Johnny McKinstry yiteze guhangana gukomeye k’u Rwanda na Uganda muri CHAN 2020

Yanditswe na Eric Tony Ukurikiyimfura
Kuya 18 Gashyantare 2020 saa 04:32
Yasuwe :
0 0

Umutoza Mukuru w’ikipe y’Igihugu ya Uganda ‘Cranes’, Johnny McKinstry, yiteze ko umukino uzahuza ikipe ye n’iy’u Rwanda muri CHAN 2020 izabera muri Cameroun, uzarangwa n’ihangana ryo ku rwego rwo hejuru mu minota yose uko ari 90.

McKinstry wigeze kuba umutoza w’Amavubi hagati ya 2015 na 2016, yabitangaje mu kiganiro yagiranye na Shene ya Televiziyo y’Ishyirahamwe ry’Umupira w’Amaguru muri Uganda, FUFA, aho yabazwaga kuri tombora ya CHAN 2020 yaraye ibereye muri Cameroun.

Uyu mugabo w’imyaka 33, watandukanye n’u Rwanda nabi ndetse akarucisha amande ya miliyoni hafi 200 Frw nyuma yo kururega muri FIFA, avuga ko nta kipe azi kurusha izindi nk’Amavubi.

Ati “Muri Afurika nta kipe nzi neza kurusha u Rwanda. Abakinnyi benshi (baba abo mu ikipe nkuru cyangwa iya CHAN) ntabwo bankiniye ariko ninjye wabahamagaye bwa mbere. Hari umubano dufitanye, ariko iminota 90 y’umukino izarangwa no guhangana. Ndizera ko dufite icyo bisaba cyose kugira ngo tubone amanota yose, atari k’u Rwanda gusa ahubwo no kuri Maroc.”

Johnny McKinstry ni we mutoza wagejeje Amavubi kure muri CHAN mu nshuro eshatu amaze kuyikina, aho ubwo iri rushanwa ryari ryakiriwe n’u Rwanda mu 2016, bageranye muri ¼, basezererwa na Repubulika Iharanira Demokarasi ya Congo yatsinze Amavubi ibitego 2-1.

Yavuze ko itsinda C ikipe ye izaba ihuriyemo n’u Rwanda, Maroc na Togo ari itsinda ryiza kuko ririmo amakipe yo mu bice byose bya Afurika kandi amakipe yose akaba afite umukino wayo wihariye.

CHAN 2020 izatangira tariki ya 4 kugeza ku ya 25 Mata 2020. Umukino wa mbere w’u Rwanda muri iri rushanwa uzaruhuza na Uganda mu Mujyi wa Douala.

Johnny McKinstry aha amabwiriza abakinnyi b'Amavubi muri CHAN 2016 ubwo u Rwanda rwahuraga na Repubulika Iharanira Demokarasi ya Congo
McKinstry wabaye umutoza w'Amavubi mu myaka ine ishize, kuri ubu ni Umutoza wa Uganda 'Cranes'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .