ali, Julius Poloto, Sadat Anaku na John Revita.

KCCA iravugwamo abakinnyi 12 banduye COVID-19 mbere yo guhura na AS Kigali ku wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .