00:00:00 IGIHE NETWORK KN KINYARWANDA EN ENGLISH FR FRANCAIS

Imvano yo guhangana hagati ya Real Madrid na FC Barcelone zigiye gucakirana muri El Clásico

Yanditswe na Iradukunda Olivier
Kuya 15 Mutarama 2023 saa 02:17
Yasuwe :

Kuri iki Cyumweru saa tatu z’ijoro nibwo hategerejwe umukino ufatwa nk’uwa mbere ku Isi uhuza FC Barcelone na Real Madrid, mu mukino wa nyuma wa Supercopa de España, kuri King Fahd International Stadium mu Mujyi wa Riyadh muri Arabie Saoudite.

Iri rushanwa rihuza amakipe yageze ku mukino wa nyuma muri Copa del Rey n’amakipe abiri ya mbere muri shampiyona, La Liga.

Kuri uyu mukino, FC Barcelone yahageze imaze gutsindira Real Betis kuri penariti 4-2 nyuma yo kunganya ibitego 2-2. Real Madrid na yo yaguye miswi na Valencia, gusa igira amahirwe ikomeza kuri penaliti 4-3.

Kuba zombi zarageze kuri uyu mukino wa nyuma bisa n’aho ari amahirwe, ntibikuraho ko umukino wazo uza kuba ukomeye kuko buri kipe iraba yifuza iki gikombe kiruta ibindi muri Espagne.

Uyu mukino ugiye kuba FC Barcelone iri mu bihe byiza, kuko iri imbere ya mukeba wayo amanota atatu muri Shampiyona y’imbere mu gihugu.

Imvano yo guhangana kwa Real Madrid na FC Barcelone

Benshi mu bakunzi ba ruhago bibaza umwihariko utuma aya makipe abiri ahangana bikomeye ndetse n’ibanga rituma uyu mukino wahwe izina rya "El Clásico" uhuruza benshi mu batuye Isi.

Impamvu ya mbere ituma uyu mukino ukomera cyane, ni impamvu za politiki kuko Real Madrid ifatwa nk’ikipe ituruka ibwami mu gihe FC Barcelone ikomoka mu Ntara ya Catalonia imaze igihe ishaka kwiyomora kuri Espagne.

Mu 1936, uwitwa Francisco Franco yakoreye Coup d’Etat repubulika yari iya kabiri muri Espagne, maze ahita ategeka ko uwitwa Josep Sunyol wari umwanditsi ukomeye, anakuriye intara ya Catalonia ko afungwa ndetse akanatotezwa nta rubanza rubaye.

Ibi bintu byateje umwuka mubi mu batuye intara ya Catalonia, abaturage batangira gukora ibikorwa byinshi byagaragaza urwango bangaga uyu mugabo Franco wari umunyagitugu wo ku rwego rwo hejuru.

Ibi byavuye mu baturage basanzwe bikomereza no mu makipe akomeye mu mijyi ibiri yari ihanganye.

Real Madrid yashinzwe mu 1902, yahindutse ibendera ry’Umurwa Mukuru wa Espagne, naho FC Barcelone ari na yo nkuru yabayeho mu 1899 ifatwa nk’intwaro yo gushaka kwiyomora kuri Espagne.

Ku butegetsi bwa Franco, ni bwo ikipe ya FC Barcelone yafashe imvugo igaragara ku kibuga cya Spotify Camp Nou igiri iti "Més que un club", bisobanura ngo "Birenze kuba ikipe", aho bashakaga kugaragaza ko bunze ubumwe kurusha ikipe ya Real Madrid.

Icyo gihe kandi FC Barcelone yafatwaga nk’ikipe y’ibyigomeke, mu gihe Real Madrid yo yari ku ibere ndetse benshi mu Banya-Espagne bayikunda cyane.

Aha hahise havuka amatsinda y’abafana bita "Hooligans" hagati y’aya makipe yombi. Iyo yabaga yahuye habaga ibikorwa by’urugomo ndetse bamwe bakahatakariza ubuzima.

Indi ntandaro yo guhangana kw’aya makipe ni umukino wa ½ w’igikombe cyitwaga Copa del Generalísimo cyo mu mwaka wa 1943 aho ikipe ya FC Barcelone yatsinze Real madrid ibitego 3-0, iyitsindiye Catalonia maze bageze i Madrid, Barcelone ihura n’uruva gusenya bayinyagira ibitego 11-1.

Kuri uwo mukino wo kwishyura, abafana ba FC Barcelone bangiwe kwinjira muri stade, ndetse polisi y’i Madrid yari yabanje gutera ubwoba abakinnyi ba FC Barcelone, bituma bajya mu kibuga bakutse imutima nk’uko abakinnyi babitangaje nyuma y’umukino.

Icyo gihe byari bikomeye cyane kuko abafana ba Real Madrid bateraga amabuye abakinnyi ba FC Barcelone mu kibuga, kuri bo icyo gihe gutsinda ntibyashobokaga kuko bahohohotewe ku buryo bukomeye.

Nyuma yo kurangiza igice cya mbere bamaze kubanyabika 8-0, abakinnyi ba FC Barcelone banze kujya gukina igice cya kabiri. Umupolisi umwe yabasanze mu rwambariro, ababwira ko kwanga kujya mu kibuga bingana no kujya gereza. Ubwoba bwarabatashye bemera kujyamo binjizwa ibindi bitatu.

Umukinnyi w’Umunya-Argentina witwa Alfredo Di Stéfano, na we ntabura mu mateka y’aba bakeba, kuko yifujwe n’amakipe yombi yashakaga kumukura muri Los Millionarios yo muri Colombia.

Iki kirego cyinjiyemo FIFA ni ko gufata umwanzuro w’uko bagomba kumusaranganya, ikipe imwe ikamukinisha umwaka umwe indi ikamukinisha ukurikira. Abafana ba FC Barcelone byarabababaje ndetse birangira perezida wayo yeguye, gusa birangira Alfredo Di Stéfano akiniye Real Madrid burundu.

Ubwo yari muri Real Madrid, FC Barcelone yahise izana uwitwa László Kubala waje kubahoza ayo marira, ndetse ahangana na we muri iyo myaka.

Abenshi mu bakiriho ubu kandi bakurikiranira hafi umupira w’amaguru, ntibatinya kuvuga ko Luís Figo na we ari mu bateje umwuka mubi muri aya makipe yombi.

Mu 2000, Florentino Pérez yitegura kuyobora Real Madrid, yegereye rwihishwa Figo, amubwira ko naramuka ayoboye ikipe azava muri Barcelone agahabwa miliyoni 30 z’amadolari. Pérez yatsinze amatora ahita ategeka Figo kuza kuko yari yaramaze kubisinyira.

Figo yabitekerejeho asanga yarahubutse, noneho nk’uko FC Barcelone ijya inyuzamo ikagira ibibazo by’amikoro, yasabwe kwishyura za miliyoni zose, gusa irazibura, Figo abacika atyo. Icyo gihe yaba umukinnyi ndetse na Real Madrid banzwe urunuka.

Uru rwango ariko rwanyuzagamo rugacogora, kuko mu 2005 amakipe yombi yakiniye Santiago Bernabéu, Ronaldinho Gaúcho yacenze ba myugariro bose ba Real Madrid atsinda igitego, abikora inshuro ebyiri, abakunzi ba Real Madrid bose bahagurukira rimwe bamuha icyubahiro.

Icyo gihe ni we mukinnyi wa kabiri wari ubikorewe kuva aya makipe yabaho, kuko inshuro ya mbere byakorewe Diego Maradona.

Nyuma y’aba bagabo, haje Lionel Messi na Cristiano Ronaldo bakinnye uyu mukino, bakawutsindamo ibitego 38, harimo 20 bya Messi na 18 bya Ronaldo.

Aba bagabo bazaniweho bagenzi babo barimo Gareth Bale, Sergio Ramos na Karim Benzema muri Real Madrid, Luis Suárez, Gerard Piqué na Neymar Junior muri FC Barcelone.

Sergio Busquets ukinira FC Barcelone na Benzema ni bamwe mu bagiye guhurira kuri uyu mukino.

Benzema arawukina ku nshuro ye ya 42 ahagaze neza. Muri izi nshuro zose yabashije gutsindamo ibitego 11, atanga imipira 10 ivamo ibitego.

Mu irushanwa rya Supercopa de España bagiye gukina, baraza kuba bahuriraho ku nshuro ya 15. Muri izi nshuro Real Madrid ni yo ikunda kuryegukana kuko yatsinze inshuro icyenda, FC Barcelone iritsinda enye, bombi banganyije kabiri gusa.

Muri iki gikombe kandi Real yinjije ibitego 33, Barcelone yo yinjiza ibitego 20 gusa. Real ikomeza iri hejuru, kuko uko bahuriraga mu kindi gihugu kitari icyabo nkuko bimeze, yatsindaga umukino.

Iki gikombe kandi FC Barcelone ni yo imaze kucyegukana inshuro nyinshi, kuko yagitwaye inshuro 13, Real Madrid iyigwa mu ntege kuko imaze kucyibikaho inshuro 12.

Ibyatangajwe ku mpande zombi mbere y’umukino

Mbere y’umukino, mu kiganiro n’itangazamakuru, Benzema yavuze ko nk’ibisanzwe bagiye guhanganira igikombe ari cyo bahora basabwa n’ikipe, kandi ameze neza imvune zakize.

Ati "Turi muri Real Madrid idusaba igikombe byibuze buri mwaka, ndumva rero tuje gukina umukino wa nyuma kandi tukanawutsinda. Kugeza ubu ndi kugaruka mu bihe byiza, ndizera ko ubu mfite ubushobozi bwo gutsinda, gutanga imipira ivamo ibitego. Ubu mfite ubushobozi bwo gufasha bagenzi banjye."

Umutoza Xavier Hernández yavuze ko imbaraga ahanini baza kuzikura ku kuba bagiye guhura n’umutoza wa Real Madrid,Carlo Ancelotti, udakunze gutsindirwa ku mukino wa nyuma.

Ati "Turabizi ko tugiye gukina na Carlo Ancelotti, utaratsindwa ku mukino wa nyuma uhereye mu 2010. Ni byo biduteye imbaraga. Tugiye gukina n’ikipe irimo abakinnyi nkunda ndetse n’umutoza, nta kibazo kiri bube ku mukino kuko umupira w’amaguru atari intambara."

Mu myitozo amakipe yombi aherutse gukora, Cristiano Ronaldo uri gukina muri Shampiyona ya Arabie Saoudite, yasuye ikipe yahozemo mu myitozo, ndetse aganira n’abo bahoranye.

Uyu mukino FC Barcelone iraza kuba iyobowe n’umutoza Xavier Hernández, ushobora kwifashisha abakinnyi nka Marc-André ter Stegen, Andreas Christensen, Ronald Araújo, Jules Koundé, Sergio Busquets, Frenkie De Jong, Pedro González Pedri, Ousmane Dembélé, Ansu Fati na Robert Lewandowski.

Real Madrid ya Carlo Ancelotti ishobora kwifashisha abakinnyi barimo Thibaut Courtois, Fernández Nacho, Antonio Rüdiger, Ferland Mendy, Luka Modrić, Toni Kroos, Federico Valverde, Rodrygo, Vinícius Júnior na Karim Benzema.

igikombe cya Supercopa de España kigiye guhatanirwa na FC Barcelona na Real Madrid
Umukino wa FC Barcelone na Real Madrid urabera muri Arabie Saoudite
FC Barcelona yiteguye gukina umukino wa nyuma wa Supercopa de España
Real yabonye itike yo gukina umukino wa nyuma wa Supercopa de España itsinze Valence C.F
Karim Benzema na Sergio Busquets bagiye kongera guhurira muri El Clásico
Cristiano Ronaldo yakurikiranye imyitozo ya Real Madrid yitegura gukina na FC Barcelona
Lionel Messi ni we watsinze ibitego byinshi muri El Clásico
Alfredo Di Stéfano yahemukiye FC Barcelone yerekeza muri Real Madrid mu ntambara yakemuwe na FIFA
Karim Benzema yashimangiye ko ameze neza ndetse agomba gukina na FC Barcelona ku nshuro ye ya 42

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .