Kagame, Ahmad na Eto’o baganiriye ku kwakirira umukino wa nyuma wa CAF Champions League mu Rwanda

Yanditswe na Ishimwe Israel
Kuya 16 Gashyantare 2020 saa 08:48
Yasuwe :
0 0

Perezida Paul Kagame yahuye n’uw’Impuzamashyirahamwe y’Umupira w’Amaguru muri Afurika, Ahmad Ahmad; Visi Perezida wa CAF, Constant Omari n’Umunya-Cameroun, Samuel Eto’o bagirana ibiganiro ku guha u Rwanda kwakira umukino wa nyuma wa CAF Champions League.

Umukuru w’Igihugu yahuriye n’aba bayobozi mu Kigo cy’Imyitozo cya Gisirikare i Gabiro ahari kubera Umwiherero wa 17 w’abayobozi bakuru b’igihugu kuva ku wa 16 Gashyantare 2020.

Perezida Kagame yari aherekejwe n’Umuyobozi w’Ishyirahamwe ry’Umupira w’Amaguru mu Rwanda (Ferwafa), (Rtd) Brig Gen Sekamana Jean Damascène.

Uruzinduko rw’aba bagabo mu Rwanda, ibitangazamakuru byarwanditseho ko mu byaruganiriwemo harimo kwakirira umukino wa CAF Champions League mu gihugu.

Ahmad Ahmad n’umujyanama we wihariye Samuel Eto’o bageze mu Rwanda ku wa 15 Gashyantare 2020.

Afriquesports yanditse ko aba bagabo bombi bari mu Rwanda gushaka igisubizo ku hazaza h’irushanwa rihuza amakipe yabaye aya mbere iwayo ku Mugabane wa Afurika, CAF Champions League.

Samuel Eto’o uri mu Rwanda afitanye umubano wihariye narwo ndetse ari mu bagize uruhare mu gusunika amasezerano rwasinyanye na PSG yo kwamamaza ubukerarugendo bwarwo.

Abasesenguzi bavuga ko uyu rutahizamu wakanyujijeho ashobora no kuba umuyoboro woroshya icyifuzo cyo guha u Rwanda kwakira imikino ya nyuma ya CAF Champions League.

Nubwo ibi biganiro byabayeho, ntiharemezwa aho uwo mukino wabera cyane ko Stade Amahoro yakira abafana benshi [25 000] yari yarakuwe mu bibuga byemewe na CAF. Guverinoma yatangaje ko hari gahunda yo kuvugurura iki kibuga gifite ubwatsi bwiza.

Muri Nyakanga 2019 nibwo CAF yemeje impinduka mu buryo imikino ya nyuma ya CAF Champions League na CAF Confederation Cup yakinwagamo aho guhera muri uyu mwaka, umukino wa nyuma uzaba umwe aho kuba ibiri ndetse ukajyanwa ku kibuga cyihariye.

Aya marushanwa yatangiye kuba mu myaka 55 ishize, yari asanzwe asozwa n’imikino ibiri aho buri kipe yagiraga umwe yakira, hakabaho ubanza n’uwo kwishyura.

Ni icyemezo cyafashwe nyuma y’imvururu zabaye ku mukino wa nyuma wa CAF Champions League wahuje Espérance de Tunis na Wydad Casablanca mu mwaka ushize.

Iyi kipe yo muri Maroc yahisemo kuva mu kibuga umukino wo kwishyura utarangiye kuko yangiwe igitego yatsinze ku munota wa 60.

Icyo gihe CAF yari yasabye Espérance de Tunis gusubiza igikombe yahawe, uyu mukino wa nyuma ugasubirwamo mu gihe aya makipe yombi yagaragaje ko adashaka kongera gukina, buri imwe ivuga ko ari yo ikwiye guhabwa igikombe, ariko umwanzuro w’Urukiko rwa Siporo (TAS) rukorera i Lausanne mu Busuwisi, wemeza ko iyi kipe yo muri Tunisie ari yo yegukanye irushanwa.

Mu mpinduka nshya byari byatangajwe ko ibihugu bya Misiri, Gabon, Sudani, Maroc na Afurika y’Epfo bifite amahirwe yo kwakira umukino wa nyuma wa Champions League. Icyemezo cya nyuma ku mujyi uzawakira cyagombaga gutangazwa ku wa 9 Gashyantare 2020.

Kugeza ubu iri rushanwa rigeze muri ¼, risigayemo amakipe ya Al Ahly (Misiri), Zamalek SC (Misiri), TP Mazembe (RDC), ES Tunis (Tunisie), Raja Casablanca (Maroc), Wyadad Casablanca (Maroc), Étoile du Sahel (Tunisie) na Mamelodi Sundwons (Afurika y’Epfo).

Ku wa 28 Gashyantare 2020 nibwo hazakinwa imikino ibanza muri ¼ mu gihe umukino wa nyuma uteganyijwe ku wa 29 Gicurasi 2020.

Perezida Kagame yakiriye Perezida wa CAF, Ahmad Ahmad na Visi Perezida w'Impuzamashyirahamwe y’Umupira w’Amaguru muri Afurika, Constant Omari i Gabiro
Perezida Kagame ari kumwe na Perezida w’Ishyirahamwe ry’Umupira w’Amaguru mu Rwanda (Ferwafa), (Rtd) Brig Gen Sekamana Jean Damascène; Perezida wa CAF, Ahmad Ahmad; Visi Perezida w'Impuzamashyirahamwe y’Umupira w’Amaguru muri Afurika, Constant Omari n’Umunya-Cameroun, Samuel Eto’o Fils
Espérance de Tunis yo muri Tunisie ni yo yegukanye CAF Champions League mu mwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza