Imwe mu mikino ikomeye ya FA Cup izerekanwa kuri StarTimes

Yanditswe na Eric Tony Ukurikiyimfura
Kuya 22 Mutarama 2020 saa 08:59
Yasuwe :
0 0

Irushanwa rya FA Cup ritegurwa n’Ishyirahamwe ry’Umupira w’Amaguru mu Bwongereza (F.A) rirakomeza mu mpera z’icyumweru hakinwa ijonjora rya kane rizitabirwa n’amakipe 32.

Iminsi ine mbere y’uko haba Noheli mu mwaka ushize, Shrewsbury Town yerekeje ku kibuga cya Blackpool gukina umukino wa Shampiyona y’icyiciro cya gatatu, wabereye imbere y’abafana 7,659 ndetse ihatsindira igitego 1-0 cya Fejiri Okenabirhie kuri penaliti.

Kuri uwo munsi kandi, mu bilometero bisaga 7,000 uvuye mu Bwongereza ugana muri Qatar, muri Khalifa International Stadium yakira abantu ibihumbi 45, Liverpool yahatsindiye Flamengo yo muri Brésil igitego 1-0, yegukana Igikombe cy’Isi cy’Amakipe.

Ku Cyumweru, Okenabirhie na bagenzi be, bazagira amahirwe yo guhura n’ikipe ya mbere ku Isi mu mukino uzahuza Shrewsbury na Liverpool muri 1/16 cya FA Cup.

Ikinyuranyo kiri hagati y’amakipe yombi ni kinini dore ko Liverpool iyoboye Shampiyona y’icyiciro cya mbere n’ikinyuranyo cy’amanota 13 nyuma yo gutsinda Manchester United ibitego 2-0 ku Cyumweru mu gihe Shrewsbury ari iya 16 mu cyiciro cya gatatu, ni nyuma yo kunganya na Fleetwood ibitego 2-2 ku wa Gatandatu.

Urubuga rwa Transfermarkt.co.uk rwatangaje ko agaciro k’abakinnyi bose ba Shrewsbury kangana na miliyoni 5.58£ mu gihe abanyezamu batatu b’ikipe ya kabiri ya Liverpool (bose barushwa agaciro n’abakinnyi 24 bo mu ikipe ya mbere) bafite agaciro kangana na miliyari 1.07£.

Myugariro w’iyi kipe yo mu cyiciro cya gatatu, Sam Hart, avuga ko gukina na Liverpool ku bwe, bizaba ari inzozi zibaye impamo.

Uyu mukinnyi wageze muri Shrewsbury nk’intizanyo, avuye muri Blackburn Rovers mu cyumweru gishize, yakiniye Liverpool umukino umwe ubwo Jürgen Klopp yamushyiraga mu kibuga ku mukino wa gicuti wabahuje na Mainz muri Kanama 2016.

Ati “Biragoye kubyumva. Ikintu cya mbere umutoza yambwiye muri Blackburn ni uko bari bagiye gukina na Liverpool mu cyumweru gikurikiraho kandi ni byiza kuzabona benshi bahoze ari inshuti zanjye. Nditeguye kandi nizeye kuzabona umwanya wo gukina. Bizaba bishimishije kuko nakiniye hariya nkiri muto, mpamara imyaka ine.”

Shrewsbury si yo kipe y’akana isigaye muri iri rushanwa gusa kuko n’umukino uzahuza Tranmere Rovers na Watford ufatwa nka Dawidi uzaba yahuye na Goliath. Watford yari yanganyije n’iyi kipe yo mu cyiciro cya gatatu ibitego 3-3 bituma umukino uzasubirwamo kugira ngo haboneke ikipe igera muri 1/16.

Manchester City ifite igikombe giheruka, irasa n’iyarekuye ku gikombe cya Shampiyona, ndetse amaso iyahanze umukino izahuramo na Fulham kuri Etihad Stadium mu gihe abaturanyi bayo, Manchester United, bo bazahura n’izakomeza hagati ya Tranmere Rovers na Watford zikina kuri uyu wa Kane.

Ku wa Mbere, Arsenal imaze kwegukana iri rushanwa inshuro nyinshi, 13, izakirwa na Bournemouth nayo ikina muri Premier League.

Abakunzi b’umupira w’amaguru aho bari hose muri Afurika, bazabasha gukurikirana iyi mikino ya FA Cup kuko StarTimes nk’ikigo kiyoboye ibindi mu ikoranabuhanga ryo gusakaza amashusho ya televiziyo, izayerekana ku mashene yayo y’umupira w’amaguru.

Umukino wa Arsenal na AFC Bournemouth ni umwe mu itegerejwe mu ijonjora ritaha rya FA Cup

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza