Kagere yafashije Simba SC kwegukana shampiyona, Haruna akora amateka muri Tanzania (Amafoto)

Yanditswe na Eric Tony Ukurikiyimfura
Kuya 21 Gicurasi 2019 saa 08:40
Yasuwe :
0 0

Rutahizamu w’Umunyarwanda, Meddie Kagere, yafashije Simba SC kwegukana Igikombe cya Shampiyona ubwo yayiboneraga kimwe mu bitego bibiri yatsinze Singida United kuri uyu wa Kabiri, tariki ya 21 Gicurasi 2019.

Kapiteni w’Ikipe y’Igihugu Amavubi, Haruna Niyonzima, na we ukinira Simba SC, yahise aba umukinnyi wa mbere wegukanye shampiyona ya Tanzania inshuro eshanu zikurikiranya.

Simba SC yagiye gukina uyu mukino irusha Yanga SC ya kabiri amanota atanu, aho yari ikeneye amanota abiri gusa ikegukana igikombe mu gihe habura imikino ibiri ngo shampiyona irangire.

Meddie Kagere yafunguye amazamu ku munota wa cyenda w’umukino mu gihe ikindi gitego cyatsinzwe na John Raphael Bocco ku wa 60. Uyu rutahizamu w’Umunyarwanda yasimbuwe na Clatous Chama habura iminota itanu ngo umukino urangire mu gihe Haruna Niyonzima we yari yasimbuwe na Hassan Dilunga ku munota wa 79.

Simba SC yegukanye igikombe n’amanota 91 mu mikino 36 mu gihe habura ibiri ngo shampiyona igere ku musozo. Iyi kipe yatwaye igikombe cya 20 mu gihe Yanga SC yo imaze kwegukana shampiyona inshuro 27.

Kagere yujuje ibitego 23 muri Shampiyona ya Tanzania n’ibitego 34 atsindiye Simba SC muri uyu mwaka w’imikino mu gihe Haruna Niyonzima yinjiye mu mateka nk’umukinnyi wa mbere wegukanye ibikombe bya shampiyona ya Tanzania inshuro eshanu zikurikiranya.

Simba SC isigaje imikino ibiri izahuramo na Biashara United na Mtibwa Sugar, ni yo izongera guhagararira Tanzania muri CAF Champions League ya 2019/2020, mu irushanwa yagarukiye muri ¼ muri uyu mwaka w’imikino.

Simba SC yisubije igikombe cya shampiyona
Meddie Kagere (ubanza ibumoso mu bahagaze) na Haruna Niyonzima (wa kabiri ibumoso mu bunamye) babanje mu kibuga
Simba SC yegukanye shampiyona habura imikino ibiri ngo igere ku musozo
Haruna Niyonzima (ibumoso) asuka amazi ku mutoza Patrick Aussems
Kagere Meddie n'umunyezamu Deogratias Munishi babyinira imbere y'abafana
Byari ibyishimo bikomeye mu rwambariro rwa Simba SC
Erasto Nyoni ateruye igikombe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza