00:00:00 IGIHE NETWORK KN KINYARWANDA EN ENGLISH FR FRANCAIS

Inshundura arazihumurirwa, ni ‘Haaland’ w’i Kigali: Imanizabayo yavuze ku buzima bwe muri Rayon Sports WFC (Video)

Yanditswe na Byiringiro Osée Elvis
Kuya 13 Mutarama 2023 saa 07:52
Yasuwe :

Tariki ya 26 Ukwakira 2022 yinjiye mu mateka ya Imanizabayo Florence mu rugendo rwe nk’umukinnyi wa ruhago. Uyu munsi ni wo yatangajweho nk’umukinnyi mushya muri Rayon Sports y’Abagore.

Rayon Sports Women Football Club ni ikipe nshya muri Shampiyona y’Icyiciro cya Kabiri mu Bagore.

Uvuze izina ryayo, ntashobora kuritandukanya na Imanizabayo Florence, rutahizamu wayo uri mu bamaze kwigarurira igikundiro bitewe n’inshuro anyeganyeza inshundura.

Imanizabayo Florence yasinye umwaka umwe muri Rayon Sports, avuye muri AS Kigali yari amazemo imyaka itanu.

Uyu mukinnyi si umwihariko wo gutsinda gusa afite kuko n’uburyo bwo kwishimira igitego akora siporo nabwo butuma benshi bamutangarira.

Kuri ubu ku mbuga nkoranyambaga, amafoto ye iyo Rayon Sports WFC yakinnye aba acicikana ndetse n’amashusho amugaragaza mu kibuga uhura na yo henshi kuva kuri YouTube kugera ku zindi mbuga nkoranyambaga nka WhatsApp, Facebook, Twitter na Instagram.

Imanizabayo avuka mu Karere ka Rubavu, ni bucura mu muryango w’abana bane. Yivuga nk’umuntu ukunda umurimo, Imana ndetse no kwishima.

Mu kiganiro cyihariye yagiranye na IGIHE, Imanizabayo yagarutse ku ngingo zitandukanye zirimo uko ari kwitwara muri Rayon Sports Women FC, urugendo rwe ndetse n’inzozi afite muri uyu mukino wigaruriye benshi ku Isi.

Urugendo rw’umupira w’amaguru yarutangiye yiga mu mashuri abanza ubwo yabonwaga n’umutoza wo mu Karere ka Rubavu, uzwiho kuzamura impano z’abato, Mungo Jitiada ’Vigoureux’.

Yakomereje mu Ikipe ya Remera Rukoma, ayivamo yinjira muri AS Kigali yakiniye imyaka itanu mbere yo kubengukwa na Rayon Sports.

  Urugendo rwa Imanizabayo muri Ruhago

Imanizabayo avuga ko gukura agendana n’abahungu no kwitwara nka bo, byatumye akina umupira, anakora n’imyitozo ngororamubiri (Acrobatie).

Uyu mukobwa yaje kwisanga cyane mu mupira w’amaguru, aba ari na ko kazi yimariramo kugeza n’uyu munsi.

Urugendo rwe rweruye mu mupira w’amaguru, uyu mukobwa yarutangiriye mu Karere ka Rubavu iwabo, aho yabonywe n’umutoza Vigoureux, akamubonamo impano.

Mu kubara iyo nkuru, avuga ko byatangiye bigoye kuko ababyeyi batumvaga uburyo umwana w’umukobwa yakina umupira w’amaguru.

Ati “Ubundi kera iwacu bavugaga ko umukobwa wakinnye umupira aba yarananiranye. Natangiye gukina kwa ‘Vigoureux’ nkiri iwacu i Rubavu. Nahise nkomereza muri Kamonyi muri Remera Rukoma nakiniye imyaka ine. Ndangije amashuri nahise nerekeza muri AS Kigali mpakina imyaka itanu, ubu ndi muri Rayon Sports.”

  Impamvu yo kuva mu cyiciro cya mbere akerekeza mu cya kabiri

Kubona Imanizabayo muri Rayon Sports Women FC byatunguye benshi cyane ko yari ikipe nshya, by’umwihariko iri mu cyiciro cya kabiri.

Uyu mukobwa avuga ko urukundo afitiye ikipe y’abagabo ndetse n’umwuka mubi wari hagati ye n’umutoza wa AS Kigali, biri mu byoroheje igenda rye.

Ati “Ubundi njye ndi umufana wa Rayon Sports. Numvise ko bazanye ikipe y’Abagore, nahise nsesa amasezerano y’amezi atatu nari nsigaje muri As Kigali, cyane ko ntari mbanye neza n’umutoza. Rero naje muri Rayon Sports nyikunze kandi mbyishimiye cyane.”

Imanizabayo udakunda kugaruka ku bijyanye n’amafaranga yaguzwe, benshi banatekereza ko ari yo yabasha gukura umukinnyi mu cyiciro cya mbere akajya mu cya kabiri, yemeza ko ayo yasabye ari yo yahawe.

  Ibanga ry’ibitego Imanizabayo ari gutsinda

Kugeza ubu mu mikino ine ya Shampiyona y’Icyiciro cya Kabiri mu Bagore, Imanizabayo amaze gutsinda ibitego 16.

Uyu mukobwa avuga ko kwitwara neza abikesha umutoza we uhora umwigisha gutera mu izamu.

Ati “Icya mbere gifasha umukinnyi twitwara neza ni imyitozo aba yahawe. Dufite umutoza mwiza uduha imyitozo myiza pe, ha handi wumva ko utayipfusha ubusa. By’umwihariko rero njye ahora anyigisha gutera mu izamu.’’

  Ab’i Kigali batangiye kugereranya Imanizabayo na Haaland

Imanizabayo yatangiye kugereranywa na rutahizamu wa Manchester City, Erling Haaland kubera ibitego byinshi bombi bari gutsinda.

Haaland amaze gutsinda ibitego 21 mu mikino 16 amaze gukinira Manchester City muri Premier League kuva yayigeramo mu mpeshyi ya 2022.

Uyu mukobwa avuga ko ibyo ari kubona muri Rayon Sports atigeze abibona mu makipe arimo n’iyo aherukamo.

Yagize ati “Ibyo ndi kubona muri Rayon Sports ntabwo nabibonye muri AS Kigali kandi naho naratsindaga. Ubwo rero niba batangiye kungereranya na Haaland, bizaba byiza n’ubutaha bangereranye n’undi cyangwa nzagere no ku rwego rwe, nta wamenya.”

  Impamvu Imanizabayo yishimira igitego atera siporo

Imanizabayo iyo atsinze igitego acyishimira atera siporo nyinshi by’umwihariko iyitwa icy’inyuma.

Uyu mukobwa yasobanuye ko kuba yarakuze ari akina ‘acrobatie’ bituma yisanga na we ari uko yishimiye igitego.

Ati “Kera nkiri umwana nakinnye ‘Acrobatie’ nk’umwaka, rero nanjye nisanga ariko nishimiye igitego kuko byangiyemo, bindi mu maraso.”

Imanizabayo Florence afite intego yo gusoza Shampiyona y’Icyiciro cya Kabiri mu Bagore ayoboye bagenzi be ndetse yarinjije nibura ibitego 35.

Imanizabayo yatunguranye yerekeza muri Rayon Sports yo mu cyiciro cya kabiri avuye muri AS Kigali itwara ibikombe mu cyiciro cya mbere
Imanizabayo amaze gutsinda ibitego 16 mu mikino ine
Imanizabayo avuga ko kwishimira igitego atera siporo biri mu maraso kuko yakuze akina acrobatie
Imanizabayo amaze gucyura imipira itatu kubera gutsinda ibitego bitatu mu mukino umwe
Imanizabayo yakiniye AS Kigali WFC imyaka itanu

Video: Byiringiro Ephter

Graphics: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .