Incyuro za Munyakazi Sadate nyuma y’intsinzi ya AS Kigali yasezereye KCCA

Yanditswe na Umwali Zhuri
Kuya 7 Mutarama 2021 saa 10:02
Yasuwe :
0 0

Munyakazi Sadate wahoze ari Umuyobozi wa Rayon Sports, yacyuriye AS Kigali ko yafashijwe na COVID-19 gusezerera KCCA muri CAF Confederation nyuma y’uko itsinzwe ibitego 3-1 ku wa Gatatu, ariko igakomeza kuko yari yahawe mpamba y’ibitego 2-0 mu mukino ubanza.

AS Kigali ihagarariye u Rwanda mu mikino Nyafurika ya CAF Confederation Cup, yasabwaga kudatsindwa ikinyuranyo cy’ibitego bitatu mu mukino w’ijonjora rya kabiri wabereye muri Uganda ku wa Gatatu.

Ibitego bitatu bya KCCA byatsinzwe na Brian Aheebwa ku munota wa mbere, uwa 37 n’uwa 75 mu gihe icya AS Kigali cyinjijwe na Hakizimana Muhadjiri kuri penaliti yo ku munota wa 49.

Iki gitego cyo hanze ni cyo cyafashije AS Kigali gukomeza kuko amakipe yombi yanganyije ibitego 3-3 mu mikino yombi, hitabazwa itegeko ry’igitego cyo hanze, ubundi iyo habayeho kunganya gihabwa agaciro kisumbuyeho.

Gukomeza kwa AS Kigali ntibyavuzweho rumwe na benshi, bamwe bayishimira bavuga ko ikomeje guhesha ishema u Rwanda mu gihe hari n’abavugaga ko COVID-19 yabigizemo uruhare kugira ngo igere mu ijonjora rya nyuma rigana mu matsinda.

Munyakazi Sadate wabaye Umuyobozi wa Rayon Sports hagati ya Nyakanga 2019 na Nzeri 2020, yagize ati “Ibyishimo byinshi ku ikipe y’Abanyamujyi babashije gusezera KCCA; bakaba bayisezereye binjije mu izamu ryayo igitego kimwe yo ibinjijemo bitatu gusa hakomeza AS de Kigali kubera COVID 19; aya mahirwe azabeherekeze kugera kure hashoboka bavandi; ubundi ibi nibyo bita Ubunyamujyi.”

Ibi abihuriraho n’abandi barimo Niyigena Alexis wagize ati “Uko ni ko kuri rwose KCCA yakinnye Covid-19 izengereje Isi iba ikiraro cyambutsa AS Kigali. Gusa umupira wabo ntawo pe! Nibatisubiraho nta matsinda mbabonyemo pe.”

Uwiyise Real Gospel yagize icyo avuga ko ku byanditswe na Munyakazi Sadate, agaragaza ko AS Kigali yabyaje umusaruro amahirwe yabonye.

Ati “Ubajombye aharyana ariko ni ukuri kuzuye, gusa umugabo abyaza amahirwe yose abonye umusaruro. Tubifurije imbere heza,”

Habimana Hassan yagize ati “Mu makipe azavuga ko yungukiye mu bihe bya COVID-19 na AS Kigali nayo irimo. Ubabwije ukuri pe.”

AS Kigali yabonye itike yo gukina CAF Confederation Cup ya 2020/21 nyuma y’uko Igikombe cy’Amahoro cya 2020 gisheshwe burundu, kigafatwa nk’ikitarabayeho kubera COVID-19. Byatumye Komite Nyobozi ya FERWAFA yanzura ko iyi kipe yatwaye irushanwa rya 2019 yongera gusohoka bwa kabiri yikurikiranya.

Ikipe y’Umujyi wa Kigali yasezereye Orapa United yo muri Botswana mu ijonjora ribanza, yateye mpaga ya 2-0 KCCA FC mu mukino ubanza w’ijonjora rya kabiri wari kubera i Nyamirambo ku wa 23 Ukuboza 2020 kuko iyi kipe yo muri Uganda yari yazanye abakinnyi 15, babiri muri bo bandura COVID-19 kandi amategeko avuga ko ikipe igomba kuba ifite byibuze abakinnyi 15 barimo n’umunyezamu kugira ngo umukino ube.

Mu ijonjora ribanziriza amatsinda, AS Kigali izahura n’imwe mu makipe yasezerewe mu ijonjora rya kabiri rya Champions League arimo Gor Mahia, Asante Kotoko, Bouenguidi Sports, Young Buffaloes, Enyimba, Ahli Benghazi, Stade Malien, RC Abidjan, Nkana FC, Platinum, CS Sfaxien, Primeiro do Agosto, Jwaneng Galaxy, AS SONIDEP, Raja Casablanca na FC Gazelle.

AS Kigali yasezereye KCCA nubwo yatsinzwe ibitego 3-1 mu mukino wabereye i Kampala ku wa Gatatu
Munyakazi Sadate ni umwe mu bavuze ko AS Kigali ikomeje kubera COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .