Kapiteni w’ikipe y’igihugu y’abagore ya USA yambitse impeta undi mugore ukina muri WNBA

Yanditswe na Eric Tony Ukurikiyimfura
Kuya 31 Ukwakira 2020 saa 02:59
Yasuwe :
0 0

Kapiteni w’Ikipe y’Igihugu y’Abagore ya Leta Zunze Ubumwe za Amerika mu mupira w’amaguru, Megan Rapinoe, yambitse impeta mugenzi we ukina muri Shampiyona ya Basketball (WNBA), Sue Bird, nyuma y’imyaka ine bakundana.

Sue Bird w’imyaka 40, yabitangaje binyuze ku ifoto yashyize kuri Instagram, aho Rapinoe w’imyaka 35, yari apfukamye, amwambika impeta ku kiganza cy’ibumoso.

Aba bagore bombi bo muri Amerika, bari bamaze hafi imyaka ine bakundana.

Megan Rapinoe yatwaye igikombe cy’Isi cy’Umupira w’Amaguru na Leta Zunze Ubumwe za Amerika mu 2015 na 2019 ndetse ni we wahawe Ballon d’Or ya 2019 mu bagore mu gihe Bird yatwaye imidali ya Zahabu ine mu mikino Olempike.

Sue Bird aheruka kandi kwegukana Shampiyona ya WNBA hamwe n’ikipe ya Seattle Storm nyuma y’uko atakinnye umwaka wa 2019 kubera imvune y’ivi.

Rapinoe ni umwe mu bagore bagarutsweho cyane mu itangazamakuru nyuma y’uko asabye ko amakipe y’abagore yajya afatwa kimwe nk’ay’abagabo muri Leta Zunze Ubumwe za Amerika.

Umukandida ku mwanya wa Perezida wa Leta Zunze Ubumwe a Amerika, Joe Biden, ni umwe mu bashimiye aba bombi biyemeje kurushinga, mu butumwa yashyize kuri Twitter agira ati “Urukundo ruratsinda iteka.”

Megan Rapinoe yambitse impeta Sue Bird bamaze imyaka ine bakundana
Sue Bird akina muri Seattle Storm yatwaye igikombe cya Shampiyona ya WNBA
Megan Rapinoe w'imyaka 35, asanzwe ari kapiteni w'ikipe y'igihugu ya USA mu mupira w'amaguru
Ubwo Leta Zunze Ubumwe za Amerika zatwaraga igikombe cy'Isi mu 2019, Rapinoe yagiye mu bafana gusomana na Sue Bird
Rapinoe na Bird bamaze imyaka ine bakundana
Bombi bakunda gusohokana kenshi ku mikino itandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .