00:00:00 IGIHE NETWORK KN KINYARWANDA EN ENGLISH FR FRANCAIS

Juventus yakuweho amanota 15

Yanditswe na IGIHE
Kuya 21 Mutarama 2023 saa 09:22
Yasuwe :

Ikipe ya Juventus yo mu Cyiciro cya Mbere mu Butaliyani, yakuweho amanota 15 nyuma y’iperereza yakozweho n’Ishyirahamwe rya Ruhago muri icyo gihugu (FIGC) ku bijyanye n’uburyo yagiye igura abakinnyi.

Iyi kipe y’ikigugu muri Serie A yashinjwe kuzuza impapuro z’amafaranga yakoresheje mu kugura abakinnyi mu buryo butagaragaza neza ayo yatanze.

Juventus yari ku mwanya wa gatatu ariko irahita yisanga ku wa 10 nyuma yo gukurwaho amanota 15.

Abayobozi b’Inama y’Ubutegetsi y’iyi kipe, barimo Andrea Agnelli wari perezida na visi pereza Pavel Nedved, bose beguye mu Ugushyingo.

Juventus yavuze ko nta kibi yakoze, yemeza ko izajuririra icyemezo yafatiwe mu Rukiko rwa Komite Olempike y’u Butaliyani (CONI).

Mu itangazo iyi kipe yashyize hanze, yavuze ko “itegereje ko hatangazwa impamvu zo gufata icyemezo.”

Igihano cyatanzwe na FIGC kiraremereye ugereranyije n’amanota icyenda abashinjacyaha bari basabiye Juventus

Uretse guhanwa kw’iyi kipe, uwahoze ari Umuyobozi wayo wa Siporo, Fabio Paratici, ubu ushinzwe umupira w’amaguru muri Tottenham, yahagaritswe amezi 30.

FIGC yahannye kandi Agnelli n’uwahoze ari umuyobozi ushinzwe ibikorwa bya Juventus, Maurizio Arrivabene, guhagarikwa imyaka ibiri. Ni mu gihe Federico Cherubini ushinzwe siporo muri iyi kipe yahagaritswe amezi 16.

Muri rusange, abahoze mu buyobozi bwa Juventus n’ababurimo uyu munsi bagera kuri 11, ni bo bahanwe barimo Nedved wahagaritswe amezi umunani.

FIGC yavuze ko ibihano bahawe bigiye gukurikirwa n’ubusabe bwo kugera ku rwego rwa UEFA na FIFA ndetse no hirya no hino ku Isi.

Muri Mata 2022, Juventus n’andi makipe 10 arimo Napoli, yari akurikiranyweho guhisha amafaranga yaguze abakinnyi. Icyo gihe, Paratici na Agnelli bari mu bantu 59 bagizwe abere.

Iperereza ryongeye gufungurwa mu Ukuboza nyuma y’uko umushinjacyaha mukuru asabye ko icyo cyemezo kijuririrwa.

Juventus yegukanye ibikombe icyenda byikurikiranya muri Serie A ubwo yari iyobowe na Agnelli mu gihe cy’imyaka 13, ariko yasoreje ku mwanya wa kane mu mwaka ushize w’imikino. Yari ifite igihombo cya miliyoni 220£, ari na cyo kiri hejuru mu mupira w’u Butaliyani.

Inama y’Ubutegetsi nshya yemejwe ku wa Gatatu w’iki cyumweru, iyobowe na Gianluca Ferrero wasimbuye Agnelli nka perezida.

Ibihano Juventus yahawe bije bisanga iperereza iri gukorwaho na UEFA ku kwica amategeko agenga imibereho y’amakipe n’ikoreshwa ry’umutungo wayo, ryatangajwe mu kwezi gushize.

Ku Cyumweru, Juventus izakira Atalanta muri Shampiyona.

Juventus igiye gukurwaho amanota 15
Abahoze ari abayobozi ba Juventus bahagaritswe mu bikorwa bya ruhago

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .