Perezida wa Rayon Sports yasabye Leta gufasha amakipe guhemba abakinnyi

Yanditswe na Eric Tony Ukurikiyimfura
Kuya 4 Mata 2020 saa 05:09
Yasuwe :
0 0

Perezida w’ikipe ya Rayon Sports, Munyakazi Sadate, yasabye Leta gufasha amakipe kubona ubushobozi bwo guhemba abakinnyi, muri ibi bihe imikino n’ibindi bikorwa bya siporo byasubitswe kubera Coronavirus.

Kuva tariki ya 15 Werurwe 2020, ibikorwa byose bihuza abantu benshi birimo n’imikino byahagaritswe mu Rwanda, mu gihe guhera tariki ya 21 Werurwe, abantu bose basabwe kuguma mu ngo zabo nk’imwe mu ngamba zikomeye zo guhangana n’icyorezo cya Coronavirus.

Mu kiganiro abayobozi b’amakipe atandukanye baherutse kugirana na IGIHE, bagaragaje ko hari ingaruka icyo cyorezo kizagira ku mibereho y’abakinnyi n’amakipe muri ibi bihe.

Agaruka ku butumwa Minisitiri wa Siporo, Munyangaju Aurore Mimosa, yagejeje ku bafite aho bahuriye n’imikino bose, ku wa 2 Mata 2020, Umuyobozi wa Rayon Sports, Munyakazi Sadate yasabye ko Leta y’u Rwanda yashyiraho uburyo bwo gufasha amakipe guhemba abakinnyi muri ibi bihe abantu bose basabwe kuguma mu ngo zabo.

Mu butumwa yashyize ku rubuga rwa Twitter, Munyakazi Sadate yagize ati “Minisitiri twashimye ubutumwa, gusa nyuma y’iki cyorezo cyibasiye Isi, hashobora kuzaba ihungabana ry’ubukungu rishobora na gusenya ibigo, kubura akazi bikabona icyuho. Ni yo mpamvu dusaba Leta y’ u Rwanda gufasha amakipe guhemba abakinnyi. “

“Guhemba abakinnyi navuze ni muri iki gihe abantu basabwe kuguma mu ngo zabo kugera igihe ibikorwa bya siporo bizasubukurirwa. Murakoze.”

Rayon Sports iri mu makipe atatu adafashwa na Leta muri 16 akina Shampiyona y’icyiciro cya mbere mu Rwanda, ndetse 90% by’amafaranga ikoresha atangwa n’abafana bayo.

Iyi kipe ikoresha hafi miliyoni 32 Frw ku kwezi, iherutse guha abakinnyi bayo bo mu ikipe ya mbere n’iy’abato ibihumbi 50 Frw byo kwifashisha muri ibi bihe bya Coronavirus, mu gihe ubuyobozi buvuga ko bukomeje gushaka igisubizo ku mishahara uhereye ku ya Gashyantare.

Indi nkuru wasoma: Mu Rwanda birashoboka kugabanyiriza abakinnyi imishahara mu bihe bya Coronavirus?- Icyo abayobozi b’amakipe babivugaho.

Perezida wa Rayon Sports, Munyakazi Sadate (iburyo) yasabye ko Leta y'u Rwanda yafasha amakipe guhemba abakinnyi mu bihe bya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .