00:00:00 IGIHE NETWORK KN KINYARWANDA EN ENGLISH FR FRANCAIS

Jamel Eddine Neffati yongeye kugirwa umutoza wungirije wa APR FC

Yanditswe na IGIHE
Kuya 6 Mutarama 2023 saa 01:47
Yasuwe :

Ikipe y’Ingabo z’Igihugu igiye kugarura umutoza w’Umunya-Tunisia, Jamel Eddine Neffati, kungiriza mugenzi we Ben Moussa bakomoka mu gihugu kimwe.

Neffati yakoze muri APR FC bwa mbere umwaka umwe hagati ya Nyakanga 2021 na Nyakanga 2022.

Nyuma y’uko Umunya-Maroc Mohammed Adil ataye ikipe agasubira iwabo mu Ukwakira 2022, byabaye ngombwa ko ikipe y’Ingabo z’Igihugu isigarana Ben Moussa wari usanzwe ari umutoza wungirije, agirwa umutoza mukuru.

Akazi nk’umutoza mukuru Moussa yagatangiye tariki 12 Ukwakira ku mukino APR FC yatsinzemo Marines FC ibitego 2-0 anasozanya na yo imikino ibanza ya Shampiyona y’uyu mwaka nubwo agikorera ku masezerano y’umutoza wungirije.

Nk’uko amakuru agera kuri IGIHE abyemeza, nta gihindutse Jamel Eddine Neffati ufite ’Licence B’ ya CAF azagera i Kigali tariki 7 Mutarama iminsi ibiri mbere y’uko APR FC itangira imyitozo.

Azerekwa itangazamakuru tariki 8 Mutarama naho tariki 9 Mutarama ajye ku kibuga cy’imyitozo i Shyorongi gukoresha imyitozo ya mbere.

Jamel Eddine Neffati wagaruwe ku busabe bw’umutoza mukuru Ben Moussa, yatoje mu ikipe ya Avenir Sportif de la Marsa yo muri Tunisia kuva muri 2013 kugeza mu 2015, Association Sportive de Ariana yo muri Tunisia 2015-2016, Olympique de Beja yo muri Tunisia 2016-2017, Club Africain yo muri Tunisia 2018-2019, imyaka ibiri mu ikipe ya Al Nahda FC yo muri Arabie Saoudite kuva 2019 kugeza 2021.

Yanatoje imikino ibanza ya shampiyona mu ikipe ya Etoile Sportif Metlaoui yo muri Tunisia 2017-2018.

Uyu mutoza kandi akaba afite impamyabumenyi zitandukanye aho mu 2021 yabonye impamyabumenyi muri ’physique’ mu ishuri rya Institute de Sport et l’Education Physique de Ksar ryo muri Tunisia, muri 2015 abona impamyabumenyi y’ikirenga mu kongerera imbaraga abakinnyi ayikuye muri Université Centrale de Tunis.

Usibye izo mpamyabumenyi zo kongerera imbaraga abakinnyi, Jamel Eddine Niffati afite impamyabumenyi ya FIFA ndetse n’iy’ishyirahamwe ry’umupira w’amaguru muri Tunisia yo kongerera imbaraga abakinnyi.

Ni umutoza ufite impamyabumenyi zitandukanye mu kongera imbaraga ndetse na 'Licence B' ya CAF yo gutoza
Jamel Eddine Neffati bwa mbere yazanywe na Mohammed Adil wahoze ari umutoza wa APR FC bakoranye umwaka umwe
Ben Moussa agiye guhabwa amasezerano nk'umutoza mukuru nyuma yo kwitwara neza mu mikino y'igice kibanza cya shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .